ఓటీటీలోకి మ‌ల‌యాళం రొమాంటిక్ కామెడీ మూవీ - పీట‌ల‌పై నుంచి పెళ్లికూతురు జంప్ అయితే!

మ‌ల‌యాళం మూవీ మిస్ట‌ర్ అండ్ మిస్ బ్యాచ్‌ల‌ర్ ఓటీటీలోకి వ‌స్తోంది. జూలై 11 నుంచి మ‌నోర‌మా మ్యాక్స్ ఓటీటీలో ఈ మూవీ స్ట్రీమింగ్ కాబోతోంది. రిలీజ్ డేట్‌ను ఓటీటీ ప్లాట్‌ఫామ్ అఫీషియ‌ల్‌గా ప్ర‌క‌టించింది.

మిస్ట‌ర్ అండ్ మిస్ బ్యాచ్‌ల‌ర్ మూవీలో ఇంద్ర‌జీత్ సుకుమార‌న్‌, అన‌శ్వ‌ర రాజ‌న్ హీరోహీరోయిన్లుగా న‌టించారు. ఈ సినిమాకు దీపు క‌రుణాక‌ర‌ణ్ ద‌ర్శ‌క‌త్వం వ‌హించాడు.

ప్ర‌మోష‌న్స్‌కు దూరం...

మే నెలాఖ‌రున‌ థియేట‌ర్ల‌లో రిలీజైన మిస్ట‌ర్ అండ్ మిస్ బ్యాచ్‌ల‌ర్ మూవీ బాక్సాఫీస్ వ‌ద్ద యావ‌రేజ్‌గా నిలిచింది. ఈ సినిమా ప్ర‌మోష‌న్స్‌లో హీరోయిన్ అన‌శ్వ‌ర రాజ‌న్ పాల్గొన‌క‌పోవ‌డం వివాదానికి దారితీసింది. ఆమెపై మ‌ల‌యాళం మూవీ ఆర్టిస్ట్ అసోసియేష‌న్‌లో డైరెక్ట‌ర్ కంప్లైంట్ ఇచ్చాడు. చివ‌ర‌కు మేక‌ర్స్‌తో రాజీ కుదుర్చుకొని ఓ మెట్టు దిగిన అన‌శ్వ‌ర ప్ర‌మోష‌న్స్‌కు హాజ‌రైంది.

న‌ల‌భై ఏళ్ల బ్యాచ్‌ల‌ర్‌...

మ‌రికొద్ది నిమిషాల్లో పెళ్లి అన‌గా పీట‌ల‌పై నుంచి పారిపోతుంది స్టెఫీ. న‌ల‌భై ఏళ్లు వ‌చ్చిన పెళ్లి చేసుకోకుండా బ్యాచ్‌ల‌ర్‌గా మిగిలిపోయిన‌ జీతూ ఆమెకు ప‌రిచ‌యం అవుతాడు. అనుకోకుండా వారిద్ద‌రూ క‌లిసి ఓ జ‌ర్నీ సాగించాల్సివ‌స్తుంది? ఈ ప్ర‌యాణంలో ఏం జ‌రిగింది? జీతూ పెళ్లిచేసుకోక‌పోవ‌డానికి కార‌ణం ఏంటి? స్టెఫీ పెళ్లి పీట‌ల‌పై నుంచి ఎందుకు పారిపోయింది అన్న‌దే ఈ మూవీ క‌థ‌.

పృథ్వీరాజ్ సుకుమార‌న్ త‌మ్ముడు...

పృథ్వీరాజ్ సుకుమార‌న్‌ సోద‌రుడైన ఇంద్ర‌జీత్ సుకుమార‌న్‌ మ‌ల‌యాళంలో వెర్స‌టైల్ యాక్ట‌ర్‌గా కొన‌సాగుతోన్నాడు. హీరోగానే కాకుండా విల‌న్‌గా ప‌లు సినిమాలు చేశాడు. తెలుగులో కావ్య‌స్ డైరీ అనే సినిమాతో పాటు త్రిష బృంద వెబ్‌సిరీస్‌లో నెగెటివ్ షేడ్స్ క్యారెక్ట‌ర్‌లో క‌నిపించాడు.

రేఖ‌చిత్రం మూవీతో..,.

ఈ ఏడాది రిలీజైన రేఖ‌చిత్రం మూవీతో బిగ్గెస్ట్ బ్లాక్‌బ‌స్ట‌ర్‌ను అందుకున్న‌ది అన‌శ్వ‌ర రాజ‌న్‌. రేఖ అనే అమ్మాయిగా టైటిల్ పాత్ర‌లో ఆమె న‌ట‌న‌కు ప్ర‌శంస‌లు ద‌క్కాయి. 7 జీ బృందావ‌న కాల‌నీ సీక్వెల్‌తో టాలీవుడ్‌లోకి హీరోయిన్‌గా ఎంట్రీ ఇవ్వ‌బోతున్న‌ది అన‌శ్వ‌ర రాజ‌న్‌.