తెలుగులో మరో కడుపుబ్బా నవ్వించే కామెడీ మూవీ.. మిత్ర మండలి ట్రైలర్ రిలీజ్.. ఆ రెండు సినిమాలను గుర్తుకు తెచ్చేలా..

తెలుగులో ఇప్పటికే జాతి రత్నాలు, మ్యాడ్ మూవీస్ ఎంతటి సంచలన విజయం సాధించాయో మనకు తెలుసు. ఆ రెండు సినిమాలను గుర్తుకు తెచ్చేలా ఇప్పుడు మిత్ర మండలి పేరుతో మరో సినిమా ప్రేక్షకుల ముందుకు వస్తోంది. ఈ సినిమా ట్రైలర్ మంగళవారం (అక్టోబర్ 7) రిలీజైంది.

మిత్ర మండలి ట్రైలర్ ఎలా ఉందంటే?

ప్రముఖ టాలీవుడ్ నిర్మాత బన్నీ వాస్ సమర్పణలో ఈ మిత్ర మండలి మూవీ తెరకెక్కింది. ఈ సినిమాలో ప్రియదర్శితోపాటు ప్రసాద్ బెహరా, విష్ణు, మయూర్, వెన్నెల కిశోర్, సత్యలాంటి వాళ్లు నటించారు. ఈ మూవీ ట్రైలర్ ఊహించినట్లే కడుపుబ్బా నవ్వించేలా సాగింది. ఈ ట్రైలర్ మొదట్లోనే సినిమాలోనే లీడ్ పాత్రలను పరిచయం చేశారు.

అది గాలికి తిరిగే బ్యాచ్ అని చూడగానే అర్థమవుతుంది. ఆ ముగ్గురూ ఓ అమ్మాయి వెంట పడటం, అందులో భాగంగా జరిగే ఫన్నీ హింస, గందరగోళం మధ్య ఈ మిత్ర మండలి ట్రైలర్ సాగిపోయింది. రెండు నిమిషాల 40 సెకన్లకుపైగా ఉన్న ఈ ట్రైలర్ చూస్తుంటే.. మూవీ స్టోరీ కంటే కూడా కేవలం కామెడీనే నమ్ముకొని నడిపించినట్లు స్పష్టమవుతోంది. ఈ ట్రైలర్లో డైరెక్టర్ అనుదీప్, సీనియర్ కమెడియన్ బ్రహ్మానందం స్పెషల్ అప్పియరెన్స్ సినిమాపై అంచనాలను మరింత పెంచేసింది.

మిత్ర మండలి మూవీ గురించి..

తెలుగులో కొన్నేళ్లుగా పెద్దగా కథకు ప్రాధాన్యం లేకుండా కేవలం ఓ ఫ్రెండ్స్ బ్యాచ్, వాళ్ల మధ్య జరిగే కామెడీ సీన్లతో సినిమాను నడిపించేయడం ఆనవాయితీగా వస్తోంది. అలా వచ్చిన జాతి రత్నాలు, మ్యాడ్, మ్యాడ్ స్క్వేర్ లాంటి సినిమాలు బాక్సాఫీస్ దగ్గర మంచి విజయం సాధించాయి. దీంతో ఇంచుమించు అదే కాన్సెప్ట్ తో ఈ మిత్ర మండలి సినిమా వస్తోంది.

ప్రియదర్శి, విష్ణు, వెన్నెల కిశోర్ లాంటి కమెడియన్లు ఉండటంతో ఈ సినిమా కూడా కామెడీకి గ్యారెంటీ ఇస్తోంది. విజయేందర్ డైరెక్ట్ చేసిన ఈ సినిమాను కల్యాణ్ మంథిన, భాను ప్రతాప, డాక్టర్ విజేందర్ రెడ్డి తీగల కలిసి సప్త అశ్వ మీడియా వర్క్స్, వైరా ఎంటర్టైన్మెంట్స్ బ్యానర్లపై నిర్మించారు. ఈ మూవీ అక్టోబర్ 16న థియేటర్లలో రిలీజ్ కానుంది.