రూ.5 వేల కోట్ల హాలీవుడ్ యాక్షన్ థ్రిల్లర్.. ఓటీటీ రిలీజ్ డేట్ ఇదే.. రెండు ఓటీటీ ప్లాట్‌ఫామ్స్‌లో స్ట్రీమింగ్

హాలీవుడ్ సక్సెస్‌ఫుల్ ఫ్రాంఛైజీల్లో ఒకటి మిషన్ ఇంపాజిబుల్. టామ్ క్రూజ్ లీడ్ రోల్లో వచ్చిన ఈ హిట్ ఫ్రాంఛైజీ నుంచి ఈ మధ్యే ది ఫైనల్ రెకనింగ్ వచ్చిన విషయం తెలిసిందే. 2023లో వచ్చిన 'మిషన్: ఇంపాజిబుల్ – డెడ్ రెక్నింగ్ పార్ట్ వన్' సినిమాకు సీక్వెల్‌గా.. 'మిషన్ ఇంపాజిబుల్' సిరీస్‌లో 8వ భాగం అయిన 'మిషన్ ఇంపాజిబుల్ - ది ఫైనల్ రెకనింగ్' సినిమా ఓటీటీలోకి రావడానికి సిద్ధమైంది. మే 2025లో థియేటర్లలో విడుదలైన ఈ టామ్ క్రూజ్ మూవీ ఇప్పుడు డిజిటల్ ప్లాట్‌ఫారమ్‌లలో అందుబాటులోకి వస్తోంది.

మిషన్ ఇంపాజిబుల్ ఫైనల్ రెకనింగ్ ఓటీటీ

పారామౌంట్ పిక్చర్స్ తెలిపిన వివరాల ప్రకారం.. టామ్ క్రూజ్ నటించిన 'మిషన్ ఇంపాజిబుల్ - ది ఫైనల్ రెకనింగ్' ఆగస్టు 19 నుండి అమెజాన్ ప్రైమ్ వీడియో, ఆపిల్ టీవీ వంటి డిజిటల్ ప్లాట్‌ఫామ్‌లలో అందుబాటులోకి రానుంది. అయితే ఈ సినిమాను రెంట్ విధానంలో చూడొచ్చు. ఈ విషయాన్ని 'మిషన్ ఇంపాజిబుల్' అధికారిక ఎక్స్ హ్యాండిల్ కూడా షేర్ చేసింది.

"ప్రపంచవ్యాప్తంగా, మీరు అద్భుతమైన రెస్పాన్స్ ఇచ్చారు. ఇప్పుడు మిషన్ ఇంపాజిబుల్ - ది ఫైనల్ రెకనింగ్ ను ఆగస్టు 19 నుండి డిజిటల్‌లో చూడండి. ప్రస్తుతం థియేటర్లలో చూడండి" అని క్యాప్షన్ ఇచ్చింది. బాక్సాఫీస్ దగ్గర ప్రపంచవ్యాప్తంగా రూ.5 వేల కోట్లకుపైగా వసూలు చేసిని సినిమా ఇది.

మిషన్ ఇంపాజిబుల్ - ది ఫైనల్ రెకనింగ్ గురించి..

మిషన్ ఇంపాజిబుల్ – ది ఫైనల్ రెకనింగ్ సినిమాలో ఈథన్ హంట్, అతని ఐఎంఎఫ్ బృందం 'ది ఎంటిటీ' అనే ఒక తిరుగుబాటు ఏఐని ఎదుర్కొంటారు. ఈ 'ఎంటిటీ' ప్రపంచ గూఢచార నెట్‌వర్క్‌లలోకి చొరబడి, సమాచారాన్ని తారుమారు చేయడం ద్వారా ప్రపంచ అణు యుద్ధానికి దారితీసేలా హెచ్చరిస్తుంది. సమయం మించిపోకముందే హంట్ ఆ ఎంటిటీ సోర్స్ కోడ్‌ను కనుగొని, దానిని పని చేయకుండా చేయడానికి ఒక మార్గాన్ని వెతకాలి.

ఎంటిటీని ఎదుర్కోవడానికి ఈ బృందం ఒక 'పాయిజన్ పిల్ మాల్వేర్'ను సృష్టిస్తుంది. కానీ వారు ఎంటిటీ చర్యల పరిణామాలను, అణు విధ్వంసం ప్రమాదాన్ని కూడా ఎదుర్కోవాల్సి ఉంటుంది. ఈ సినిమాలో బెంజి, లూథర్, గ్రేస్ వంటి పాత పాత్రలతో పాటు, గాబ్రియెల్ సహా కొత్త మిత్రులు, శత్రువులు కూడా ఉన్నారు.

'మిషన్ ఇంపాజిబుల్ - ది ఫైనల్ రెకనింగ్'ను స్కైడాన్స్ మీడియా, టీసీ ప్రొడక్షన్స్, పారామౌంట్ పిక్చర్స్ బ్యానర్‌ల కింద టామ్ క్రూజ్, క్రిస్టోఫర్ మెక్‌క్వారీ, జేక్ మైయర్స్ నిర్మించారు. టామ్ క్రూజ్‌తో పాటు ఈ మూవీలో హేలీ అట్‌వెల్, వింగ్ రేమ్స్, సైమన్ పెగ్, ఈసాయ్ మోరల్స్, పోమ్ క్లెమెంటిఫ్‌, హెన్రీ కెజర్నీ, హోల్ట్ మెక్‌కాల్నీ, జానెట్ మెక్‌టీర్, నిక్ ఆఫర్‌మాన్, ట్రమెల్ టిల్మాన్, షీ విగ్‌హామ్, ఏంజెలా బాసెట్ తదితరులు కీలక పాత్రల్లో నటించారు.