Miss Perfect OTT: లావణ్య త్రిపాఠి, బిగ్‍బాస్ అభిజిత్ వెబ్ సిరీస్ స్ట్రీమింగ్ డేట్ ఫిక్స్.. ట్రైలర్ రిలీజ్

Miss Perfect OTT Release Date: హీరోయిన్ లావణ్య త్రిపాఠి ప్రధాన పాత్రలో ‘మిస్ పర్‌ఫెక్ట్’ వెబ్ సిరీస్ వచ్చేస్తోంది. మెగా హీరో వరుణ్ తేజ్‍ను పెళ్లి చేసుకున్నాక లావణ్య చేసిన సిరీస్ ఇది. ‘మిస్ పర్‌ఫెక్ట్’ లవ్ కామెడీ వెబ్ సిరీస్‍గా రూపొందింది. ఈ సిరీస్‍కు స్కైలాబ్ ఫేమ్ విశ్వక్ ఖండేరావ్ దర్శకత్వం వహించారు. బిగ్‍బాస్ ఫేమ్ అభిజిత్ ఈ సిరీస్‍లో మరో ప్రధాన పాత్ర చేశారు. ఈ ‘మిస్ పర్‌ఫెక్ట్’ వెబ్ సిరీస్ ట్రైలర్ నేడు (జనవరి 22) రిలీజ్ అయింది. అలాగే, ఈ సిరీస్ స్ట్రీమింగ్ డేట్ కూడా ఖరారైంది. మిస్ పర్‌ఫెక్ట్ సిరీస్ ట్రైలర్ ఎలా ఉందంటే..

“స్కూల్ టాపర్.. క్లాస్ అంబాసిడర్.. టీచర్ ఫేవరెట్.. నాకు క్లీనింగ్ అంటే ఇష్టం.. క్లీనింగ్ గురించి నాకు ప్యాషన్ ఉంది” అని లావణ్య త్రిపాఠి చెప్పే డైలాగ్‍తో ‘మిస్ పర్‌ఫెక్ట్’ ట్రైలర్ మొదలైంది. మేనేజ్‍మెంట్ కన్సల్టెంట్ లావణ్య రావు అనే పాత్రను ఈ సిరీస్‍లో లావణ్య పోషించారు. పక్కింట్లో ఉంటూ లావణ్యను ప్రేమించే యువకుడు రోహిత్ పాత్రలో బిగ్‍బాస్ అభిజిత్ నటించారు. అతడు చెఫ్‍గా పని చేస్తుంటాడు.

‘మిస్ పర్‌ఫెక్ట్’ సిరీస్‍లో లావణ్య శుభ్రత అంటే ప్రాణమిస్తుంది. అభిజిత్ మాత్రం క్లీన్‍నెస్‍ను పట్టించుకోడు. ఎట్టకేలకు ఒకరింటే ఒకరు ఇష్టపడతారు. ఆ తర్వాత ఏం జరిగిందనేదే ఈ సిరీస్ ప్రధాన కథలా కనిపిస్తోంది. రోమ్ కామ్‍గా వస్తున్న ‘మిస్ పర్‌ఫెక్ట్’ సిరీస్ ట్రైలర్ ఆసక్తికరంగా ఉంది.

‘మిస్ పర్‌ఫెక్ట్’ స్ట్రీమింగ్ డేట్

మిస్ పర్‌ఫెక్ట్ వెబ్ సిరీస్ స్ట్రీమింగ్ డేట్‍ను కూడా డిస్నీ+ హాట్‍స్టార్ ఓటీటీ ప్లాట్‍ఫామ్ ఖరారు చేసింది. ఈ సిరీస్ ఫిబ్రవరి 2వ తేదీన స్ట్రీమింగ్‍కు తీసుకురానున్నట్టు ప్రకటించింది. “ఇది పర్‌ఫెక్ట్ లవ్ స్టోరీనా కాదా? గందరగోళం, క్రేజీనెస్‍, క్యూట్‍నెస్ ఉండే ఈ రోమ్ కామ్ మీ హృదయాన్ని తాకుతుంది!. ‘మిస్ పర్‌ఫెక్ట్’ డిస్నీ+ హాట్‍స్టార్‌లో ఫిబ్రవరి 2న స్ట్రీమింగ్‍కు వస్తుంది” అని ట్వీట్ చేసింది.

‘మిస్ పర్‌ఫెక్ట్’ వెబ్ సిరీస్‍లో లావణ్య త్రిపాఠి, అభిజిత్‍తో పాటు అభిజ్ఞ, ఝాన్సీ, హర్షవర్ధన్, మహేశ్ విట్టా, హర్ష్ రోహన్ కీలకపాత్రలు పోషించారు. అన్నపూర్ణ స్టూడియోస్ పతాకంపై సుప్రియ యార్లగడ్డ ఈ సిరీస్‍ను నిర్మించారు. ప్రశాంత్ వి విహారీ సంగీతం అందించారు.

వరుణ్ - లావణ్య పెళ్లి

మెగా హీరో కొణిదెల వరుణ్ తేజ్, లావణ్య త్రిపాఠి వివాహం గతేడాది నవంబర్ 1వ తేదీన జరిగింది. ఇటలీలోని టస్కానీలో ఓ లగ్జరీ ప్యాలెస్‍లో వారి పెళ్లి వైభవంగా జరిగింది. కొణిదెల, అల్లు కుటుంబాల సభ్యులు, అత్యంత సన్నిహితుల సమక్షంలో ఈ పెళ్లి వేడుక సాగింది. ఆ తర్వాత నవంబర్ 5వ తేదీన హైదరాబాద్‍లో వరుణ్, లావణ్య రిసెప్షన్ వేడుక జరిగింది. ఈ వేడుకకు చాలా మంది సినీ, రాజకీయ ప్రముఖులు హాజరయ్యారు.

పెళ్లి జరిగాక కొన్ని రోజులు ఎంజాయ్ చేసిన వరుణ్, లావణ్య మళ్లీ యాక్టింగ్‍లో బిజీ అయ్యారు. లావణ్య.. ఈ ‘మిస్ పర్‌ఫెక్ట్’ సిరీస్‍తో పాటు మరో తమిళ సినిమాకు ఓకే చెప్పారు. వరుణ్ తేజ్.. ఆపరేషన్ వాలెంటైన్ మూవీ చేస్తున్నారు. ఈ చిత్రం ఫిబ్రవరి 16న థియేటర్లలో రిలీజ్ కానుంది.