Dasara Movie Countdown Promotion: దసరా మూవీకి వినూత్న ప్రమోషన్లు.. దేశంలోనే తొలిసారిగా నాని చిత్రానికి కౌంట్‌డౌన్

Dasara Movie Countdown Promotion: నేచురల్ స్టార్ నాని గతేడాది అంటే సుందరానికి చిత్రంతో ప్రేక్షకుల ముందుకొచ్చాడు. ఈ సినిమా అనుకున్న స్థాయిలో ఆకట్టుకోకపోయినా.. విమర్శకుల ప్రశంసలు అందుకుంది. ప్రస్తుతం దసరా సినిమాతో సందడి చేయబోతున్నారు. ఈ సినిమా మార్చి 30న ప్రేక్షకుల ముందుకు రానుంది. శ్రీకాంత్ ఓదెల దర్శకుడిగా పరిచయం కాబోతున్న ఈ సినిమాకు ప్రమోషన్‌ను వినూత్నంగా నిర్వహిస్తున్నారు. నేచురల్ స్టార్ నాని పుట్టినరోజును పురస్కరించుకుని మేకర్స్ ప్రత్యేకమైన ప్రమోషనల్ క్యాంపెయిన్‌ను ఏర్పాటు చేశారు.

నాని 39వ పుట్టిన రోజు సందర్భంగా దసరా చిత్రాన్ని తెలుగు రాష్ట్రాల్లోని 39 కేంద్రాల్లో కౌంట్ డౌన్ ఇన్‌స్టాలేషన్‌లు ఏర్పాటు చేయనున్నారు. శుక్రవారం(ఫిబ్రవరి 24) నాడు నాని బర్త్ డే సందర్భంగా ఈ క్యాంపెయిన్‌కు శ్రీకారం చుట్టనున్నారు. ఈ విధంగా ఓ హీరో కౌంట్‌డౌన్ ఇన్‌స్టాలేషన్‌లు చేయడం ఇండియాలో ఇదే మొదటి సారి. దీన్ని బట్టి సినిమా విడుదలయ్యే వరకు ప్రతి రోజు థియేటర్లలో కటౌట్‌లను మారుస్తుంటారు. ఈ విషయాన్ని చిత్ర నిర్మాణ సంస్థ ఎస్ఎల్‌వీ సినిమాస్ తన ట్విటర్ ద్వారా తెలియజేసింది.

"దసరా సినిమా కౌంట్‌డౌన్ కోసం మొదటి యాక్టివేషన్ కోసం అంతా సిద్ధమైంది. నేచురల్ స్టార్ నాని 39వ పుట్టినరోజును 39 కేంద్రాల్లో జరుపుకుందాం. దసరా కోసం రేపు సాయంత్రం 4 గంటల నుంచి కౌంట్ డౌన్ ప్రారంభమవుతుంది." అని ట్విటర్ వేదికగా పేర్కొంది.

తెలుగు రాష్ట్రాల్లో తర్వాత కౌంట్ డౌన్ ఇన్‌స్టాలేషన్‌లను దేశవ్యాప్తంగా ఉన్న ఇతర నగరాల్లోనూ ఏర్పాటు చేస్తారు. ఈ బృందం దేశంలోని వివిధ నగరాలు, పట్టణాల్లో కూడా ఉంటుంది. రాబోయే నెల రోజుల పాటు విపరీతంగా ప్రమోషన్లు నిర్వహించనుంది.

శ్రీకాంత్ ఓదెల దర్శకత్వం వహించిన దసరా చిత్రం పీరియాడికల్ యాక్షన్ జోనర్‌లో తెరకెక్కింది. సుధాకర్ చెరుకూరి నిర్మాతగా వ్యవహరిస్తున్నారు. నేచురల్ స్టార్ నాని సరసన కీర్తి సురేష్ హీరోయిన్‌గా చేస్తోంది. ఈ చిత్రంలో సముద్రఖని కీలక పాత్ర పోషించారు. భారీ బడ్జెట్‌తో రూపొందుతున్న ఈ సినిమా పాన్ఇండియా స్థాయిలో విడుదల కానుంది. ఈ చిత్రాన్ని 2023 మార్చి 30న ప్రపంచ వ్యాప్తంగా ప్రేక్షకుల ముందుకు తీసుకురావాలని మేకర్స్ సన్నాహాలు చేస్తున్నారు.