Malayalam Thriller: ఈ మలయాళం థ్రిల్లర్‌లోని ట్విస్టులకు మతి పోవాల్సిందే.. యూట్యూబ్‌లో ఫ్రీగా చూసేయండి

Malayalam Thriller: థ్రిల్లర్ మూవీస్ అంటే మంచి థ్రిల్ పంచాలి. ఆ థ్రిల్ ట్విస్టులతోనే వస్తుంది. ఆ ట్విస్టులు ఊహకందని విధంగా ఉంటే ఆ థ్రిల్ మరింత పెరుగుతుంది. అలాంటి థ్రిల్ పంచేదే మలయాళం థ్రిల్లర్ మూవీ సీబీఐ 5: ది బ్రెయిన్. నెట్‌ఫ్లిక్స్ తోపాటు యూట్యూబ్ లోనూ ఫ్రీగా స్ట్రీమింగ్ అవుతున్న సినిమా ఇది.

సీబీఐ 5: ది బ్రెయిన్.. మంచి థ్రిల్లర్

మలయాళ మెగాస్టార్ మమ్ముట్టి నటించిన మూవీ సీబీఐ 5: ది బ్రెయిన్. 2022లో వచ్చిన సినిమా ఇది. సీబీఐ ఫ్రాంఛైజీలో భాగంగా వచ్చిన మూవీ. ఇదొక ఇన్వెస్టిగేటివ్ థ్రిల్లర్. ఓ మంత్రి, ఓ జర్నలిస్ట్, ఓ పోలీస్ అధికారి హత్యల చుట్టూ తిరిగే మూవీ ఇది. ఇందులో సీబీఐ అధికారి సేతురామ అయ్యర్ పాత్రలో మమ్ముట్టి నటించాడు. ఈ సినిమాను కే. మధు డైరెక్ట్ చేశాడు.

మంచి మిస్టరీ థ్రిల్లర్ మూవీ చూడాలనుకుంటే యూట్యూబ్‌లోనూ ఫ్రీగా అందుబాటులో ఉన్న ఈ సీబీఐ 5 మిస్ కావద్దు. బాస్కెట్ కిల్లింగ్స్ గా పిలిచే కేసును సీనియర్ సీబీఐ ఆఫీసర్ ఎలా ఛేదించాడన్నది ఈ మూవీలో చూడొచ్చు. ఇందులో భాగంగా వచ్చే ఊహించని ట్విస్టులు థ్రిల్ పంచుతాయి.

సీబీఐ 5 స్టోరీ ఏంటంటే?

సీబీఐ 5 స్టోరీ ఓ ఐపీఎస్ ట్రైనీల కోసం సీబీఐ అధికారులు నిర్వహించే ట్రైనింగ్ తో మొదలవుతుంది. ఇందులో భాగంగా డీఎస్పీ బాలగోపాల్, సీఐ వినయ్.. గతంలో సీబీఐ విజయవంతంగా పరిష్కరించిన కేసుల గురించి వివరిస్తారు. అందులో ఓ బాస్కెట్ కిల్లింగ్ కేసు గురించి కూడా చెబుతారు. అది 2012లో జరిగిన కేసు. కేరళ హోంమంత్రి ఓ విమానంలో అనుకోకుండా చనిపోవడంతో ఈ కేసు మొదలవుతుంది.

ఆ తర్వాత జర్నలిస్ట్ భాసురన్, పోలీస్ అధికారి జోస్మన్ కూడా హత్యకు గురవుతారు. ఈ హత్యల వెనుక ఇసుక మాఫియా హస్తం ఉందని మొదట భావించినా.. ఆ తర్వాత కేసు విచారణ జరిగిన కొద్దీ ఒక్కో ఊహించని నిజం బయటపడుతుంది. స్థానిక పోలీసులను తప్పించి విచారణను సీబీఐకి అప్పగించడం నుంచి.. వాళ్లు ఈ కేసును పరిష్కరించే వరకు ఎన్నో ట్విస్టులు వస్తుంటాయి. ఈ ట్విస్టులే సినిమాను చివరి వరకూ ఆసక్తిగా చూసేలా చేస్తాయి.

ఈ సినిమా ఎందుకు చూడాలంటే?

ఇన్వెస్టిగేటివ్ థ్రిల్లర్స్ తీయడంలో మలయాళం ఫిల్మ్ మేకర్స్ ను మించిన వాళ్లు లేరని చెప్పొచ్చు. ఈ సీబీఐ 5 కూడా అలాంటిదే. సాధారణంగానే ఈ ఇన్వెస్టిగేటివ్ థ్రిల్లర్స్ కథనాలు ఆసక్తి రేపుతాయి. సీబీఐ 5లోని ట్విస్టులు ఆ సినిమాను మరో లెవెల్ కు తీసుకెళ్లాయి.

ఇక మెగాస్టార్ మమ్ముట్టి నటన గురించి ప్రత్యేకంగా చెప్పాల్సిన పనిలేదు. ఓ సీనియర్ సీబీఐ అధికారిగా తనదైన స్టైల్లో సులువుగా చేసేశాడు. మంత్రి, జర్నలిస్ట్, పోలీస్ అధికారి హత్యలే ఈ సినిమాపై ఆసక్తి రేపడానికి ప్రధాన కారణం. అయితే ఆ హత్యలకు కారణమేంటన్నది మన ఊహలకందని విధంగా సాగుతుంది. క్లైమ్యాక్స్ కూడా అంతే. మంచి ట్విస్టులతో కూడిన ఇన్వెస్టిగేటివ్ థ్రిల్లర్ మూవీ చూడాలనుకుంటే ఈ సీబీఐ 5: ది బ్రెయిన్ మిస్ కావద్దు.