Prithviraj Sukumaran Injured: షూటింగ్‌లో గాయ‌ప‌డ్డ మ‌ల‌యాళ స్టార్ హీరో - స‌లార్ టీమ్ టెన్ష‌న్‌?

Prithviraj Sukumaran Injured: మ‌ల‌యాళ (Malayalam) స్టార్ హీరో పృథ్వీరాజ్ సుకుమార‌న్ సినిమా షూటింగ్‌లో గాయ‌ప‌డ్డాడు. అత‌డికి సోమ‌వారం డాక్ట‌ర్లు స‌ర్జ‌రీ చేయ‌బోతున్న‌ట్లు స‌మాచారం. పృథ్వీరాజ్ సుకుమార‌న్ ప్ర‌స్తుతం మ‌ల‌యాళంలో విళ‌య‌త్ బుద్ధ పేరుతో ఓ సినిమా చేస్తోన్నాడు.

కేర‌ళ‌లోని మ‌ర‌యూర్‌లో ఈ సినిమా షూటింగ్ జ‌రుగుతోంది. యాక్ష‌న్ సినిమా సీక్వెన్స్ షూట్ చేస్తోన్న స‌మ‌యంలో ప్ర‌మాద‌వ‌శాత్తూ అత‌డి కాలికి దెబ్బ త‌గిలిన‌ట్లు తెలిసింది. ప్ర‌మాదం జ‌రిగిన వెంట‌నే సినిమా యూనిట్ అత‌డిని కొచ్చిలోని ఓ ప్రైవేటు హాస్పిట‌ల్‌కు త‌ర‌లించారు. గాయం తీవ్ర‌త‌ను ఎక్కువ‌గా ఉండ‌టంతో పృథ్వీరాజ్ సుకుమార‌న్‌కు డాక్ట‌ర్లు స‌ర్జ‌రీ చేయాల‌ని నిర్ణ‌యించిన‌ట్లు చెబుతోన్నారు.

సోమ‌వారం ఈ స‌ర్జ‌రీ జ‌రిగే అవ‌కాశాలు ఉన్న‌ట్లు తెలిసింది. ఈ ప్ర‌మాదం కార‌ణంగా రెండు నుంచి మూడు వారాల వ‌ర‌కు పృథ్వీరాజ్ సుకుమార‌న్ షూటింగ్‌ల‌కు దూరంగా ఉండ‌నున్న‌ట్లు తెలిసింది. పృథ్వీరాజ్ ప్ర‌మాదం కార‌ణంగా స‌లార్ (Salaar) టీమ్ టెన్ష‌న్ ప‌డుతోన్న‌ట్లు స‌మాచారం. స‌లార్ సినిమాలో పృథ్వీరాజ్ సుకుమార‌న్ విల‌న్‌గా న‌టిస్తోన్నాడు. వ‌ర‌ద‌రాజా మ‌న్నార్ అనే గ్యాంగ్‌స్ట‌ర్ పాత్ర‌లో అత‌డు క‌నిపించ‌బోతున్నాడు.

అత‌డిపై కొంత షూటింగ్ పార్ట్ బ్యాలెన్స్‌గా ఉన్న‌ట్లు స‌మాచారం. పృథ్వీరాజ్ ప్ర‌మాదం ఎఫెక్ట్ స‌లార్‌ షూటింగ్‌పై ప‌డే అవ‌కాశం ఉన్న‌ట్లు ప్ర‌చారం జ‌రుగుతోంది. పృథ్వీరాజ్‌సుకుమార‌న్ ప్ర‌మాద వార్త ప్ర‌స్తుతం సినీ వ‌ర్గాల్లో హాట్‌టాపిక్‌గా మారింది.

మ‌ల‌యాళంతో పాటు బాలీవుడ్(Bollywood), టాలీవుడ్‌లో పృథ్వీరాజ్ సుకుమార‌న్‌కు మంచి ఫాలోయింగ్ ఉంది. బాలీవుడ్‌లోనూ అక్ష‌య్‌కుమార్ హీరోగా న‌టిస్తోన్న భ‌డే మియా ఛోటా మియా సినిమాలో పృథ్వీరాజ్‌సుకుమార‌న్ కీల‌క పాత్ర‌ను పోషిస్తున్నాడు. మ‌ల‌యాళంలో పృథ్వీరాజ్ సుకుమార‌న్ హీరోగా న‌టిస్తోన్న ఆడుజీవితం సినిమా రిలీజ్‌కు సిద్ధంగా ఉంది.