Sudeep: మీడియాకు క్షమాపణలు చెప్పిన కిచ్చా సుదీప్.. కారణం ఇదే?

కన్నడ సినిమాలతో పాటు తెలుగులోనూ ఫాలోయింగ్ ఉన్న నటుడు కిచ్చా సుదీప్. హీరోగా ఆయన చేసిన సినిమాలు ఇక్కడ కూడా డబ్ అవుతూ ఉంటాయి. ఆయన విక్రాంత్ రోణ అనే సినిమా చేస్తున్నారు. ఈ సినిమా జులై 28న పాన్ఇండియా స్థాయిలో విడుదల కానుంది. ప్రస్తుతం ఈ చిత్ర ప్రచార కార్యక్రమాల్లో బిజీగా పాల్గొంటున్నారు. తాజాగా టాలీవుడ్, కోలీవుడ్ మీడియాకు కిచ్చా సుదీప్ క్షమాపణలు తెలిపారు. అనారోగ్యం కారణంగా ప్రెస్ మీట్స్ అన్నింటినీ రద్దు చేస్తున్నట్లు ట్విటర్ వేదికగా స్పష్టం చేశారు.

"అనారోగ్యానికి గురైన కారణంగా ప్రయాణాలు చేయలేకపోతున్నా. దీని వల్ల హైదరాబాద్, చెన్నై కొచ్చిలో ఈ రోజు జరగాల్సిన ప్రెస్ మీట్స్ అన్నింటినీ రద్దు చేస్తున్నాం. మీడియా మిత్రులందరికీ ఇందుకు క్షమాపణలు చెబుతున్నా. ఆరోగ్యం కుదుటపడిన వెంటనే ప్రెస్ మీట్స్‌లో మళ్లీ పాల్గొంటా. త్వరలోనే మీ అందర్నీ కలుసుకునేందుకు ఎదురుచూస్తున్నా." అంటూ సుదీప్ ట్విటర్ వేదికగా తెలిపారు.

ఈగ సినిమాతో తెలుగువారికి సుపరిచితులైన సుదీప్.. ఆ తర్వాత కన్నడ సినిమాలను తెలుగులోనూ డబ్ చేస్తూ అలరిస్తున్నారు. ప్రస్తుతం ఆయన హీరోగా రూపొందిన పాన్ఇండియా ప్రాజెక్టు విక్రాంత రోణ సినిమా విడుదలకు సిద్ధంగా ఉంది. అనుప్ బండారి దర్శకత్వం వహిస్తున్నారు. సోషియో ఫాంటసీ యాక్షన్ అడ్వెంచర్ కథాంశంతో రూపొందిన ఈ సినిమా జులై 28న ప్రేక్షకలు ముందుకు రానుంది. కన్నడతో పాటు తెలుగు, తమిళం, హిందీ భాషల్లో ఏకకాలంలో రిలీజ్ కానుంది.

ఇప్పటికే విడుదలైన ఈ చిత్ర ట్రైలర్లు, టీజర్లు, పాటలు సినిమాపై అమాంతం అంచనాలు పెంచేశాయి. ఈ ప్రచారంలో భాగంగానే చెన్నై, హైదరాబాద్ కొచ్చి నగరాల్లో గురువారం ప్రెస్ మీట్స్ నిర్వహించాలని చిత్రబృందం భావించగా., సుదీప్ అనారోగ్యానికి గురయ్యారు.