కొత్త సినిమాలు వచ్చినా తగ్గని కాంతార చాప్టర్ 1 జోష్.. కలెక్షన్లలో 47% భారీ జంప్.. వరల్డ్ వైడ్ 700 కోట్లు దాటిన వసూళ్లు

కాంతార చాప్టర్ 1 మూవీ కలెక్షన్ల మోత మోగిస్తూనే ఉంది. బాక్సాఫీస్ ను షేక్ చేస్తూనే ఉంది. థియేటర్లలో ఎన్ని కొత్త సినిమాలు వచ్చినా రిషబ్ శెట్టి నటించి, దర్శకత్వం వహించిన కాంతార చాప్టర్ 1 జోరు మాత్రం తగ్గడం లేదు. 17వ రోజు ఈ మూవీ వసూళ్లు 47 శాతం పెరగడం విశేషం. శనివారం (అక్టోబర్ 19) ఈ చిత్రం మళ్లీ పుంజుకుంది. డ్యూడ్, తెలుసు కదా, కే ర్యాంప్, బైసన్ లాంటి కొత్త సినిమాలు వచ్చినా కాంతార చాప్టర్ 1 అదరగొడుతూనే ఉంది.

కాంతార చాప్టర్ 1 కలెక్షన్లు

అక్టోబర్ 15న గణనీయమైన తగ్గుదల తర్వాత రిషబ్ శెట్టి యాక్షన్ థ్రిల్లర్ కాంతార చాప్టర్ 1 శనివారం నాడు తిరిగి పుంజుకుంది. 2025లో రెండవ అత్యధిక వసూళ్లు సాధించిన భారతీయ చిత్రంగా నిలిచిన ఈ సినిమా, మూడవ వారంలో కూడా జోరు తగ్గించకుండా బ్లాక్‌బస్టర్ దీపావళి వారాంతానికి సిద్ధమవుతోంది. గత మూడు రోజులుగా వరుసగా వసూళ్లలో తగ్గుదల చూసిన తర్వాత శనివారం ఈ పెరుగుదల కనిపించింది.

రూ. 125 కోట్ల బడ్జెట్‌తో రూపొందిన ఈ చిత్రం అత్యధిక కలెక్షన్లు సాధించిన భారతీయ చిత్రాలలో ఒకటిగా నిలిచి 'ఛావా'ను అధిగమించేందుకు పోటీ పడుతోంది.

ఎన్ని కోట్లంటే?

2022లో వచ్చిన 'కాంతార' చిత్రానికి ప్రీక్వెల్‌గా వచ్చింది కాంతార చాప్టర్ 1. ఈ సినిమా 17వ రోజు ఇండియాలో రూ.12.5 కోట్ల నెట్ కలెక్షన్లు రాబట్టినట్లు సినీ పరిశ్రమ ట్రాకర్ సక్నిల్క్ వెల్లడించింది. ఇప్పటికే పలు రికార్డులను బద్దలు కొట్టి, ఆల్-టైమ్ రెండవ అత్యధిక వసూళ్లు సాధించిన కన్నడ చిత్రంగా కాంతార చాప్టర్ 1 నిలిచింది. 2025లో అత్యధిక వసూళ్లు సాధించిన కన్నడ సినిమా ఇదే.

శనివారం నాటికి ఈ శాండల్‌వుడ్ చిత్రం ఇండియాలో రూ.506.3 కోట్ల నెట్ వ్యాపారం చేసింది. తన ప్రారంభ రోజున రిషబ్ శెట్టి నటించిన ఈ చిత్రం భారతదేశంలో రూ. 61.85 కోట్ల నెట్ కలెక్షన్లు ఖాతాలో వేసుకుంది. బాక్సాఫీస్ వద్ద రిషబ్ శెట్టి సినిమా కలెక్షన్ల ప్రభంజనం కొనసాగుతోంది. తన డ్రీమ్ రన్‌ను కొనసాగిస్తోంది.

వారం వసూళ్లు

కాంతార చాప్టర్ 1 వారం వారీగా వసూళ్లు ఇలా ఉన్నాయి. వారం 1: రూ. 337.4 కోట్లు నెట్, వారం 2: రూ. 147.85 కోట్లు నెట్ కలెక్షన్లు. దసరా సందర్భంగా అక్టోబర్ 2న బహుళ భాషలలో విడుదలైన ఈ కన్నడ చిత్రం థియేటర్లలో 16 రోజుల ప్రదర్శనలో ప్రపంచవ్యాప్తంగా రూ. 694 కోట్ల గ్రాస్ వ్యాపారం చేసింది. ఈ మొత్తంలో రూ. 104.50 కోట్ల గ్రాస్ ఓవర్సీస్ మార్కెట్ నుండి రాగా, మిగిలిన రూ. 589.50 కోట్ల గ్రాస్ దేశీయ మార్కెట్లో వసూలు చేయబడింది.

ఈ పాన్-ఇండియా చిత్రం 2 వారాల్లో రూ. 717.50 కోట్లు వసూలు చేసిందని చిత్ర నిర్మాతలు పేర్కొన్నారు. ఇన్‌స్టాగ్రామ్‌లోని ఒక పోస్ట్‌లో 'బాక్స్ ఆఫీస్ వద్ద దైవిక తుఫాను 💥💥కాంతార చాప్టర్ 1.. 2 వారాల్లో ప్రపంచవ్యాప్తంగా 717.50 కోట్లకు పైగా గ్రాస్ (గ్రాస్ బాక్స్ ఆఫీస్ కలెక్షన్) కలెక్షన్లు దాటి గర్జిస్తోంది' అని పోస్టు చేశారు.