Kangana on Kantara: కాంతారాను ఆస్కార్స్కు పంపించాలి.. హ్యాట్సాఫ్ రిషబ్శెట్టి: కంగనా
Kangana on Kantara: కాంతారాను ఆస్కార్స్కు పంపించాలని, హ్యాట్సాఫ్ రిషబ్శెట్టి అంటూ బాలీవుడ్ నటి కంగనా రనౌత్ చేసిన కామెంట్స్ ఇప్పుడు వైరల్ అవుతున్నాయి. ఈ మూవీకి మరో సెలబ్రిటీ ఫిదా అయిపోయినట్లు ఆమె తాజా పోస్ట్తో స్పష్టమవుతోంది.
Kangana on Kantara: కాంతారా అభిమానుల జాబితాలో మరో సెలబ్రిటీ చేరిపోయింది. తాజాగా ఈ సినిమా చూసిన బాలీవుడ్ నటి కంగనా రనౌత్.. ఈ మూవీని ఏకంగా ఇండియా తరఫున ఆస్కార్స్కు పంపించాలని అనడం విశేషం. అంతర్జాతీయ వేదికపై ఇండియాకు సరైన ప్రాతినిధ్యం ఉండాలని, దానికి కాంతారానే సరైన సినిమా అని ఆమె అంటోంది.
ఈ సినిమాను ప్రపంచమంతా కచ్చితంగా చూడాలని కంగనా అభిప్రాయపడింది. అంతేకాదు ఈ సినిమాను తీసిన రిషబ్ శెట్టిపైనా ప్రశంసలు కురిపించింది. హ్యాట్సాఫ్ రిషబ్శెట్టి అని కంగనా తన సోషల్ మీడియా పోస్ట్లో చెప్పింది. గురువారం (అక్టోబర్ 20) ఈ సినిమాను చూసిన ఆమె.. థియేటర్ నుంచి బయటకు వచ్చిన తర్వాత కూడా శరీరం కంపిస్తూనే ఉన్నదని చెప్పింది.
ఇక శుక్రవారం తన ఇన్స్టాగ్రామ్ స్టోరీలో ఈ మూవీని ఆస్కార్స్కు పంపించాలని డిమాండ్ చేసింది. "వచ్చే ఏడాది ఆస్కార్స్కు ఇండియా నుంచి కాంతారాను పంపించాలని భావిస్తున్నాను. ఈ ఏడాది ముగుస్తోంది. ఇంకా మరిన్ని మంచి సినిమాలు వస్తున్నాయి. అయితే ఆస్కార్ కంటే కూడా అంతర్జాతీయంగా ఇండియాకు సరైన ప్రాతినిధ్యం ఉండాలి. ఈ రహస్యాలు, మార్మిక నేలను అర్థం చేసుకోవాల్సిన అవసరం ఉంది. ఇండియా ఒక అద్భుతం. ఆ అద్భుతానికి తలొగ్గితే మీరు అందులో భాగమవుతారు. కాంతారా ఒక ప్రయోగాత్మక వాస్తవం. దానిని ప్రపంచమంతా చూడాలి" అని కంగనా రాసింది.
ఈ సినిమాను గురువారం చూసిన తర్వాత కూడా ఆమె చేసిన పోస్ట్ వైరల్ అయింది. ఓ సెల్ఫీ వీడియోలో ఆ మూవీ రివ్యూను చెప్పిందామె. "నా కుటుంబంతో కలిసి ఇప్పుడే కాంతారా చూసి వస్తున్నాను. కానీ ఇప్పటికీ నా శరీరం కంపిస్తోంది. ఇదో గొప్ప అనుభూతి. రిషబ్ శెట్టి.. నీకు హ్యాట్సాఫ్. రైటింగ్, డైరెక్టింగ్, యాక్టింగ్ అద్భుతం. నమ్మశక్యం కాకుండా ఉంది" అని ఆ రివ్యూలో కంగనా చెప్పింది.
"ఈ సినిమా సంస్కృతి, జానపద సాహిత్యం, స్థానిక అంశాల కలబోత. అందమైన ఫొటోగ్రఫీ, నటన బాగుంది. సినిమా అంటే ఇదీ. ఇలాంటిది గతంలో ఎప్పుడూ చూడలేదని థియేటర్లో చాలా మంది అనుకోవడం విన్నాను. ఈ సినిమా అందించినందుకు కృతజ్ఞతలు. మరో వారం రోజుల పాటు ఈ అనుభూతి నుంచి నేను బయటపడలేను" అని కూడా కంగనా చెప్పింది.
కన్నడలో రిలీజై సంచలన విజయం సాధించిన కాంతారా మూవీని ఇప్పటికే హిందీ, తెలుగు, తమిళంలోనూ రిలీజ్ చేశారు. ఆ భాషల్లోనూ కాంతారా అద్భుత విజయం సాధించింది. బాక్సాఫీస్ దగ్గర దూసుకెళ్తున్న ఈ సినిమా రూ.200 కోట్ల వైపు వెళ్తోంది. అత్యధిక వసూళ్లు సాధించిన కన్నడ సినిమాల్లో కేజీఎఫ్ 2, కేజీఎఫ్ తర్వాత మూడోస్థానంలో నిలిచింది.