రోడ్డు ప్రమాదంలో తీవ్రంగా గాయపడిన ఇండియన్ ఐడల్ విన్నర్.. ఫొటోలు, వీడియోలు వైరల్

మూడేళ్ల కిందట తన మధురమైన వాయిస్ తో ఇండియన్ ఐడల్ 12 సీజన్ విజేతగా నిలిచిన సింగర్ పవన్‌దీప్ రాజన్. ఉత్తరాఖండ్ కు చెందిన ఈ సింగర్ సోమవారం (మే 5) తెల్లవారుఝామున 3.40 గంటలకు జరిగిన ఓ రోడ్డు ప్రమాదంలో తీవ్రంగా గాయపడ్డాడు. ప్రమాదం తర్వాత అతడు హాస్పిటల్లో చికిత్స పొందుతున్న ఫొటోలు, వీడియోలు సోషల్ మీడియాలో వైరల్ అయ్యాయి.

పవన్‌దీప్‌కు ప్రమాదం

ఇండియన్ ఐడల్ సింగింగ్ షో ద్వారా పాపులర్ అయిన సింగర్ పవన్‌దీప్ రాజన్ ప్రస్తుతం నోయిడాలోని ఫోర్టిస్ హాస్పిటల్లో చికిత్స పొందుతున్నాడు. కారు ప్రమాదంలో అతనికి ఒకటికి మంచి ఫ్రాక్చర్లు అయినట్లు గుర్తించారు. ఈ ప్రమాదం జరిగిన వెంటనే అతన్ని స్థానిక హాస్పిటల్ కు తీసుకెళ్లినా.. తర్వాత గాయాల తీవ్రత ఎక్కువగా ఉండటంతో నోయిడాకు తరలించారు. నేషనల్ హైవే 9పై ఈ ప్రమాదం జరిగింది.

అతడు ప్రయాణిస్తున్న కారు ముందు వెళ్తున్న ట్రక్కును ఢీకొట్టింది. ఈ ప్రమాదంలో పవన్‌దీప్ కారు నుజ్జునుజ్జయింది. ప్రమాదం తర్వాత అతడు హాస్పిటల్లో అపస్మారక స్థితిలో ఉన్న వీడియోను ఓ వ్యక్తి ఇన్‌స్టాగ్రామ్ లో షేర్ చేశాడు. అతని కాళ్లు, చేతులకు తీవ్ర గాయాలైనట్లు ఈ ఫొటోలు, వీడియోలు చూస్తే స్పష్టమవుతోంది. అసలు ప్రమాదానికి కారణమేంటన్నది మాత్రం తెలియలేదు. పవన్‌దీప్‌కు ప్రమాదం విషయం తెలియగానే అతని అభిమానులు.. సోషల్ మీడియాలో గెట్ వెల్ సూన్ అంటూ కామెంట్స్ చేశారు.

ఎవరీ పవన్‌దీప్ రాజన్?

ఉత్తరాఖండ్ లోని కుమవోనీ తెగకు చెందిన కుటుంబం నుంచి వచ్చిన సింగర్ పవన్‌దీప్. అక్కడి జానపద కళాకారుడిగా మొదట పేరు సంపాదించాడు. అతని తండ్రి సురేష్ రాజన్, తల్లి సరోజ్ రాజన్, సోదరి జ్యోతిదీప్ రాజన్ కూడా ఆ జానపద కళాకారులే. మొదట 2015లో ది వాయిస్ ఆఫ్ ఇండియా రియాల్టీ షో ద్వారా వెలుగులోకి వచ్చాడు.

ఆ తర్వాత ఇండియన్ ఐడల్ 12 విజేతగా నిలిచి దేశవ్యాప్తంగా పేరు సంపాదించాడు. అరుణిత కాంజీలాల్, మహ్మద్ డానిష్, సాయ్లీ కాంబ్లే, నిహాల్ తౌరోలాంటి వాళ్లను వెనక్కి నెట్టి అతడు ట్రోఫీ అందుకున్నాడు. ఆ తర్వాత సూపర్ స్టార్ సింగర్ 2వ సీజన్లో మెంటార్ గా మారాడు.