హిట్ 3 కలెక్షన్ల ర్యాంపేజ్.. ఆ మైల్‍స్టోన్ దాటేసిన నాని యాక్షన్ సినిమా.. అక్కడ అప్పుడే ప్రాఫిట్ జోన్‍లోకి!

నేచురల్ స్టార్ నాని హీరోగా నటించిన హిట్ 3 (హిట్: థర్డ్ కేస్) బాక్సాఫీస్ వద్ద అదరగొడుతోంది. గత గురువారం మే 1వ తేదీన విడుదలైన ఈ వైలెంట్ యాక్షన్ క్రైమ్ థ్రిల్లర్ మొదటి నుంచి కలెక్షన్లలో జోరు చూపిస్తోంది. శైలేశ్ కొలను దర్శకత్వం వహించిన ఈ మూవీకి మిక్స్డ్ టాక్ వస్తున్నా వసూళ్లలో దూకుడు కనబరుస్తోంది. ఈ క్రమంలో హిట్ 3 చిత్రం నాలుగు రోజుల్లోనే మేజర్ మైల్‍స్టోన్ దాటేసింది.

రూ.100కోట్ల మార్క్ దాటేసి..

హిట్ 3 సినిమా ప్రపంచవ్యాప్తంగా రూ.100కోట్ల గ్రాస్ కలెక్షన్ల మార్క్ దాటేసింది. నాలుగు రోజుల్లో ఈ మూవీ రూ.101 గ్రాస్ వసూళ్లను దక్కించుకుందని తెలుస్తోంది. ఫస్ట్ వీకెండ్‍లోనే ఈ మైల్‍స్టోన్ దాటి హిట్ 3 చిత్రం సత్తాచాటింది.

నానికి వరుసగా నాలుగో హిట్

నాని వరుసగా నాలుగో సూపర్ హిట్ కొట్టేశారు. దసరా, హాయ్ నాన్న, సరిపోదా శనివారం చిత్రాలు బ్లాక్‍బస్టర్ కాగా.. ఇప్పుడు హిట్ 3 కూడా దుమ్మురేపుతోంది. నానికి ఇది మూడో రూ.100కోట్ల చిత్రంగా నిలిచింది. ఈ మూవీ ఇదే జోరు కొనసాగిస్తే ఫుల్ రన్‍లో రూ.200కోట్ల మైల్‍స్టోన్ కూడా సాధ్యమయ్యే అవకాశాలు ఉన్నాయి. అదే జరిగితే నానికి ఆ మార్క్ ఫస్ట్ టైమ్ కానుంది. అయితే, సోమవారం ట్రెండ్‍ను బట్టి కలెక్షన్లు ఎలా సాగుతాయో తేలనుంది.

అక్కడ లాభాల్లోకి..

హిట్ 3 సినిమా ఇప్పటికే కొన్ని చోట్ల లాభాల్లోకి వచ్చేసింది. చాలా చోట్ల బ్రేక్ ఈవెన్ అయింది. నైజాం, ఓవర్సీస్‍లో ఇప్పటికే ఈ మూవీ ప్రాఫిట్ జోన్‍లోకి అడుగుపెట్టినట్టు తెలుస్తోంది. వైజాగ్‍ సహా మరిన్ని చోట్ల బ్రేక్ఈవెన్ అయింది. మరొక్క రోజులో మరిన్ని ప్రాంతాల్లో ఈ చిత్రం బయ్యర్లు లాభాల్లోకి వచ్చేస్తారు. ఫుల్ రన్‍లో హిట్ 3 పూర్తిస్థాయి ప్రాఫిట్ మూవీగా అవడం ఖాయంగా కనిపిస్తోంది. వేసవిలో టాలీవుడ్‍లో ఎట్టకేలకు ఈ మూవీ సాలిడ్ హిట్ ఇచ్చింది.

హిట్ 3 సినిమాలో అర్జున్ సర్కార్ పాత్రలో నాని దుమ్మురేపారు. వైలెంట్ యాక్షన్‍తో అదరగొట్టారు. ఈ చిత్రంలో అతడికి జోడీగా శ్రీనిధి శెట్టి నటించారు. రావు రమేశ్, కోమలీ ప్రసాద్, రవీంద్ర విజయ్, ప్రతీక్ బబ్బర్ కీలకపాత్రలు పోషించారు. హిట్ 3 సినిమాను నానినే నిర్మించారు. ఈ మూవీ చివర్లో తమిళ స్టార్ హీరో కార్తి క్యామియో రోల్‍లో కనిపించారు. హిట్ 4లో ఆయనే హీరోగా నటించనున్నారు.