Hit 2 Movie Review: హిట్ -2 మూవీ రివ్యూ - అడివి శేష్‌కు హిట్ ద‌క్కిందా

Hit 2 Movie Review: అడివి శేష్ హీరోగా న‌టించిన హిట్ -2పై భారీ బ‌డ్జెట్ సినిమా స్థాయిలో హైప్ ఏర్ప‌డింది. క్రైమ్ ఇన్వెస్టిగేటివ్ థ్రిల్ల‌ర్‌గా తెర‌కెక్కిన ఈ సినిమాకు శైలేష్ కొల‌ను ద‌ర్శ‌క‌త్వం వ‌హించాడు. ప్ర‌శాంతి తిపిరినేనితో క‌లిసి హీరో నాని ఈ సినిమాను నిర్మించాడు. హిట్ చిత్రానికి సీక్వెల్‌గా తెర‌కెక్కిన ఈ సినిమా డిసెంబ‌ర్ 2న (నేడు) థియేట‌ర్ల ద్వారా ప్రేక్ష‌కుల ముందుకొచ్చింది. హిట్ మ్యాజిక్‌ను ఈ సినిమాతో శైలేష్ కొల‌ను రిపీట్ చేశాడా? హ్యాట్రిక్ విజ‌యాల‌తో జోరుమీదున్న అడివి శేష్‌కు హిట్‌-2తో మ‌రో స‌క్సెస్ ద‌క్కిందా లేదా అన్న‌దే ఈ సినిమా క‌థ‌.

కృష్ణ దేవ్ ఇన్వెస్టిగేష‌న్‌…

కేడీ అలియాస్ కృష్ణ‌దేవ్ (అడివిశేష్‌) హోమీసైడ్ డిపార్ట్‌మెంట్‌లో ఎస్‌పీగా ప‌నిచేస్తుంటాడు. త‌న తెలివితేట‌ల‌తో ఓ మ‌ర్డ‌ర్ కేసు సాల్వ్ చేస్తాడు. ఆ కాన్ఫిడెన్స్‌తోనే క్రిమిన‌ల్స్‌ను ప‌ట్టుకోవ‌డం ఈజీ అనే భ్ర‌మ‌లో ఉంటాడు. అలాంటి కృష్ణ దేవ్‌కు సీరియ‌ల్ కిల్ల‌ర్ స‌వాల్‌గా మార‌తాడు. సంజ‌న అనే అమ్మాయిని హ‌త్య చేసి ఆమె శ‌రీరా భాగాల‌ను వేరుచేస్తాడు. ఫోరెన్సిక్ ప‌రీక్ష‌లో ఆ బాడీ పార్ట్స్ వేర్వేరు అమ్మాయిల‌వి అనే నిజం తెలుస్తుంది. ఆ హంత‌కుడు ఎవ‌రు? అమ్మాయిల‌ను అత‌డు చంప‌డానికి కార‌ణం ఏమిటి? అత‌డినికృష్ణ‌దేవ్‌ ఎలా ప‌ట్టుకున్నాడు. కిల్ల‌ర్ బారి నుంచి త‌న ప్రియురాలు (ఆర్య‌)ను కేడీ ఎలా కాపాడుకున్నాడు అన్న‌దే ఈ సినిమా క‌థ‌.

క్రైమ్ థ్రిల్లర్…

క్రైమ్ ఇన్వెస్టిగేటివ్ థ్రిల్ల‌ర్‌గా ద‌ర్శ‌కుడు శైలేష్ కొల‌ను హిట్ -2 సినిమాను తెర‌కెక్కించాడు. క‌థ కంటే క‌థ‌నంలో మ్యాజిక్ చేస్తూ ప్రేక్ష‌కుల్ని ఆక‌ట్టుకునే ప్ర‌య‌త్నం చేశారు. ఓ సైకో... మ‌హిళ‌ల‌పై ప‌గ‌ను పెంచుకోవ‌డానికి అత‌డికో రీజ‌న్‌, ఆ సైకోను ప‌ట్టుకునే పోలీస్ ఆఫీస‌ర్ ఈ జోన‌ర్ సినిమాల‌న్నీ ఒకే ఫార్మెట్‌లో రూపొందుతుంటాయి. హిట్‌-2 కూడా అదే కోవ‌లో సాగుతుంది. రొటీన్ క‌థ‌ను డిఫ‌రెంట్‌గా ద‌ర్శ‌కుడు శైలేష్ కొల‌ను స్క్రీన్‌పై ప్ర‌జెంట్ చేశాడు. క్లైమాక్స్ వ‌ర‌కు సైకో కిల్ల‌ర్ ఎవ‌ర‌నేది రివీల్ కాకుండా థ్రిల్లింగ్‌గా సినిమాను న‌డిపిన విధానం ఆక‌ట్టుకుంటుంది.

రొటీన్‌కు భిన్నంగా...

హీరోహీరోయిన్ల‌ను ప‌రిచ‌యం, ప్రేమ‌క‌థ‌ల‌తో టైమ్ పాస్ చేస్తూ ఆ త‌ర్వాతే అస‌లు క‌థ‌ను మొద‌లుపెట్ట‌డం లాంటి రెగ్యుల‌ర్ ఫార్మెట్‌ను ఫాలో కాలేదు. సింపుల్‌గా ఒకే పాట‌తో ఆ సీన్స్ మొత్తం తేల్చేసి డైరెక్ట్‌గా క‌థ‌ను మొద‌లుపెట్టాడు ద‌ర్శ‌కుడు. సంజ‌న మ‌ర్డ‌ర్‌తో సినిమా స్పీడ్ అందుకుంటుంది. సీరియ‌ల్ కిల్ల‌ర్‌ను ప‌ట్టుకోవ‌డానికి కృష్ణ‌దేవ్ చేసిన ప్ర‌య‌త్నాలు ఇంట్రెస్ట్ ను క్రియేట్ చేస్తాయి ఈ క్ర‌మంలో ఓ అమాయ‌కుడిని కిల్ల‌ర్‌గా పొర‌ప‌డి అత‌డి చావుకు కృష్ణ‌దేవ్ కార‌ణం కావ‌డం లాంటి సీన్స్ థ్రిల్లింగ్‌గా మ‌లిచారు. ఆ సైకో కిల్ల‌ర్ బారి నుంచి తాను ప్రేమించిన ఆర్య‌ను కేడీ ఎలా కాపాడుకున్నాడ‌నే పాయింట్‌తో క్లైమాక్స్ రొటీన్‌గా ముగుస్తుంది. సైకో కిల్ల‌ర్ ఫ్లాష్‌బ్యాక్‌లో కొత్త‌ద‌నం లేదు.

పోలీస్ రోల్‌కు యాప్ట్‌...

కృష్ణ‌దేవ్ అనే పోలీస్ ఆఫీస‌ర్ పాత్ర‌కు ప‌ర్‌ఫెక్ట్ యాప్ట్‌గా అడివిశేష్ నిలిచాడు. త‌న బాడీలాంగ్వేజ్‌, డైలాగ్ డెలివ‌రీతో ఆక‌ట్టుకున్నాడు. పాత్ర‌కు త‌గ్గ‌ట్టుగా చ‌క్క‌టి ఎమోష‌న్స్ ప‌లికించాడు. హీరో ప్రియురాలిగా మీనాక్షి చౌద‌రి క‌నిపించింది. క్లైమాక్స్ సీన్ మిన‌హా యాక్టింగ్ టాలెంట్ చూపించ‌డానికి పెద్ద‌గా అవ‌కాశం రాలేదు. కోమ‌లీ ప్ర‌సాద్‌, రావుర‌మేష్‌, మాగంటి శ్రీనాథ్ క్యారెక్ట‌ర్స్ ప‌ర్వాలేద‌నిపిస్తాయి.

Hit 2 Movie Review- కొత్త‌ద‌నం మిస్‌...

డీసెంట్ ఇన్వెస్టిగేటివ్ క్రైమ్ థ్రిల్ల‌ర్‌గా హిట్ -2 ప్రేక్ష‌కుల్ని ఆక‌ట్టుకుంటుంది. కొత్త‌ద‌నాన్ని ఆశిస్తే మాత్రం నిరాశ‌త‌ప్ప‌దు. క్రైమ్ జోన‌ర్ సినిమాల్ని ఇష్ట‌ప‌డేవారిని ఈ సినిమా మెప్పిస్తుంది.

రేటింగ్ : 2.5/5