OTT Thriller movies: ఈ వారమే డైరెక్ట్‌గా ఓటీటీలోకి రానున్న రెండు హిందీ థ్రిల్లర్ సినిమాలు.. ఎక్కడ చూడొచ్చంటే..
Hindi Thriller movies OTT: ఈ వారం ఓటీటీల్లోకి రెండు హిందీ థ్రిల్లర్ సినిమాలు నేరుగా అడుగుపెడుతున్నాయి. థియేటర్లలో రిలీజ్ కాకుండా డైరెక్ట్ స్ట్రీమింగ్‍కు వచ్చేస్తున్నాయి. ఆ సినిమాల వివరాలు.. స్ట్రీమింగ్ ఎక్కడో ఇక్కడ తెలుసుకోండి.
ఓటీటీ ప్లాట్‍ఫామ్‍ల్లో థ్రిల్లర్ జానర్ చిత్రాలకు చాలా క్రేజ్ ఉంటుంది. అందుకే ఇటీవలి కాలంలో ఓటీటీ కోసమే ప్రత్యేకంగా కొన్ని థిల్లర్ సినిమాలను మేకర్స్ రూపొందిస్తున్నారు. వీటిలో అధిక శాతం మంచి రెస్పాన్స్ తెచ్చుకున్నాయి. ఇప్పుడు ఈ వారం రెండు హిందీ థ్రిల్లర్ సినిమాలు డైరెక్ట్‌గా ఓటీటీల్లోకి అడుగుపెడుతున్నాయి. సెక్టార్ 36, బెర్లిన్ చిత్రాలు థియేటర్లలో రాకుండా నేరుగా ఓటీటీలోకి వచ్చేస్తున్నాయి. ఆ వివరాలివే..
సెక్టార్ 36
క్రైమ్ థ్రిల్లర్ సినిమా ‘సెక్టార్ 36’ ఈ శుక్రవారం (సెప్టెంబర్ 13) నెట్‍ఫ్లిక్స్ ఓటీటీ ప్లాట్‍ఫామ్‍లో స్ట్రీమింగ్‍కు రానుంది. ఈ చిత్రంలో 12th ఫెయిల్ ఫేమ్ విక్రాంత్ మాసే లీడ్ రోల్ చేశారు. వరుసగా పిల్లల కిడ్నాప్‍లు అవుతుండగా.. ఈ పోలీస్ ఆఫీసర్ ఈ కేసులను విచారించడం చుట్టూ ఈ చిత్రం సాగుతుంది.
సెక్టార్ 36 చిత్రానికి ఆదిత్య నంబల్‍కర్ దర్శకత్వం వహించారు. విక్రాంత్‍తో పాటు దీపక్ బోదిరియాల్, ఆకాశ్ ఖురానా, దర్శన్ జరివాలా కీలకపాత్రలు పోషించారు. ఈ మూవీ ట్రైలర్ ఆకట్టుకోవటంతో క్యూరియాసిటీ నెలకొంది.
సెక్టార్ 36 చిత్రాన్ని మాడ్‍డాక్ ఫిల్మ్స్, జియోస్టూడియోస్ పతాకాలపై దినేశ్ విజియన్, జ్యోతి దేశ్‍పాడే నిర్మించారు. ఐదుగురు మ్యూజిక్ డైరెక్టర్లు ఈ చిత్రానికి పని చేశారు. సెప్టెంబర్ 13 నుంచి నెట్‍ఫ్లిక్స్ ఓటీటీలో సెక్టార్ 36 మూవీ చూడొచ్చు. హిందీతో పాటు తెలుగు, మరో మూడు భాషల్లోనూ ఈ చిత్రం స్ట్రీమింగ్‍కు రానుందని తెలుస్తోంది.
బెర్లిన్
అపర్‌శక్తి ఖురానా ప్రధాన పాత్ర పోషించిన బెర్లిన్ సినిమా సెప్టెంబర్ 13వ తేదీన జీ5 ఓటీటీలో స్ట్రీమింగ్‍కు రానుంది. ఈ స్పై యాక్షన్ మూవీకి అతుల్ సబర్వాల్ దర్శకత్వం వహించారు. బధిరుడైన ఓ యువకుడిని విదేశీ గూఢచారి అని ఓ ఇంటెలిజెన్స్ ఏజెన్సీ అదుపులోకి తీసుకొని విచారించడం చుట్టూ ఈ మూవీ స్టోరీ ఉంటుంది. అయితే, అతడిని ఇన్వెస్టిగేట్ చేసేందుకు ఓ సైన్ లాంగ్వేజ్ నిపుణుడిని తీసుకురావటంతో ఓ ట్విస్ట్ ఉంటుందని ట్రైలర్ ద్వారా తెలిసింది.
బెర్లిన్ చిత్రంలో ఖురానాతో పాటు ఇష్వాక్ సింగ్, రాహుల్ బోస్, అనుప్రియ గోయెంక, కబీర్ బేడీ కీరోల్స్ చేశారు. ఈ మూవీని జీ స్టూడియోస్, యిప్పీ కీ యాయ్ మోషన్ పిక్చర్స్ బ్యానర్లపై మానవ్ శ్రీవాత్సవ్, ఉమేశ్ భన్సాల్ నిర్మించారు. 2023లోనే ఇండియన్ ఫిల్మ్ ఫెస్టివల్ ఆఫ్ లాస్‍ఏంజిల్స్‌, జియో మామీ ముంబై ఫిల్మ్ ఫెస్టివల్‍లో ఈ మూవీ ప్రదర్శన జరిగింది. ఇప్పుడు నేరుగా బెర్లిన్ చిత్రం జీ5 ఓటీటీటో సెప్టెంబర్ 13న అడుగుపెట్టనుంది.
నెట్‍ఫ్లిక్స్‌లో ఈ వారం రెండు తెలుగు చిత్రాలు
నెట్‍ఫ్లిక్స్ ఓటీటీ ప్లాట్‍ఫామ్‍లో ఈ వారం తెలుగు సినిమాలు మిస్టర్ బచ్చన్, ఆయ్ చిత్రాలు స్ట్రీమింగ్‍కు రానున్నాయి. ఈ రెండు సినిమాలు రేపు (సెప్టెంబర్ 12) స్ట్రీమింగ్‍కు వస్తాయి. రవితేజ హీరోగా నటించిన మిస్టర్ బచ్చన్ థియేటర్లలో డిజాస్టర్ అవగా.. తక్కువ బడ్జెట్‍తో వచ్చి బ్లాక్‍బస్టర్ కొట్టింది ఆయ్. ఈ చిత్రాలు థియేటర్లలో ఆగస్టు 15న రిలీజ్ అయ్యాయి. ఇప్పుడు నెట్‍ఫ్లిక్స్ ఓటీటీలోనూ సెప్టెంబర్ 12న ఒకే రోజు స్ట్రీమింగ్‍కు రానున్నాయి.