Amaran Movie: అమరన్ మూవీ మ్యూజిక్ డైరెక్టర్‌కి గిఫ్ట్ ఇచ్చిన శివ కార్తికేయన్.. ఫార్ములా-1 బ్రాండ్‌

దీపావళి రోజున విడుదలై సూపర్ హిట్‌గా నిలిచిన అమరన్ మూవీ మరో వారం రోజులు థియేటర్లలో జోరు కొనసాగించే అవకాశం కనిపిస్తోంది. శివ కార్తికేయన్, సాయి పల్లవి జంటగా నటించిన ఈ సినిమా అక్టోబరు 31న విడుదలై రూ.200 క్లబ్‌‌కి చేరువగా ఉంది. తమిళ్‌లోనే కాదు తెలుగు రాష్ట్రాల్లోనూ అమరన్ మూవీ పాజిటివ్‌ మౌత్ టాక్‌తో థియేటర్లలో సందడి చేస్తోంది.

రాజ్‌కుమార్ పెరియాసామి దర్శకత్వం వహించిన ఈ సినిమాకి జీవీ ప్రకాశ్ కుమార్‌ మ్యూజిక్ అందించాడు. సినిమాలో యాక్షన్ సీన్స్‌తో పాటు ఎమోషన్ సీన్లకీ మ్యూజిక్‌ అదనపు బలాన్ని జోడించింది. దాంతో జీవీ ప్రకాశ్ కుమార్‌కి ఒక ఖరీదైన బహుమతిని అమరన్ హీరో శివ కార్తికేయన్ ఇచ్చాడట. ఈ మేరకు సోషల్ మీడియాలో జీవీ ప్రకాశ్ కుమార్‌ ఒక పోస్ట్ పెట్టాడు.

కాస్లీ బ్రాండెడ్ వాచీ

టీఏజీ హ్యూయర్ మెన్స్ ఫార్ములా- 1 బ్రాండ్‌ స్టెయిన్ లెస్ స్టీల్ స్టైలిష్ వాచ్‌ను తనకి శివ కార్తికేయన్ గిఫ్ట్‌గా ఇచ్చినట్లు జీవీ ప్రకాశ్ కుమార్‌ ఒక ఫొటో పెట్టాడు. ఈ వాచీ ధర సుమారు రూ.3 లక్షల వరకు ఉంటుందని నెటిజన్లు అంచనా వేస్తున్నారు

మేజర్ బయోపిక్

దివంగత మేజర్ ముకుంద్ వరదరాజన్ బయోపిక్‌గా ఈ అమరన్ మూవీ తెరకెక్కింది. సీనియర్ నటులు కమల్ హాసన్ తన రాజ్ కమల్ బ్యానర్‌పై సోనీ పిక్చర్స్‌తో కలిసి సంయుక్తంగా ఈ సినిమాని నిర్మించాడు. తెలుగు, తమిళ్ ప్రేక్షకులు ఈ అమరన్ మూవీని ఆదరిస్తున్నారు. కానీ.. కన్నడ, మలయాళంలో మాత్రం ఈ సినిమాకి ఆశించిన మేర ఆదరణ దక్కలేదు. సాయి పల్లవి ఉన్నా.. మలయాళంలో నామమాత్రపు కలెక్షన్లతో ఈ సినిమా సరిపెడుతోంది.

ఓటీటీలోకి అమరన్

అమరన్ మూవీ నవంబరు చివర్లోనే ఓటీటీలోకి వచ్చే అవకాశం ఉందని వార్తలు వస్తున్నాయి. భారీ ధరకి ఈ సినిమా ఓటీటీ హక్కుల్ని నెట్‌ప్లిక్స్‌ కొనుగోలు చేసినట్లు తెలుస్తోంది. అయితే ప్రస్తుతం థియేటర్లలో పెద్ద సినిమాలు ఏమీ లేకపోవడంతో మరికొన్ని రోజులు అమరన్ కొనసాగే సూచనలు కనిపిస్తున్నాయి. దాంతో ఒక వారం పాటు ఆలస్యమైనా ఆశ్చర్యపోలేం.