Salaar: పంద్రాగస్టు నాడు ప్రభాస్ ఫ్యాన్స్‌కు పండగ లాంటి వార్త.. సలార్ అప్డేట్
ప్రభాస్ నటిస్తోన్న సలార్ సినిమాకు సంబంధించిన అప్డేట్‌పై చిత్రబృందం క్లారిటీ ఇచ్చింది. ఆగస్టు 15న సలార్‌కు సంబంధించిన అప్డేట్ ఇవ్వనున్నట్లు ట్విటర్ వేదికగా స్పష్టం చేసింది. ఈ సినిమాలో డార్లింగ్ సరసన శృతిహాసన్ నటిస్తోంది.
బాహుబలితో తన క్రేజ్ పాన్ఇండియా స్థాయిలో పెంచుకున్న ప్రభాస్‌కు.. ఆ తర్వాత రెండు పరాజయాలు రావడంతో ఆయన అభిమానులు నిరాశకు లోనయ్యారు. సాహో, రాధే శ్యామ్ అనుకున్న స్థాయిలో ఆకట్టుకోనప్పటికీ వసూళ్ల పరంగా ఫర్వాలేదనిపించాయి. తాజాగా మన రెబల్ స్టార్ ప్రభాస్ ఆదిపురుష్, సలార్ సినిమాలతో బిజీగా ఉన్నారు. ఇందులోనూ కేజీఎఫ్ ఫేమ్ ప్రశాంత్ నీల్ తెరకెక్కిస్తున్న సలార్‌పై ఫ్యాన్స్ భారీగానే ఆశలు పెట్టుకున్నారు. ఈ సినిమా నుంచి ఏదైనా ఆప్డేట్ వస్తుందేమోనని ఆత్రుతగా ఎదురుచూస్తున్నారు. ఎట్టకేలకు ఈ సినిమాకు సంబంధించిన అప్డేట్‌ను ప్రకటించనున్నారు మేకర్స్.
75వ స్వాతంత్ర్య దినోత్సవాన్ని పురస్కరించుకుని ఆగస్టు 15న సలార్ సినిమాకు సంబంధించి సరికొత్త అప్డేట్ ఇవ్వనున్నట్లు చిత్రబృందం స్పష్టం చేసింది. అది ఏంటనేది చెప్పకుండా.. ప్రభాస్ అభిమానులకు సర్‌ప్రైజ్ ఇవ్వనుంది. ఆగస్టు 15 మధ్యాహ్నం 12.58 గంటలకు సలార్ సినిమాకు సంబంధించిన అప్డేట్ రానుంది.
ఇప్పటికే ఈ సినిమాలో హీరో ప్రభాస్ లుక్‌తో పాటు హీరోయిన్ శృతిహాసన్ లుక్‌ను కూడా విడుదల చేశారు మేకర్స్. దీంతో సినిమాపై భారీ అంచనాలు పెరిగాయి. అంతేకాకుండా కేజీఎఫ్ తర్వాత ప్రశాంత్ నీల్ తెరకెక్కించడం, పాన్ఇండియా స్టార్‌డమ్ కలిగిన ప్రభాస్‌తో సినిమా కావడంతో అభిమానుల్లో అంచనాలు భారీగా పెరిగాయి.
యాక్షన్ థ్రిల్లర్‌గా తెరకెక్కుతున్న సలార్ చిత్రంలో ప్రభాస్ టైటిల్ క్యారెక్టర్‌లో నటిస్తున్నాడు. శృతిహాసన్ హీరోయిన్‌గా చేస్తోంది. మలయాళ సూపర్‌స్టార్ పృథ్వీరాజ్ సుకుమారన్ ప్రతినాయకుడిగా నటించనున్నారు. ఇప్పటికే మూడు భారీ షెడ్యూల్స్ పూర్తి చేసుకున్న ఈ సినిమా గనుల నేపథ్యంలో తెరకెక్కున్నట్లు తెలుస్తోంది. ప్రశాంత్ నీల్ దర్శకత్వం వహిస్తున్నారు. తెలుగుతో పాటు హిందీ, తమిళం, కన్నడ, మలయాళ భాషల్లో ఈ చిత్రం వచ్చే విడుదలయ్యే అవకాశముంది.
సంబంధిత కథనం
టాపిక్