Game Changer Collection: ఒక్కరోజులో 52 శాతం పడిపోయిన గేమ్ ఛేంజర్ కలెక్షన్స్.. బ్రేక్ ఈవెన్ టార్గెట్ కష్టమే!

Game Changer 4 Days Worldwide Collection: రామ్ చరణ్, కియారా అద్వానీ జంటగా.. డైరెక్టర్ శంకర్ దర్శకత్వంలో తెరకెక్కిన గేమ్ ఛేంజర్ సినిమా జనవరి 10న సంక్రాంతి కానుకగా రిలీజ్ అయి మిక్స్‌డ్ టాక్ తెచ్చుకుంటోంది. ఈ భారం కలెక్షన్స్‌పై పడుతోంది. మొదటి రోజు వరల్డ్ వైడ్‌గా రూ. 186 కోట్ల గ్రాస్ వచ్చినట్లు మేకర్స్ తెలిపారు.

52.14 శాతం పడిపోయిన కలెక్షన్స్

అయితే, ట్రేడ్ వెబ్‌సైట్స్ చూపించే లెక్కలు మాత్రం వేరేలా ఉన్నాయి. ఈ నేపథ్యంలో గేమ్ ఛేంజర్ సినిమాకు ఇండియాలో నాలుగో రోజు రూ. 8.50 కోట్ల నెట్ కలెక్షన్స్ వచ్చినట్లుగా సక్నిల్క్ సంస్థ తెలిపింది. అయితే, మూడో రోజు వచ్చిన రూ. 15.9 నెట్ కలెక్షన్స్‌తో పోలిస్తే నాలుగో రోజు దాదాపుగా 52.14 శాతం వసూళ్లు పడిపోయినట్లు బాలీవుడ్ వెబ్ మింట్ రాసుకొచ్చింది.

గేమ్ ఛేంజర్ 4 డేస్ నెట్ కలెక్షన్స్

ఇక నాలుగు రోజుల్లో ఇండియన్ బాక్సాఫీస్ వద్ద గేమ్ ఛేంజర్ మూవీ రూ. 97 కోట్ల నెట్ కలెక్షన్స్ రాబట్టినట్లు సక్నిల్క్ వెబ్‌సైట్ పేర్కొంది. ఇక వరల్డ్ వైడ్‌గా ఈ సినిమాకు 4 డేస్‌లో రూ. 130.7 కోట్లు వచ్చినట్లుగా హిందీ సైట్స్ చెబుతున్నాయి. ఇది మేకర్స్ ప్రకటించిన రూ. 186 కోట్ల కంటే తక్కువ అని పేర్కొన్నాయి.

థియేటర్ ఆక్యుపెన్సీ

అలాగే, జనవరి 13న గేమ్ ఛేంజర్ సినిమా తెలుగు వెర్షన్‌లో ఉదయం 12.70 శాతం, మధ్యాహ్నాం వచ్చేసరికి 21.60 శాతం, సాయంత్రానికి 25.07 శాతం థియేటర్ ఆక్యుపెన్సీ నమోదు అయింది. ఇదిలా ఉంటే, రెండు రోజుల్లో గేమ్ ఛేంజర్‌కు రూ. 276 కోట్ల గ్రాస్ వచ్చినట్లుగా మేకర్స్ తెలపడం వైరల్‌గా మారింది.

బ్రేక్ ఈవెన్ టార్గెట్

సినిమాకు వచ్చిన మిశ్రమ స్పందన, పైరసీ సమస్యలతో కలెక్షన్స్ భారీగా తగ్గుతున్నట్లు తెలుస్తోంది. మరి ఇలాగే కంటిన్యూ అయితే బ్రేక్ ఈవెన్ టార్గెట్ అయిన రూ. 223 కోట్లను చేరుకోవడం కష్టమనే చెప్పాలి. ఇక గేమ్ ఛేంజర్ హిట్ కావాలంటే ఇంకా రూ. 135 కోట్లకుపైగా కలెక్షన్స్ రాబట్టాలి. మరి ఈ కలెక్షన్స్‌తో హిట్ టార్గెట్ ఎప్పుడు పూర్తి చేస్తుందో చూడాలి.

సాంగ్ యాడ్

సౌత్ స్టార్ డైరెక్టర్ శంకర్-గ్లోబల్ స్టార్ రామ్ చరణ్ కాంబినేషన్‌లో వచ్చిన గేమ్ ఛేంజర్ సినిమాలో కియారా అద్వానీతోపాటు అంజలి, శ్రీకాంత్, ఎస్‌జే సూర్య, సునీల్, వెన్నెల కిశోర్, బ్రహ్మానందం తదితరులు ఇతర పాత్రల్లో నటించారు. మూవీకి ఎస్ తమన్ సంగీతం అందించాడు. జనవరి 12 నుంచి థియేటర్లలో నానా హైరానా పాటను యాడ్ చేసిన విషయం తెలిసిందే.