Gadar 2 OTT Release Date: గదర్ 2 ఓటీటీ రిలీజ్ డేట్ ఇదే.. చాలా ముందుగానే వచ్చేస్తోంది

Gadar 2 OTT Release Date: గదర్ 2 మూవీ ఈ ఏడాది బాక్సాఫీస్ దగ్గర ఎన్ని సంచలనాలు సృష్టించిందో మనకు తెలుసు. ఇప్పుడీ సినిమా ఓటీటీ రిలీజ్ కు సిద్ధమైంది. స్వాతంత్ర్య దినోత్సవం సందర్భంగా ఆగస్ట్ 11న గదర్ 2 మూవీ రిలీజైన విషయం తెలిసిందే. తొలి రోజు సినిమాకు మిశ్రమ స్పందన వచ్చినా.. కలెక్షన్ల విషయంలో మాత్రం దుమ్ము రేపింది.

గదర్ 2 ప్రపంచవ్యాప్తంగా రూ.550 కోట్లు వసూలు చేసి ఆశ్చర్యానికి గురి చేసింది. థియేటర్లలో ఈ సినిమాను చూడలేకపోయిన అభిమానులకు జీ5 (zee5) ఓటీటీ ఓ గుడ్ న్యూస్ చెప్పిది. అక్టోబర్ 6 నుంచి ఈ సినిమా తమ ఓటీటీలో స్ట్రీమింగ్ కానున్నట్లు వెల్లడించింది. నిజానికి ఆరు నెలల తర్వాతే ఈ సినిమా ఓటీటీలోకి వస్తుందని మేకర్స్ రిలీజ్ సమయంలో వెల్లడించారు.

కానీ రెండు నెలలలోపే గదర్ 2ను జీ5 ఓటీటీ స్ట్రీమ్ చేస్తోంది. అనిల్ శర్మ డైరెక్ట్ చేసిన ఈ సినిమా ప్రేక్షకులను చాలా ఆకట్టుకుంది. 22 ఏళ్ల కిందట అంటే 2001లో వచ్చిన గదర్ మూవీ ఏ స్థాయిలో విజయం సాధించిందో గదర్ 2 అంతకంటే ఎక్కువే పాజిటివ్ టాక్ సొంతం చేసుకుంది. తారా సింగ్ (సన్నీ డియోల్), సకీనా (అమీషా పటేల్) లవ్ స్టోరీ గదర్ లో ప్రేక్షకుల మనసును తాకింది.

ఆ సినిమా 1947లో దేశ విభజన నేపథ్యంలో తెరకెక్కగా.. తాజాగా గదర్ 2 మూవీ 1971లో ఇండియా, పాకిస్థాన్ మధ్య జరిగిన యుద్ధ నేపథ్యంలో తీశారు. ఈసారి తన కుటుంబం, తన దేశం కోసం తారా సింగ్ శత్రువులతో పోరాడటం ఈ మూవీలో చూడొచ్చు. గదర్ ను డైరెక్ట్ చేసిన అనిల్ శర్మే ఈ గదర్ 2ను కూడా డైరెక్ట్ చేశాడు.

ఆగస్ట్ 11న రిలీజైన ఈ మూవీ.. టాప్ 10 అత్యధిక వసూళ్లు సాధించిన హిందీ సినిమాల్లో ఒకటిగా నిలిచింది. ప్రపంచవ్యాప్తంగా ఏకంగా రూ.550 కోట్లు వసూలు చేయడం విశేషం. గదర్ 2 సూపర్ డూపర్ హిట్ అవడంతో గదర్ 3 కూడా రాబోతున్నట్లు వార్తలు వస్తున్నాయి. సన్నీ డియోల్ కూడా ఈ విషయాన్ని ధృవీకరించినా.. ఎప్పటి నుంచి మొదలవుతుందన్నది మాత్రం చెప్పలేదు. ఇక గదర్ మూవీ కూడా జీ5 ఓటీటీలోనే 4కే క్వాలిటీలో స్ట్రీమ్ అవుతుండటం విశేషం.