Erracheera: హీరో అయుండి ప్రమోషన్‌కి రావట్లేదు.. ఫ్యామిలీ ప్యాక్ బిర్యానీ తిన్నవాళ్లకు 10 వేలు: డైరెక్టర్ సుమన్ బాబు

Erracheera The Beginning Trailer Released: నటుడు రాజేంద్ర ప్రసాద్ మనవరాలు బేబి సాయి తేజస్విని నటిస్తున్న హారర్ సస్పెన్స్ థ్రిల్లర్ సినిమా ఎర్రచీర ది బిగినింగ్. బేబి డమరి సమర్పణలో శ్రీ పద్మాయల ఎంటర్టైన్మెంట్స్, శ్రీ సుమన్ వెంకటాద్రి ప్రొడక్షన్స్ సంయుక్తంగా నిర్మిస్తున్న ఈ సినిమాకు సుమన్ బాబు స్వీయ దర్శకత్వం వహిస్తున్నారు.

ఎర్రచీర ది బిగినింగ్ ట్రైలర్

మదర్ సెంటిమెంట్, హారర్, యాక్షన్ కథతో తెరకెక్కిన ఎర్రచీర సినిమా ఈ నెల 27న గ్రాండ్ థియేట్రికల్ రిలీజ్ కానుంది. ఈ నేపథ్యంలో శనివారం (డిసెంబర్ 7) ఉదయం ఎర్రచీర ది బిగినింగ్ ట్రైలర్‌ను హైదరాబాద్ ప్రసాద్ ల్యాబ్స్‌లో రిలీజ్ చేశారు. ఈ సంర్భంగా ఘనంగా నిర్వహించిన ప్రముఖ నిర్మాత సి. కల్యాణ్ ముఖ్య అతిథిగా పాల్గొన్నారు.

ఈ కార్యక్రమంలో నిర్మాత సి.కల్యాణ్ మాట్లాడుతూ.. "ఎర్రచీర ది బిగినింగ్ సినిమా ట్రైలర్ బాగుంది. మా సుమన్ ఈ మూవీని పట్టుదలతో పూర్తి చేసి రిలీజ్‌కు తీసుకొస్తున్నాడు. సెంటిమెంట్ ఉన్న హారర్ సినిమాలు తప్పకుండా సక్సెస్ అవుతాయి. అలాంటి మంచి కంటెంట్ ఈ సినిమాలో కనిపిస్తోంది. సినిమా పెద్ద విజయం సాధించాలని కోరుకుంటున్నా. సుమన్ బాబు బరువు తగ్గి మరిన్ని మంచి మూవీస్ చేయాలని కోరుకుంటున్నాను" అని అన్నారు.

తప్పకుండా ఇష్టపడతారు

నటి సంజన శెట్టి మాట్లాడుతూ.. "ఎర్రచీర ది బిగినింగ్ సినిమాలో మంచి రోల్ చేసే అవకాశం ఇచ్చిన డైరెక్టర్ ప్రొడ్యూసర్ హీరో సుమన్ బాబు గారికి థ్యాంక్స్. మా మూవీని తప్పకుండా మీరంతా ఇష్టపడతారు. ఈ నెల 27న థియేటర్స్‌లో చూసి సపోర్ట్ చేయండి" అని కోరారు.

"ఎర్రచీర ది బిగినింగ్ సినిమా ట్రైలర్ మీ అందరికీ నచ్చిందని ఆశిస్తున్నాను. నేను కూడా మీతో పాటు ట్రైలర్ చూశాను. నేను ట్రైలర్‌లో మిమ్మల్ని భయపెట్టానని అనుకుంటున్నా. సుమన్ గారు ఎంతో ఎఫర్ట్స్ పెట్టి ఈ మూవీ చేశారు. అది స్క్రీన్ మీద కనిపిస్తోంది. ఈ నెల 27న థియేటర్స్‌లోకి వస్తున్నాం. మీరంతా చూసి బ్లెస్ చేస్తారని కోరుకుంటున్నా" అని హీరోయిన్ కారుణ్య చౌదరి తెలిపారు.

వెంకటేష్ నుంచి

చిత్ర దర్శక నిర్మాత, నటుడు సుమన్ బాబు మాట్లాడుతూ.. "మా ఎర్రచీర ది బిగినింగ్ మూవీకి మొదటి నుంచి ఎంతోమంది పెద్దలు సపోర్ట్ చేస్తూ వస్తున్నారు. హీరో వెంకటేష్ గారి దగ్గర నుంచి ఈరోజు కల్యాణ్ అన్న వరకు మా మూవీకి సపోర్ట్ చేస్తున్నారు. వాళ్లందరికీ చాలా థ్యాంక్స్ చెబుతున్నా" అని అన్నారు.

"ఈ రోజు మీ అందరి సమక్షంలో ఈ మూవీ థియేట్రికల్ ట్రైలర్ రిలీజ్ చేసుకోవడం సంతోషంగా ఉంది. బేబి సాయి తేజస్వినీ మా చిత్రంలో అద్భుతంగా నటించింది. అలాగే కారుణ్య ఒక సీన్ కోసం 2 రోజులు పట్టుదలగా వర్క్ చేసింది" అని సుమన్ బాబు తెలిపారు.

ఫోన్ ఆన్సర్ చేయడం లేదు

"మా సినిమాకు చాలా మంది పెద్ద ఆర్టిస్టులు వర్క్ చేశారు వారంతా సపోర్ట్ చేస్తున్నారు. కానీ ఒక్క కమల్ కామరాజు అనే యాక్టర్ మాత్రం మా ఫోన్స్ ఆన్సర్ చేయడం లేదు. ఆయన ఈ మూవీలో ఒక హీరో అయి ఉండి కూడా మాకు ప్రమోషన్‌కు రావడం లేదు. ఎంతో కష్టపడి మాలాంటి వాళ్లం మూవీ చేస్తే కనీసం ప్రమోషన్‌కు రాకపోవడం బాధాకరం" అని డైరెక్టర్ సుమన్ బాబు ఆవేదన వ్యక్తం చేశారు.

"ఈ నెల 24న ప్రీ రిలీజ్ ఈవెంట్ చేయబోతున్నాం. 27న మూవీని రిలీజ్ చేస్తాం. ప్రేక్షకులకు మా మూవీ కోసం ఒక కాంటెస్ట్ పెడుతున్నాం. ఫ్యామిలీ ప్యాక్ బిర్యానీ 45 నిమిషాల్లో తిన్న ప్రేక్షకుడికి పది వేల రూపాయలు బహుమతి ఇస్తాం. దాదాపు 300 థియేటర్స్‌లో మా సినిమాను గ్రాండ్ థియేట్రికల్ రిలీజ్‌కు తీసుకొస్తున్నాం. మీరంతా ఆదరిస్తారని కోరుకుంటున్నా" సుమన్ బాబు ఆఫర్ ప్రకటించారు.