హీరోగా మారిన మరో కమెడియన్ ప్రవీణ్.. బకాసుర రెస్టారెంట్ ర్యాప్ సాంగ్ రిలీజ్.. ఐడియా బాగుందన్న డైరెక్టర్ అనిల్ రావిపూడి

టాలీవుడ్‌లో మరో కమెడియన్ హీరోగా మారాడు. తన నటనతో, డైలాగ్‌ డెలివరితో ప్రేక్షకుల్లో మంచి గుర్తింపు సంపాందించుకున్న క్యారెక్టర్‌ ఆర్టిస్ట్‌, కమెడియన్‌ ప్రవీణ్‌ ప్రధాన పాత్రలో హీరోగా రూపొందుతున్న చిత్రం 'బకాసుర రెస్టారెంట్‌'.

టైటిల్ రోల్‌లో వైవా హర్ష

బకాసుర రెస్టారెంట్ చిత్రంలో వైవా హర్ష టైటిల్‌ రోల్‌లో నటిస్తున్నారు. కృష్ణభగవాన్‌, షైనింగ్‌ ఫణి, కేజీఎఫ్‌ గరుడరామ్‌ ఇతర ముఖ్య పాత్రలో యాక్ట్‌ చేస్తున్నారు. ఎస్‌జే శివ దర్శకుడిగా పరిచయం కాబోతున్న ఈ చిత్రాన్ని ఎస్‌జే మూవీస్‌ పతాకంపై లక్ష్మయ్య ఆచారి, జనార్థన్‌ ఆచారి నిర్మిస్తున్నారు.

బకాసుర టైటిల్ ర్యాప్ సాంగ్

చిత్రీకరణ పూర్తిచేసుకున్న బకాసుర రెస్టారెంట్ విడుదలకు సిద్దమైంది. హంగర్‌ కామెడీ ఎంటర్‌టైనర్‌గా రూపొందుతున్న ఈ చిత్రంలోని బకాసుర టైటిల్‌ ర్యాప్‌ సాంగ్‌ను బ్లాక్‌ బస్టర్‌ మాస్‌ దర్శకుడు అనిల్‌ రావిపూడి విడుదల చేశారు. వికాస బడిస స్వరాలు సమాకూర్చిన ఈ పాటను ర్యాప్‌ సింగర్‌ రోల్‌ రైడా, వికాస బడిస ఆలపించారు.

చాలా కొత్తగా అనిపించింది

ఈ సందర్భంగా సంక్రాంతికి వస్తున్నాం డైరెక్టర్ అనిల్‌ రావిపూడి మాట్లాడుతూ.. "బకాసుర రెస్టారెంట్‌ టైటిల్‌తో పాటు ఈ పాట కూడా బాగుంది. చాలా కొత్తగా అనిపించింది. ఈ సినిమా ఐడియా బాగుంది" అని అన్నారు.

ప్రవీణ్ హీరోగా

"నటుడు ప్రవీణ్‌ నాకు మొదట్నుంచి తెలుసు. ప్రవీణ్‌ హీరోగా రాబోతున్న ఈ చిత్రం మంచి సక్సెస్‌ కావాలి. తొలి చిత్ర దర్శకుడు ఎస్‌జే శివతో పాటు అందరికి ఈ చిత్రం మంచి పేరును తీసుకురావాలి" అని డైరెక్టర్ అనిల్ రావిపూడి ఆకాంక్షించారు.

థ్రిల్లింగ్‌తోపాటు వినోదం

అలాగే, ఈ సందర్బంగా దర్శకుడు ఎస్‌జే శివ మాట్లాడుతూ.. "హంగర్‌ ఎంటర్‌టైనర్‌గా రూపొందుతున్న ఈ సినిమాలో ప్రతి సన్నివేశం ఆడియన్స్‌కు థ్రిల్లింగ్‌తో పాటు వినోదాన్ని కూడా పంచుతుంది. ఓ ఇన్నోవేటివ్‌ కాన్సెప్ట్‌తో రూపొందుతున్న ఈ చిత్రం తప్పకుండా అందర్ని అలరిస్తుందనే నమ్మకం ఉంది" అని అన్నారు.

త్వరలో బకాసుర రెస్టారెంట్ రిలీజ్ డేట్

"అతి త్వరలో బకాసుర రెస్టారెంట్ విడుదల తేదిని ప్రకటిస్తాం. అనిల్‌ రావిపూడి గారు మా సాంగ్‌ను విడుదల చేయడం సంతోషంగా ఉంది. తప్పకుండా ఈ చిత్రం అందరికి నచ్చుతుంది" అని నమ్మకంగా చెప్పారు దర్శకుడు ఎస్‌జే శివ.