Dhoom Dhaam Dhosthaan song: నాని మాస్‌ బీట్‌.. దసరా నుంచి ధూమ్‌ ధామ్‌ దోస్తాన్‌ సాంగ్

Dhoom Dhaam Dhosthaan song: టాలీవుడ్‌ నేచురల్‌ స్టార్‌ నాని అంటే సుందరానికి తర్వాత నటిస్తున్న మూవీ దసరా. ఇందులో ఓ కూలీగా కనిపిస్తున్న అతడు.. పక్కా మాస్‌ లుక్‌లో అదరగొడుతున్నాడు. ఇప్పటికే ఈ సినిమా నుంచి అతని ఫస్ట్‌ లుక్‌ రిలీజ్‌ కాగా.. తాజాగా దసరా పండుగకు రెండు రోజుల ముందు అంటే సోమవారం (అక్టోబర్‌ 3) ధూమ్‌ ధామ్‌ దోస్తాన్‌ అనే మాస్‌ లిరికల్‌ సాంగ్‌ రిలీజ్‌ చేశారు.

ఈ సినిమాలో నాని పక్కా మాస్‌ బీట్స్‌, స్టెప్పులతో ఇరగదీశాడు. ఈ సాంగ్‌లోని లిరిక్స్‌ కూడా ఊర మాస్‌గా ఉన్నాయి. "ఉంటే వైకుంఠం.. లేకుంటే ఊకుంటం.. అంత లావైతే గుంజుకుంటం.. తింటం.. పంటం.. బద్దలు బాసింగాలైతై" అంటూ మొదలయ్యే ఈ పాటలోకి నాని మాస్‌ ఎంట్రీ ఇచ్చాడు. "మా మామగాడు చెప్పుడు సరే.. మీరు కొట్టుడు సరే.. అరె ఓ నైన్టీ.. వీళ్లకింకో నైన్టీ పొయ్‌రా" అంటూ నాని పక్కా తెలంగాణ యాసలో చెప్పిన డైలాగ్‌ సాంగ్‌కే హైలైట్‌.

ఈ సాంగ్‌ రిలీజ్‌ అయిన వెంటనే విపరీతమైన బజ్‌ క్రియేట్‌ అయింది. ఈ ఏడాది వచ్చిన మాస్‌ నంబర్స్‌లో ఇదే టాప్‌ అన్నట్లుగా వైరల్‌గా మారిపోయింది. ఈ దసరా మూవీ కోసం నాని లుక్‌ పూర్తిగా మారిపోయింది. ఈ సినిమాలో అతడు ఎలా కనిపించబోతున్నాడో ఈ పాటతో తేలిపోయింది. సంతోష్‌ నారాయణ్‌ ఈ పాటకు మాస్‌ బీట్స్‌ అందించగా.. రాహుల్‌ సిప్లిగంజ్, పాలమూరు జంగిరెడ్డి, నర్సమ్మ, గొట్టె కనకవ్వ, గన్నోరా దాస లక్ష్మిలు ఈ పాట పాడారు.

కాసర్ల శ్యామ్‌ ఈ పాటకు లిరిక్స్‌ అందించాడు. తెలంగాణ స్టైల్‌ మాస్‌ సాంగ్‌కు తీన్మార్‌ బీట్స్‌తో ఈ దసరాకు అందరితో స్టెప్పులేయించేలా పాట సాగింది. ఈ దసరా మూవీని శ్రీకాంత్‌ ఓదెల డైరెక్ట్‌ చేస్తున్న విషయం తెలిసిందే. శ్రీ లక్ష్మీవెంకటేశ్వర సినిమాస్‌ బ్యానర్‌లో చెరుకూరి సుధాకర్‌ ఈ సినిమాను నిర్మిస్తున్నాడు. ఇక దసరాలో కీర్తి సురేశ్‌ ఫిమేల్‌ లీడ్‌లో కనిపించనుంది.

సముద్రఖని, సాయి కుమార్‌, జరీనా వహాబ్‌లు ఇతర ముఖ్యమైన పాత్రలు పోషించారు. ఈ దసరా కూడా పాన్‌ ఇండియా మూవీగా రాబోతోంది. తెలుగుతోపాటు తమిళం, మలయాళం, కన్నడ, హిందీ భాషల్లో 2023, మార్చి 30వ తేదీని రిలీజ్‌ కాబోతోంది.