Netflix Crime Thriller Web Series: నెట్‌ఫ్లిక్స్‌లోకి మరో క్రైమ్ థ్రిల్లర్ వెబ్ సిరీస్.. స్ట్రీమింగ్ డేట్ ఇదే

Netflix Crime Thriller Web Series: ప్రముఖ ఓటీటీ ప్లాట్‌ఫామ్ నెట్‌ఫ్లిక్స్ లోకి మరో అదిరిపోయే క్రైమ్ థ్రిల్లర్ వెబ్ సిరీస్ రాబోతోంది. గత వారమే టైటిల్ టీజర్ అనౌన్స్ చేసిన ఆ ఓటీటీ.. తాజాగా సోమవారం (మార్చి 3) స్ట్రీమింగ్ తేదీని వెల్లడించింది. ఈ సిరీస్ పేరు ఖాకీ: ది బెంగాల్ ఛాప్టర్.

ఖాకీ: ది బెంగాల్ ఛాప్టర్ ఓటీటీ రిలీజ్ డేట్

ఖాకీ: ది బెంగాల్ ఛాప్టర్ పేరుతో వస్తున్న క్రైమ్ థ్రిల్లర్ వెబ్ సిరీస్.. మార్చి 20 నుంచి స్ట్రీమింగ్ కానున్నట్లు నెట్‌ఫ్లిక్స్ వెల్లడించింది. దేబాత్మ మండల్ డైరెక్ట్ చేసిన ఈ సిరీస్ కు ప్రముఖ దర్శకుడు నీరజ్ పాండే షోరన్నర్ గా ఉండటం విశేషం. గతంలో నెట్‌ఫ్లిక్స్ లోనే ఖాకీ: ది బీహార్ ఛాప్టర్ పేరుతో ఓ వెబ్ సిరీస్ వచ్చిన విషయం తెలిసిందే.

పవర్ కోసం ప్రజలను భయభ్రాంతులకు గురి చేసే గ్యాంగ్‌స్టర్లు, పొలిటీషియన్లు ఓవైపు.. ఐపీఎస్ ఆఫీసర్ అర్జున్ మైత్రా మరోవైపు.. ఈ ఇద్దరి మధ్య జరిగే సంఘర్షణే ఈ ఖాకీ: ది బెంగాల్ ఛాప్టర్ వెబ్ సిరీస్ స్టోరీ. ఈ వెబ్ సిరీస్ లో శాశ్వత ఛటర్జీ, పరంబ్రతా ఛటర్జీ, ప్రొసేన్‌జీత్, రిత్విక్ భౌమిక్ లాంటి వాళ్లు నటించారు.

“ఖూన్ యా కానూన్ (రక్తం లేదా చట్టం).. గెలుపు దేనిది? ఖాకీ: ది బెంగాల్ ఛాప్టర్ త్వరలోనే నెట్‌ఫ్లిక్స్ లోకి రాబోతోంది” అనే క్యాప్షన్ తో గతవారం ఈ వెబ్ సిరీస్ టైటిల్ టీజర్ ను ఆ ఓటీటీ ప్రేక్షకుల ముందుకు తీసుకొచ్చింది. ఈ పోస్టర్ చాలా ఇంటెన్స్ లుక్ లో ఉంది. ఇందులో సిరీస్ లోని ప్రధాన పాత్రలన్నీ కనిపిస్తున్నాయి. చాలా వరకు చేతుల్లో గన్స్ తో ఉన్న ఈ పోస్టర్ చూస్తుంటే.. రక్తం ఏరులై పారే వెబ్ సిరీస్ లా కనిపిస్తోంది.

ఖాకీ: ది బీహార్ ఛాప్టర్ గురించి..

నెట్‌ఫ్లిక్స్ ఓటీటీలో ఇప్పటికే ఖాకీ: ది బీహార్ ఛాప్టర్ పేరుతో ఓ వెబ్ సిరీస్ అందుబాటులో ఉంది. మొదట నవంబర్, 2022లో తొలి సీజన్ వచ్చింది. తర్వాత ఆగస్ట్ 2023లో రెండో సీజన్ ను కూడా తీసుకొచ్చారు.

ఈ వెబ్ సిరీస్ బీహార్ లో పేరు మోసిన ఓ క్రిమినల్ ఆట కట్టించడానికి ప్రయత్నించే ఓ పోలీస్ ఆఫీసర్ చుట్టూ తిరుగుతుంది. నీరజ్ పాండే ఈ షోని కూడా క్రియేట్ చేశాడు. కరణ్ టక్కర్, అవినాష్ తివారీ, అశుతోష్ రాణా, అభిమన్యు సింగ్ లాంటి వాళ్లు నటించారు. భవ్ ధూలియా డైరెక్ట్ చేశాడు. ఈ సిరీస్ ను ప్రస్తుతం నెట్‌ఫ్లిక్స్ లో చూడొచ్చు. ఇక ఖాకీ: ది బెంగాల్ ఛాప్టర్ కూడా మార్చి 20న ఇదే ఓటీటీలోకి వస్తోంది.