Telugu OTT: ఒకే రోజు ఓటీటీలోకి వ‌చ్చిన ఐదు తెలుగు సినిమాలు - ఒక్కోటి ఒక్కో జాన‌ర్ - క్రైమ్ నుంచి బోల్డ్ వ‌ర‌కు!

OTT Releases: ఒకే రోజు అమెజాన్ ప్రైమ్‌లోకి ఐదు తెలుగు సినిమాలు వ‌చ్చాయి. వీటిలో ఎక్కువ‌గా థ్రిల్ల‌ర్ సినిమాలే ఉండ‌టం గ‌మ‌నార్హం. ఈ ఐదు సినిమాలు ఫ్రీగా కాకుండా రెంట‌ల్ విధానంలో అందుబాటులోకి వ‌చ్చాయి. 99 రూపాయ‌ల రెంట్‌తో స్ట్రీమింగ్ అవుతోన్నాయి.

క్రైమ్ రీల్‌...

బిగ్‌బాస్ సీజ‌న్ 2 బ్యూటీ సంజ‌న అన్నే ప్ర‌ధాన పాత్ర‌లో న‌టించిన క్రైమ్ రీల్ మూవీ థియేట‌ర్ల‌లో రిలీజైన ఐదు నెల‌ల త‌ర్వాత ఓటీటీలోకి వ‌చ్చింది. క్రైమ్ థ్రిల్ల‌ర్ క‌థాంశంతో తెర‌కెక్కిన ఈ మూవీలో సిరి చౌద‌రి, జ‌బ‌ర్ధ‌స్థ్ అభి, భ‌ర‌త్‌ కీల‌క పాత్ర‌లు పోషించారు. హీరోయిన్‌గా న‌టిస్తూనే ఈ మూవీకి సంజ‌న అన్నే ద‌ర్శ‌క‌త్వం వ‌హించింది. క్రైమ్ ఇన్వేస్టిగేట్ థ్రిల్ల‌ర్‌గా ఈ మూవీ తెర‌కెక్కింది.

సినిమాల‌పై ఇష్టంతో ఇంట్లో నుంచి పారిపోయిన మౌనిక అనే అమ్మాయి దారుణంగా హ‌త్య‌కు గుర‌వుతుంది. మౌనిక‌ను మ‌ర్డ‌ర్ చేసిన వారిని పోలీస్ ఆఫీస‌ర్ మాయ ఎలా ప‌ట్టుకుంది అన్న‌దే ఈ మూవీ క‌థ‌.

ప్ర‌వీణ్ ఐపీఎస్‌

ఐపీఎస్‌ ఆఫీస‌ర్ ట‌ర్న్‌డ్ పొలిటిక‌ల్ లీడ‌ర్ ఆర్ ఎస్ ప్ర‌వీణ్ కుమార్ జీవితం ఆధారంగా రూపొందిన ప్ర‌వీణ్ ఐపీఎస్ అమెజాన్ ప్రైమ్‌లో స్ట్రీమింగ్ అవుతోంది. ఈ బ‌యోపిక్ మూవీలో నంద‌కిషోర్ ధూళిపాళ హీరోగా న‌టించాడు. ప్ర‌వీణ్ కుమార్ జీవితంలోని కీల‌క ఘ‌ట్టాల ఆధారంగా తెర‌కెక్కిన ఈ మూవీకి దుర్గాదేవ్ నాయుడు ద‌ర్శ‌క‌త్వం వ‌హించాడు.

వీ ల‌వ్ బ్యాడ్ బాయ్స్‌

బిగ్‌బాస్ ఫేమ్ అజ‌య్ క‌తుర్వార్‌తో పాటు వంశీ, ఆదిత్య‌, రోమికా శ‌ర్మ‌, ప్ర‌గ్యా న‌య‌న్ హీరోహీరోయిన్లుగా న‌టించిన వీ ల‌వ్ బ్యాడ్ బాయ్స్ స‌డెన్‌గా అమెజాన్ ప్రైమ్‌లోకి వ‌చ్చింది. యూత్‌ఫుల్ ల‌వ్ ఎంట‌ర్‌టైన‌ర్‌గా ఈ మూవీ తెర‌కెక్కింది. ప్ర‌శాంత్‌, విన‌య్‌, అరుణ్ ప్రాణ స్నేహితులు. వారి జీవితంలోకి ఓ ముగ్గురు అమ్మాయిలు ఎలా ఎంట‌ర‌య్యారు? ల‌వ్ అంటే టైమ్‌పాస్ అనే అభిప్రాయంలో ఉన్న వారిలో ఎలా మార్పు వ‌చ్చింది అన్న‌దే ఈ మూవీ క‌థ‌.

పెళ్లి కూతురు పార్టీ

అమ్మాయిలు బ్యాచ్‌ల‌ర్ పార్టీ చేసుకుంటే ఎలా ఉంటుంద‌నే వెరైటీ కాన్సెప్ట్‌తో పెళ్లి కూతురు పార్టీ మూవీ తెర‌కెక్కింది. ప్రిన్స్‌, అర్జున్ క‌ళ్యాణ్‌, అనీషా దామా ప్ర‌ధాన పాత్ర‌ల్లో న‌టించిన ఈ మూవీకి అప‌ర్ణ మ‌ల్లాది ద‌ర్శ‌క‌త్వం వ‌హించింది. మంచి సినిమాగా విమ‌ర్శ‌కుల ప్ర‌శంస‌లు అందుకున్న ఈ మూవీ క‌మ‌ర్షియ‌ల్‌గా మాత్రం ఆశించిన విజ‌యాన్ని అందుకోలేక‌పోయింది.

బొమ్మ‌ల కొలువు...

ఈ నాలుగు సినిమాల‌తో పాటు స‌స్పెన్స్ థ్రిల్ల‌ర్ మూవీ బొమ్మ‌ల కొలువు కూడా అమెజాన్ ప్రైమ్‌లోకి వ‌చ్చింది. హృషికేష్, ప్రియాంక శ‌ర్మ‌, మాళ‌వికా స‌తీష‌న్ హీరోహీరోయిన్లుగా న‌టించిన ఈ మూవీకి సుబ్బు వేదుల ద‌ర్శ‌క‌త్వం వ‌హించాడు. 2022లో ఈ మూవీ థియేట‌ర్ల‌లో రిలీజైంది. దాదాపు మూడేళ్ల త‌ర్వాత ఓటీటీలోకి వ‌చ్చింది.