OTT Comedy: ఓటీటీలోకి నయా కామెడీ చిత్రం.. రిజెక్ట్ చేసిన అమ్మాయి ఇంట్లో పని మనిషిగా.. స్ట్రీమింగ్ ఎక్కడంటే..

హరి భాస్కర్, లోసిల్య మరియనేసన్ ప్రధాన పాత్రల్లో మిస్టర్ హౌస్‍‍కీపింగ్ సినిమా వచ్చింది. ఈ ఏడాది జనవరి 24న ఈ తమిళ రొమాంటిక్ కామెడీ చిత్రం విడుదలైంది. ఈ లోబడ్జెట్ చిత్రం బాక్సాఫీస్ వద్ద బాగానే పర్ఫార్మ్ చేసింది. ఈ సినిమాకు అరుణ్ రవిచంద్రన్ దర్శకత్వం వహించారు. ఈ మిస్టర్ హౌస్‍‍కీపింగ్ చిత్రం ఇప్పుడు ఓటీటీలోకి వస్తోంది.

స్ట్రీమింగ్ ఎప్పుడు..

మిస్టర్ హౌస్‍‍కీపింగ్ సినిమా రేపు (మార్చి 25) 'ఆహా తమిళ్' ఓటీటీ ప్లాట్‍ఫామ్‍లో స్ట్రీమింగ్‍కు రానుంది. దీనిపై అధికారిక ప్రకటన కూడా వచ్చేసింది. టెంట్‍కొట్ట ఓటీటీలోనూ మార్చి 25నే ఈ చిత్రం స్ట్రీమింగ్‍కు అడుగుపెట్టనుంది.

మిస్టర్ హౌస్‍‍కీపింగ్ చిత్రంలో హరి భాస్కర్, లోసిల్యతో పాటు ఇళవరసు, రాయన్, జవహర్ శక్తి, షా రా, ఎంజే శ్రీరామ్, ఉమా రామచంద్రన్ కీలకపాత్రలు పోషించారు. ఈ చిత్రాన్ని రొమాంటిక్ కామెడీగా తెరకెక్కించారు డైరెక్టర్ అరుణ్. ఈ చిత్రానికి ఓషో వెంకట్ సంగీతం అందించారు.

మిస్టర్ హౌస్‍‍కీపింగ్ స్టోరీలైన్

డబ్బు అవసరాలు తీవ్రంగా ఉండటంతో పనిమనిషిగా చేయాలని హానెస్ట్ రాజు (హరి భాస్కర్) డిసైడ్ అవుతాడు. ఇసాయ్ (లోహిస్య) ఓ కంపెనీలో మంచి ఉద్యోగం చేస్తుంటుంది. అయితే, కాలేజీలో రాజు లవ్ ప్రపోజల్‍ను ఇసాయ్ రిజెక్ట్ చేస్తుంది. నాలుగేళ్ల తర్వాత ఇసాయ్ వద్దే పనిమనిషిగా చేరతాడు హానెస్ట్ రాజు. ఈ క్రమంలోనే హరిశ్ (రాయన్)ను పెళ్లి చేసుకోవాలని అనుకుంటుంది. అయితే, పనిమనిషిగా చేరిన తర్వాత రాజుతో ఇసాయ్ పరిచయం పెరుగుతుంటుంది. ఆ తర్వాత ఏం జరిగింది? ఇసాయ్ ఎవరిని పెళ్లి చేసుకుంటుంది? అనేదే మిస్టర్ హౌస్‍‍కీపింగ్ సినిమాలో ప్రధాన అంశాలుగా ఉంటాయి.

మిస్టర్ హౌస్‍‍కీపింగ్ చిత్రాన్ని శ్రీ తెనండల్ ఫిల్మ్స్, ఇన్‍వేట్ మీడియా బ్యానర్లపై ఎన్.రామసామి, నితిన్ మనోహర్ నిర్మించారు. ఈ సినిమాలో స్టోరీపాయింట్ ఆకట్టుకున్నా.. కథనం కాస్త ఊహించినట్టుగా సాగుతుంది. కామెడీ మెప్పిస్తుంది.

గత వారం రింగ్ రింగ్ చిత్రం ఆహా తమిళ్ ఓటీటీ ప్లాట్‍ఫామ్‍లో స్ట్రీమింగ్‍కు వచ్చింది. ఈ మూవీలో ప్రవీణ్ రాజ్, వివేక్ ప్రసన్న, సాక్షి‍ అగర్వాల్, డానియెల్ అనీ పోప్, స్వయం సిద్ధ, జమున లీడ్ రోల్స్ చేశారు. ఈ కామెడీ చిత్రానికి శక్తివేల్ దర్శకత్వం వహించారు. ఈ చిత్రం ఏడాది జనవరి 31న థియేటర్లలో విడుదలైంది.