Unstoppable 2 Episode 5 Record: అన్‌స్టాపబుల్ అరుదైన రికార్డు.. 2 రోజుల్లోనే 30 మిలియన్ల స్ట్రీమింగ్ మినిట్స్

Unstoppable 2 Episode 5 Record: నందమూరి నటసింహం బాలకృష్ణ ప్రస్తుతం సినిమాలతో పాటు రియాల్టీ షోలో వ్యాఖ్యతగానూ అలరిస్తున్న సంగతి తెలిసిందే. ఆయన అన్‌స్టాపబుల్ అనే షోకు యాంకర్‌గా వ్యవహరిస్తున్నారు. ఆహా వేదికగా ప్రసారమవుతున్న ఈ షో రెండో సీజన్ ప్రస్తుతం దిగ్విజయంగా నడుస్తోంది. ఇప్పటి వరకు నాలుగు ఎపిసోడ్లు రాగా.. ఐదో ఎపిసోడ్‌లో ప్రముఖ టాలీవుడ్ నిర్మాతలు, దర్శకులు విచ్చేశారు. దగ్గుబాటి సురేష్ బాబు, అల్లు అరవింద్, రాఘవేంద్రరావు, మరో దర్శకుడు కోదండరామిరెడ్డి వచ్చారు.

అయితే ఈ ఎఫిసోడ్ అరుదైన రికార్డును సృష్టించింది. ఐదో ఎపిసోడ్ విడుదలైన రెండు రోజుల్లోనే 30 మిలియన్ల స్టీమింగ్ మినిట్స్‌ను అందుకుంది. ఇంతవరకు ఏ ఎపిసోడ్‌కు సాధ్యం కానీ విధంగా అరుదైన ఘనతను సొంతం చేసుకుంది. దివంగత మాజీ సీఎం, సీనియర్ ఎన్టీఆర్ శతజయంతి సందర్భంగా 5వ ఎపిసోడ్ విడుదలైంది. ఈ ఎపిసోడ్‌లో బాలయ్య తన జోరు, చమత్కారం, పంచ్‌లతో ఈ షోలో హుషారును పెంచారు.

ఈ ఎపిసోడ్‌లో దర్శక, నిర్మాతలను 90 ఏళ్ల తెలుగు సినిమా చరిత్రలో వచ్చిన సినిమాల గురించి ప్రశ్నించారు బాలయ్య. అల్లు అరవింద్, సురేష్ బాబును నేపోటిజం గురించి బాలకృష్ణ ప్రశ్నించారు. ఇంకా మూవీస్ గురించి చర్చించారు.

"తెలుగు సినిమా పొత్తిళ్లలో పుట్టినవాళ్లు, సినిమానే ప్రపంచంగా పెరిగినవాళ్లు ఇవాళ మన నిర్మాతలు" అంటూ అల్లు అరవింద్, సురేష్ బాబును ఆహ్వానిస్తారు బాలయ్య. "నాకు మీ ఇద్దరినీ చూస్తుంటే భలేదొంగ, మంచి దొంగ.. ఇలాంటి దొంగ సినిమాలన్నీ గుర్తుకొస్తున్నాయి." అని ఈ బడా నిర్మాతలపై బాలకృష్ణ పంచ్ వేస్తారు. "సురేష్ బాబుతో నా అనుబంధం గురించి తెలిసే ఉంటుంది.. ఇక పాయింట్ ఏంటంటే మనిద్దరి కాంబినేషనే బ్యాలెన్స్" అంటూ బాలకృష్ణ అల్లు అరవింద్‌ను అడుగుతారు.

ఇందుకు అల్లు అరవింద్ సమాధానం చెబుతూ.. మీరు, చిరంజీవి గారి కాంబినేషన్‌లో తీద్దామని వెయిట్ చేస్తున్నానని అంటారు. అది పాన్ వరల్డ్ సినిమా అవుతుందని బాలయ్య చెప్పగానే.. సెట్‌లో ప్రేక్షకులు అరుపులు, ఈలలతో హోరెత్తించారు.