Arjun Sarja: నేను కథ రాశాను.. ఎంత ఊహించుకున్న అంతకు మించి ఉంటుంది.. హీరో అర్జున్ సర్జా కామెంట్స్

Arjun Sarja About Martin Movie: యాక్షన్ కింగ్ అర్జున్ సర్జా మేనల్లుడు ధృవ స‌ర్జా టైటిల్ పాత్ర‌లో న‌టించిన భారీ బ‌డ్జెట్ పాన్ ఇండియా చిత్రం ‘మార్టిన్’. ఈ సినిమాకు ఏపీ అర్జున్ ద‌ర్శ‌క‌త్వం వహించారు. వాస‌వీ ఎంట‌ర్‌ప్రైజెస్‌, ఉద‌య్ కె.మెహ‌తా ప్రొడ‌క్ష‌న్స్ బ్యాన‌ర్స్‌పై ఉద‌య్ కె. మెహ‌తా, సూర‌జ్ ఉద‌య్ మెహ‌తా ఈ భారీ యాక్ష‌న్ థ్రిల్ల‌ర్‌ మార్టిన్ సినిమాను నిర్మించారు.

అర్జున్ సర్జా కామెంట్స్

రీసెంట్‌గా విడుద‌లైన మార్టిన్ మూవీ ట్రైల‌ర్‌కు అమేజింగ్ రెస్పాన్స్ వ‌చ్చిన సంగతి తెలిసిందే. మార్టిన్ మూవీ అక్టోబర్ 11న రిలీజ్ అయి ప్రేక్షకుల ముందుకు రానుంది. ఈ క్రమంలో సినిమా ప్రమోషన్స్‌లో భాగంగా శుక్రవారం (అక్టోబర్ 4) నాడు చిత్రయూనిట్ మార్టిన్ ప్రీ రిలీజ్ ఈవెంట్‌ను నిర్వహించారు. ఈ కార్యక్రమాంలో హీరో అర్జున్ సర్జా ఇంట్రెస్టింగ్ కామెంట్స్ చేశారు.

చాలా ఖర్చు పెట్టామనేది

"నాకు రామా నాయుడు గారితో చాలా అనుబంధం ఉంది. ఆయన ఒక సారి ఫోన్ చేసి ఓ మంచి డైరెక్టర్‌ను పరిచయం చేస్తాను రమ్మని పిలిచారు. ఆయనే బి. గోపాల్. ఆయనతో కలిసి ప్రతిధ్వని మూవీని చేశాను. అప్పటికీ ఇప్పటికీ ఆయన అలానే ఉన్నారు. మార్టిన్ గురించి చాలా ఖర్చు పెట్టామని చెప్పాల్సిన పని లేదు. టీజర్, ట్రైలర్, పాటలు చూస్తే అందరికీ తెలుస్తుంది" అని హీరో అర్జున్ సర్జా చెప్పారు.

కథ మాత్రమే రాశాను

"మా మార్టిన్ చిత్రం అక్టోబర్ 11న రానుంది. దసరాకి చాలా సినిమాలు వస్తున్నాయి. అన్ని చిత్రాలు చూడండి. మా మూవీని కూడా చూడండి. ధృవ సర్జా ఈ చిత్రానికి చాలా కష్టపడ్డాడు. ఇప్పుడు మళ్లీ కేడీ సినిమా కోసం వెయిట్ తగ్గాడు. నేను పేపర్ మీద కథ రాశాను. కానీ, దాన్ని తెరపైకి తీసుకొచ్చేందుకు దర్శక, నిర్మాతలు చాలా కష్టపడ్డారు" అర్జున్ సర్జా తెలిపారు.

మించి ఉంటుంది

"ప్రేక్షకుడు ఎంత ఊహించుకుని వచ్చినా.. దాని కంటే ఎక్కువగా ఉంటుంది. చాలా గ్యాప్ తరువాత ఇలాంటి ఓ కమర్షియల్ చిత్రం రాబోతోందని చెప్పగలను. వైభవి అద్భుతంగా నటించారు. టాప్ టెక్నీషియన్లంతా సినిమాకు పని చేశారు. ఆడియెన్స్ మా సినిమాను ఆశీర్వదించాలని కోరుకుంటున్నాను" అని సీనియర్ హీరో అర్జున్ సర్జా తన స్పీచ్ ముగించారు.

నచ్చితే చెప్పండి

"మార్టిన్ టీంకు పని చేసిన ప్రతీ ఒక్కరికీ థాంక్స్. మా మామ అర్జున్ గారు లేకపోతే నేను ఈ స్థాయిలో ఉండేవాడిని కాదు. బయట ఎంతో మంది టాలెంటెడ్ ఆర్టిస్టులు ఉన్నారు. నా ఈ మూవీని చూడండి. నాకు టాలెంట్ ఉందని అనుకుంటే ఆ తరువాత నా సినిమాలను ఎంకరేజ్ చేయండి. లేదంటే వదిలేయండి. కానీ, మీకు సినిమా నచ్చితే అందరికీ చెప్పండి. అన్ని సినిమాలను చూడండి. టైం దొరికితే నా మూవీని కూడా చూడండి" అని హీరో ధృవ సర్జా తెలిపాడు.

ప్రేమ వస్తుందని

హీరోయిన్ వైభవి శాండిల్య మాట్లాడుతూ.. "మార్టిన్ నాకు ఎంతో ప్రత్యేకం. ఇంత మంచి ఛాన్స్ ఇచ్చిన దర్శక, నిర్మాతలకు థాంక్స్. ఈ చిత్రంలో నేను ప్రీతి అనే పాత్రను పోషించాను. కాబట్టి ఆడియెన్స్ నుంచి నాకు ప్రేమ వస్తుందని అనుకుంటున్నాను. ధృవ్ సర్జాతో నటించడం ఆనందంగా ఉంది. ఇంత మంచి కథను రాసిన అర్జున్ సర్జా గారికి థాంక్స్. అక్టోబర్ 11న మా చిత్రం రానుంది. అందరూ చూడండి" అని అన్నారు.