అమ్మ పాడే జోల పాట లిరిక్స్: అమ్మ ప్రేమను ప్రతిబింబించే ఈ సాంగ్ అమ్మలందరికీ అంకితం.. ఈ మదర్స్ డేనాడు మీ అమ్మ కోసం పాడండి

అమ్మను వర్ణించడానికి ఎలా పదాలు, పాటలు సరిపోవు. సృష్టికే మూలం అమ్మ అయినప్పుడు ఆమెను ఏమని పొగడగలం. అలాంటి అమ్మల కోసం ప్రత్యేకంగా ఓ రోజును ప్రతి ఏటా మనం జరుపుకుంటాం. ఈ ఏడాది మదర్స్ డే వచ్చేస్తోంది. ఈ సందర్భంగా అమ్మ పాడే జోల పాట అంటూ గతేడాది వచ్చి సంచలనం సృష్టించిన పాట గురించి తెలుసుకుందాం.

అమ్మ పాడే జోల పాట సాంగ్

అమ్మపాట అంటూ గతేడాది మిట్టపల్లి స్టూడియోస్ యూట్యూబ్ ఛానెల్ నుంచి ఓ అద్భుతమైన సాంగ్ రిలీజైంది. మిట్టపల్లి సురేందర్ ఈ పాటను రాయగా.. జాహ్నవి ఎర్రం పాడింది. సిస్కో డిస్కో అందించిన మ్యూజిక్ ఈ సాంగ్ ను ప్రతి తెలుగు ఇంటికీ తీసుకెళ్లింది.

అమ్మ పాడే జోలి పాటలోని మాధుర్యానికి కాస్త ఆధునికతను జోడించి కంపోజ్ చేసిన మ్యూజిక్ యువతను బాగా ఆకట్టుకుంది. ఇక జాహ్నవి వాయిస్ ప్రత్యేక ఆకర్షణగా నిలిచింది. దీంతో యూట్యూబ్ లో ఈ పాట ఇప్పటికే 9 కోట్లకుపైగా వ్యూస్ సొంతం చేసుకుంది. మరి అలాంటి సాంగ్ లిరిక్స్ ఇక్కడ ఇస్తున్నాం. ఈ మదర్స్ డే నాడు మీ అమ్మ కోసం పాడి ఆమెకు అంకితమివ్వండి.

అమ్మపాట లిరిక్స్

పల్లవి

అమ్మపాడే జోలపాట

అమృతానికన్నా తియ్యనంట

అమ్మపాడే లాలిపాట

తేనెలూరి పారే ఏరులంట

నిండు జాబిలి చూపించి

రెండు బుగ్గలు గిల్లేసి

నిండు జాబిలి చూపించి

గోటితో బుగ్గను గిల్లేసి

ఉగ్గును పట్టి ఊయలలూపే అమ్మ లాలన

ఊపిరిపోసే నూరేళ్ల నిండు దీవెన

అమ్మపాడే జోలపాట

అమృతానికన్నా తియ్యనంట

చరణం 1

కురిసే వాన చినుకులకి

నీలినింగి అమ్మ

మొలిచే పచ్చని పైరులకి

నేలతల్లి అమ్మ (2)

వీచే చల్లని గాలులకి

పూలకొమ్మ అమ్మ

ప్రకృతిపాడే పాటలకి

యలకోయిల అమ్మ

సృష్టికి మూలం అమ్మతనం

సృష్టికి మూలం అమ్మతనం

సృష్టించలేనిది అమ్మ గుణం

అమ్మపాడే జోలపాట

అమృతానికన్నా తియ్యనంట

అమ్మపాడే లాలిపాట

తేనెలూరి పారే ఏరులంట

చరణం 2

నింగిని తాకే మేడలకి

పునాది రాయి అమ్మ

అందం పొందిన ప్రతి శిలకి

ఉలిగాయం అమ్మ (2)

చీకటి చెరిపే వెన్నెలకి

జాబిల్లి అమ్మ

లోకం చూపే కన్నులకి

కంటిపాప అమ్మ

అమ్మంటే అనురాగ జీవనీ

అమ్మంటే అనురాగ జీవనీ

అమ్మ ప్రేమే సంజీవని

అమ్మపాడే జోలపాట

అమృతానికన్నా తియ్యనంట

మా అమ్మ.. అమ్మపాడే లాలిపాట

తేనెలూరి పారే ఏరులంట

నిండు జాబిలి చూపించి

రెండు బుగ్గలు గిల్లేసి

నిండు జాబిలి చూపించి

గోటితో బుగ్గను గిల్లేసి

ఉగ్గును పట్టి ఊయలలూపే అమ్మ లాలన

ఊపిరిపోసే నూరేళ్ల నిండు దీవెన

అమ్మపాడే జోలపాట

అమృతానికన్నా తియ్యనంట

మా అమ్మపాడే లాలిపాట

తేనెలూరి పారే ఏరులంట