Pushpa 2 Final Collections: పుష్ప 2 సినిమా ఫైనల్ కలెక్షన్ల లెక్క ఇదే.. ఎన్ని కోట్లు వచ్చాయంటే..

ఐకాన్ స్టార్ అల్లు అర్జున్ హీరోగా నటించిన ‘పుష్ప 2: ది రూల్’ సినిమా థియేట్రికల్ రన్ దాదాపు పూర్తయింది. ఇప్పటికే నెట్‍ఫ్లిక్స్ ఓటీటీలోకి వచ్చిన ఈ చిత్రం స్ట్రీమింగ్‍లోనూ సత్తాచాటుతోంది. గతేడాది డిసెంబర్ 5న థియేటర్లలో రిలీజైన పుష్ప 2 చిత్రం బాక్సాఫీస్‍ను షేక్ చేసేసింది. క్రేజ్‍కు తగ్గట్టే ఆరంభం నుంచి కలెక్షన్ల సునామీ సృష్టించింది సుకుమార్ దర్శకత్వం వహించిన ఈ సీక్వెల్ మూవీ. థియేట్రికల్ రన్ ఎండ్ అవడంతో పుష్ప 2 క్లోజింగ్ ఫైనల్ కలెక్షన్లను మూవీ టీమ్ వెల్లడించింది.

ఫైనల్ కలెక్షన్లు ఇలా..

పుష్ప 2: ది రూల్ చిత్రం ప్రపంచవ్యాప్తంగా రూ.1871 కోట్ల గ్రాస్ కలెక్షన్లను దక్కించుకుంది. ఈ విషయాన్ని మూవీ టీమ్ నేడు (ఫిబ్రవరి 18) ప్రకటించింది. “చాలా రికార్డులు బద్దలుకొట్టి.. కొన్ని కొత్త రికార్డులను సృష్టించి.. భారతీయ సినిమా ఇండస్ట్రీ హిట్‍గా పుష్ప 2 ది రూల్ నిలిచింది. ప్రపంచ వ్యాప్తంగా రూ.1871 కోట్ల గ్రాస్ సాధించింది. రికార్స్డ్ రప్పారప్పా” అని మూవీ సోషల్ మీడియాలో పోస్ట్ చేసింది.

రూ.1871 కోట్ల లెక్కతో ఓ పోస్టర్ కూడా రివీల్ చేసింది పుష్ప 2 టీమ్. అల్లు అర్జున్‍తో పాటు సుకుమార్ ఫొటోను కూడా పోస్టర్‌లో పొందుపరిచింది. ఈ మూవీ సక్సెస్ క్రెడిట్ సుకుమార్‌దే అంటూ సక్సెస్ మీట్‍లో అల్లు అర్జున్ చెప్పారు. అల్లు అర్జున్ వల్లే ఈ మూవీ సాధ్యమైందంటూ సుకుమార్ అన్నారు. ఇలా ఇద్దరి మధ్య ఉన్న బలమైన బంధాన్ని వ్యక్తం చేసుకున్నారు.

రికార్డులు ఇవే..

ప్రపంచవ్యాప్తంగా అత్యధిక కలెక్షన్లు దక్కించుకున్న భారతీయ చిత్రాల్లో పుష్ప 2 రెండో స్థానంలో నిలిచింది. రూ.2,2024 కోట్లతో దంగల్ తొలి స్థానంలో ఉంటే.. రూ.1,871 కోట్లతో పుష్ప 2 రెండో ప్లేస్‍కు వచ్చింది. బాహుబలి 2 (రూ.1,810కోట్లు)ని కూడా దాటేసింది. దంగల్ చిత్రం చైనాలోనే ఎక్కువ శాతం వసూళ్లు దక్కించుకుంది. కాగా, ఇండియాలో అత్యధిక కలెక్షన్లు సాధించిన రికార్డును పుష్ప 2 తన ఖాతాలో వేసుకుంది. టాప్‍లో నిలిచింది.

హిందీ నెట్‍ కలెక్షన్ల విషయంలో రూ.700 కోట్లు, రూ.800కోట్ల మార్క్ తొలిసారి దాటిన మూవీగా రికార్డును పుష్ప 2 ఖాతాలో వేసుకుంది. ఏ బాలీవుడ్ మూవీకి కూడా ఇప్పటి వరకు రూ.700 కోట్ల హిందీ నెట్ కలెక్షన్లు దక్కలేదు. అత్యంత వేగంగా రూ.1,000 కోట్లు, రూ.1500కోట్ల గ్రాస్ సాధించిన రికార్డు కూడా ఈ చిత్రానిదే.

పుష్ప 2 చిత్రాన్ని గ్రాండ్ స్కేల్‍లో యాక్షన్ మూవీగా సుకుమార్ తెరకెక్కించారు. ఫస్ట్ పార్ట్ తర్వాత అంచనాలు అత్యంత భారీగా ఉండగా వాటిని అందుకున్నారు. ఈ చిత్రంలో అల్లు అర్జున్ నటనలో విశ్వరూపాన్ని చూపారు. ప్రశంసలు దక్కించుకున్నారు. ఈ చిత్రంలో రష్మిక మందన్నా హీరోయిన్‍గా నటించారు. ఫాహద్ ఫాజిల్ నెగెటివ్ రోల్ పోషించారు. జగపతి బాబు, రావు రమేశ్, సునీల్, జగదీశ్, అనసూయ, అజయ్, తారక్ పొన్నప్ప కీరోల్స్ చేశారు. మైత్రీ మూవీ మేకర్స్ నవీన్, రవిశంకర్ ఈ చిత్రాన్ని ప్రొడ్యూజ్ చేశారు. దేవీశ్రీ ప్రసాద్ ఈ సినిమాకు సంగీతం అందించారు. సామ్ సీఎస్.. బ్యాక్‍గ్రౌండ్ మ్యూజిక్‍లో ఎక్కువ శాతం ఇచ్చారు.