Pushpa 2 Trailer: పుష్ప-2 ట్రైలర్ రిలీజ్‌కి డేట్, టైమ్ ఫిక్స్.. ఫస్ట్ బ్లాస్టింగ్‌కి ఆ సిటీ ఆతిథ్యం

ఐకాన్ స్టార్ అల్లు అర్జున్ నటించిన పుష్ప-2 నుంచి ఎట్టకేలకు ట్రైలర్‌‌పై అప్‌డేట్ వచ్చింది. ప్రపంచవ్యాప్తంగా ఈ సినిమా డిసెంబరు 5న రిలీజ్ కాబోతుండగా.. ప్రమోషన్ ఈవెంట్స్ కోసం చిత్ర యూనిట్‌ గట్టిగా ప్లాన్ చేస్తోంది. దేశంలోని 7 ప్రముఖ నగరాల్లో ప్రీరిలీజ్ ఈవెంట్స్‌ను నిర్వహించబోతోంది.

స్పెషల్ అట్రాక్షన్‌గా శ్రీలీల సాంగ్

సుకుమార్ దర్శకత్వంలో 2021లో రిలీజైన పుష్ప: ది రైజ్ మూవీ బాక్సాఫీస్ వద్ద సరికొత్త రికార్డులు నెలకొల్పగా.. పుష్ప: ది రూల్‌పై భారీగా అంచనాలు పెరిగిపోయాయి. ఈ సినిమాలో అల్లు అర్జున్ సరసన రష్మిక మంధాన నటించగా.. క్రేజీ హీరోయిన్ శ్రీలీల ఐటెం సాంగ్ చేసింది. పుష్ప-1లో సమంత ఐటెం సాంగ్ చేసిన విషయం తెలిసిందే. మలయాళ నటుడు ఫహాద్‌ ఫాజిల్‌, అనసూయ, సునీల్‌, రావు రమేశ్‌, ప్రకాశ్ రాజ్, జగపతి బాబు తదితరులు పుష్ప-2లో నటించారు.

పుష్ప-2 ట్రైలర్‌ను నవంబరు 17న సాయంత్రం 6.03 గంటలకి రిలీజ్ చేయబోతున్నట్లు ఆ చిత్ర నిర్మాణ సంస్థ మైత్రీ మూవీ మేకర్స్ అధికారికంగా సోమవారం ప్రకటించింది. ఆరోజు పట్నాలో పెద్ద ఎత్తున ఈవెంట్‌ను ప్లాన్ చేసిన పుష్ప-2 టీమ్.. అదే ఈవెంట్‌లో ట్రైలర్‌ను కూడా రిలీజ్ చేయబోతోంది.

ఏడు నగరాల్లో ఈవెంట్స్

ఓవరాల్‌గా మూవీ రిలీజ్‌కి దేశంలోని ఏడు నగరాల్ని పుష్ప టీమ్ ఎంపిక చేసింది. ఇందులో పట్నాతో పాటు కోల్‌కతా, చెన్నై, కొచ్చి, బెంగళూరు, ముంబయి, హైదరాబాద్ ఉన్నాయి. డిసెంబరు 5 నాటికి ఈ ఏడు సిటీల్లోనూ ఈవెంట్స్ జరగనున్నాయి. రిలీజ్‌కి ముందే పుష్ప-2 రికార్డుల మోత మోగించేస్తోంది. యునైటెడ్ స్టేట్స్‌లో అత్యంత వేగంగా 15 వేల టిక్కెట్లు అమ్ముడుపోయిన సినిమాగా పుష్ప-2 నిలిచింది.

భారీ స్థాయిలో మూవీ రిలీజ్‌కి ప్లాన్

డిసెంబరు 5న ప్రపంచవ్యాప్తంగా పుష్ప-2 సినిమా ఆరు భాషల్లో విడుదల చేసేందుకు చిత్ర యూనిట్ సిద్ధమవుతోంది. మొత్తం 11,500 స్క్రీన్స్‌లలో రిలీజ్ చేయడానికి మేకర్స్ ప్లాన్ చేస్తున్నారు. ఇందులో ఓవర్సీస్‌లో సుమారు 5000 వేల వరకు స్క్రీన్స్ ఉండగా.. మిగిలినవి అన్నీ ఇండియాలోనే.