Pushpa 2: పుష్ప 2 నుంచి మరో అప్‌డేట్.. అల్లు అర్జున్, రష్మిక మంధాన ‘ఫీలింగ్స్’ సాంగ్ ప్రొమో రిలీజ్

ఐకాన్ స్టార్ అల్లు అర్జున్ నటించిన ‘పుష్ప 2: ది రూల్’ నుంచి మరో అప్‌డేట్ వచ్చింది. డిసెంబరు 5న ప్రపంచవ్యాప్తంగా పుష్ప 2 సినిమా రిలీజ్‌కి సిద్ధమవుతుండగా.. ఇప్పటికే చిత్ర యూనిట్ ప్రమోషన్స్‌తో బిజీగా ఉంది. ఈ సినిమాలో అల్లు అర్జున్ సరసన రష్మిక మంధాన నటించగా.. క్రేజీ హీరోయిన్ శ్రీలీల ఐటెం సాంగ్ చేసింది. సుకుమార్ దర్శకత్వం వహించిన ఈ పుష్ప 2 సినిమా కోసం గత మూడేళ్లుగా అభిమానులు నిరీక్షిస్తున్నారు.

డిసెంబరు 1న ఫుల్ సాంగ్

పుష్ప 2 నుంచి తాజాగా ఫీలింగ్స్ అనే పాట ప్రొమోని చిత్ర యూనిట్ రిలీజ్ చేసింది. అల్లు అర్జున్, రష్మిక మంధాన ఈ పాటలో అదిరిపోయే స్టెప్‌లు వేస్తున్నట్లు ప్రొమోలో చూపించారు. డిసెంబరు 1న లిరిక్స్‌తో పూర్తి పాట‌ను రిలీజ్ చేయబోతున్నారు.

ఇటీవల శ్రీలీల డ్యాన్స్ చేసిన ‘కిస్సిక్’ ఐటెం సాంగ్‌ను విడుదల చేయగా.. యూట్యూబ్‌లో గంటల వ్యవధిలోనే మిలియన్ కొద్దీ వ్యూస్‌తో సరికొత్త రికార్డులు నెలకొల్పిన విషయం తెలిసిందే. పుష్ప: ది రైజ్‌లో సమంత ఊ అంటావా.. ఊఊ అంటావా సాంగ్‌తో ఈ కిస్సిక్ సాంగ్‌ను నెటిజన్లు పోల్చడంతో పాటకి క్రేజ్ మరింత పెరిగింది.

సెన్సార్ పనులు పూర్తి

పుష్ప 2 మూవీ ఇప్పటికే సెన్సార్ పనుల్ని కూడా పూర్తి చేసుకోగా.. యూ/ఏ సర్టిఫికెట్ ఇచ్చినట్లు తెలుస్తోంది. అలానే రన్‌టైమ్ విషయంలోనూ తగ్గేదేలే అన్నట్లు ఏకంగా 3 గంటలా 18 నిమిషాలు ఉన్నట్లు ప్రచారం జరుగుతోంది. ఇండియన్ సినిమా హిస్టరీలోనే ఇదో పెద్ద సాహసమనే చెప్పాలి. అయితే.. ప్రేక్షకులకి ఈ సినిమాపై ఉన్న ఆసక్తి దృష్ట్యా రన్‌ టైమ్ పెద్ద సమస్య కాదని చిత్ర యూనిట్ చెప్పుకొస్తోంది.

ఓవర్సీస్‌లో ఇప్పటికే రికార్డ్

పుష్ప 2 సినిమా ఇప్పటికే ఓవర్సీస్‌లో అత్యంత వేగంగా 50 వేల టికెట్లు అమ్ముడుపోయిన ఇండియన్ సినిమాగా రికార్డ్‌ నెలకొల్పింది. అలానే ఇటీవల విడుదలైన ట్రైలర్‌‌కి ఏకంగా 150 మిలియన్ వ్యూస్ వచ్చాయి. ఈ రికార్డ్ వ్యూస్‌ను కొల్లగొట్టిన తొలి దక్షిణాది చిత్రంగా పుష్ప 2 నిలిచింది.

డిసెంబరు 5న పుష్ప 2 సినిమా వరల్డ్‌వైడ్‌గా 11,500 థియేటర్లలో విడుదల చేయడానికి ప్లాన్ చేస్తున్నారు. ఓవర్సీస్ అడ్వాన్స్‌ బుక్కింగ్స్‌‌లో టికెట్లు హాట్ కేకుల్లా అమ్ముడవుతున్నాయి. రిలీజ్‌కి ముందే రికార్డుల్ని తిరగరాస్తున్న పుష్ప 2.. రిలీజ్ తర్వాత వసూళ్లలో ఎన్ని రికార్డులు కొల్లగొడుతుందో చూడాలి.