AP Nominations: ఏపీలో నేటి నుంచి నామినేషన్లు… రాష్ట్ర వ్యాప్తంగా ఆర్వోల్లో ఏర్పాట్లు పూర్తి…-nominations in ap from today arrangements are completed at ros across the state ,ఎన్నికలు న్యూస్
తెలుగు న్యూస్  /  ఎన్నికలు  /  Ap Nominations: ఏపీలో నేటి నుంచి నామినేషన్లు… రాష్ట్ర వ్యాప్తంగా ఆర్వోల్లో ఏర్పాట్లు పూర్తి…

AP Nominations: ఏపీలో నేటి నుంచి నామినేషన్లు… రాష్ట్ర వ్యాప్తంగా ఆర్వోల్లో ఏర్పాట్లు పూర్తి…

Sarath chandra.B HT Telugu
Apr 18, 2024 06:00 AM IST

AP Nominations: ఆంధ్రప్రదేశ్‌ సార్వత్రిక ఎన్నికల ప్రక్రియలో కీలక అంకం నేటి నుంచి ప్రారంభం కానుంది. ఎన్నికల్లో తలపడే అభ్యర్థులు గురువారం నుంచి నామినేషన్లు దాఖలు చేయనున్నారు.

నేటి నుంచి ఏపీలో నామినేషన్ల స్వీకరణ
నేటి నుంచి ఏపీలో నామినేషన్ల స్వీకరణ

AP Nominations: ఆంధ్రప్రదేశ్‌ Andhrapradeshలో అసెంబ్లీ Assembly, లోక్‌సభ Loksabha ఎన్నికల్లో అభ్యర్థుల నామినేషన్ల స్వీకరణకు ఏర్పాట్లు పూర్తయ్యాయి. రాష్ట్రంలోని 25 లోక్‌సభ నియోజక వర్గాలతో పాటు, 175 అసెంబ్లీ నియోజక వర్గాల్లో అభ్యర్థుల నుండి నామినేషన్లను స్వీకరించేందుకు ROs రిటర్నింగ్ అధికారుల కార్యాలయాల్లో ఏర్పాట్లు పూర్తి చేసినట్టు EC CEO సీఈఓ ముఖేష్‌ కుమార్ మీనా ప్రకటించారు.

ఎన్నిక‌ల ప్ర‌క్రియ‌లో కీలక ఘ‌ట్టమైన నామినేష‌న్ల స్వీక‌ర‌ణ కార్య‌క్ర‌మం గురువారం నుంచి ప్రారంభమ‌వుతుందని, ఇందుకోసం అన్ని జిల్లాల ఎన్నికల అధికారులు ఇప్ప‌టికే ఏర్పాట్లను పూర్తి చేసినట్లు రాష్ట్ర ప్రధాన ఎన్నికల అధికారి ముఖేష్ కుమార్ మీనా తెలిపారు.

పార్ల‌మెంటు స్థానాలకు పోటి చేసే అభ్య‌ర్ధులు ఆయా జిల్లా క‌లెక్ట‌రేట్లో, అసెంబ్లీ స్థానాల్లో పోటీ చేసే అభ్య‌ర్ధులు ఆయా నియోజ‌క‌వ‌ర్గాల ప్ర‌ధాన కేంద్రాల్లో నామినేష‌న్ల‌ను దాఖ‌లు చేయాల్సి ఉంటుందన్నారు. ఒక్కో అభ్య‌ర్ధి గ‌రిష్టంగా నాలుగు సెట్ల‌ను దాఖ‌లు చేయ‌వ‌చ్చని, ఒక అభ్య‌ర్ధి ఏవైనా రెండు స్థానాల్లో మాత్ర‌మే పోటీ చేసేందుకు అవ‌కాశం ఉందన్నారు.

నామినేష‌న్లు దాఖ‌లు చేసే అభ్య‌ర్ధితో పాటు మ‌రో న‌లుగురిని మాత్ర‌మే ఆర్ఓ కార్యాల‌యం వ‌ర‌కు అనుమ‌తి ఇస్తారని, మిగిలిన వారిని 100 మీట‌ర్ల అవ‌త‌ల నిలిపివేస్తారని తెలిపారు. ప్రతి అభ్య‌ర్ధితో మొత్తం మూడు వాహ‌నాల‌కు మాత్ర‌మే అనుమ‌తి ఉంటుందన్నారు.

పోటీ చేసే అభ్య‌ర్ధులు పార్ల‌మెంటుకు రూ.25,000, అసెంబ్లీకి రూ.10,000 ధ‌రావ‌తు చెల్లించాల్సి ఉంటుందన్నారు. ఎస్‌సి, ఎస్‌టి అభ్య‌ర్ధులు దీనిలో 50 శాతం చెల్లిస్తే స‌రిపోతుందన్నారు. ఎన్నిక‌ల ప్ర‌వ‌ర్త‌నా నియ‌మావ‌ళిని పాటిస్తూ అభ్య‌ర్ధులు త‌మ నామినేష‌న్ల‌ను దాఖ‌లు చేయాల్సి ఉంటుందని ప్రధాన ఎన్నికల అధికారి మీనా తెలిపారు.

నామినేషన్ ల ప్రక్రియను పూర్తిగా రికార్డు చేసేందుకు నామినేష‌న్లను స్వీక‌రించే గ‌దిలో, అభ్య‌ర్ధులు ప్ర‌వేశించే ద్వారాల వ‌ద్దా సిసి కెమేరాల‌ను ఏర్పాటు చేశారు. మోడ‌ల్ కోడ్ అమ‌ల్లో భాగంగా అభ్య‌ర్ధుల ఊరేగింపుల‌ను, నామినేష‌న్ దాఖ‌లు చేసే కార్య‌క్ర‌మాల‌ను సైతం వీడియో రికార్డింగ్ చేస్తారు.

నామినేషన్లు దాఖ‌లు చేసేట‌ప్పుడు తీసుకోవలసిన జాగ్రత్తలు

-అభ్యర్థులు నామినేషన్ల దాఖలకు 13 రకాల డాక్యుమెంట్లను తీసుకురాల్సి ఉంటుంది.

-పార్ల‌మెంటుకు పోటీ చేసే అభ్య‌ర్ధులు ఫార‌మ్ 2ఏ, అసెంబ్లీకి పోటీ చేసేవారు ఫార‌మ్ 2బి లో ధ‌ర‌ఖాస్తు చేయాలి.

-నోటిఫైడ్ తేదీలలో ఉదయం 11.00 నుండి మధ్యాహ్నం 3.00 వరకు నామినేషన్లను స్వీకరిస్తారు.

-పబ్లిక్ సెలవు దినాలలో నామినేషన్ స్వీకరించరు.

-అభ్యర్థులు గరిష్టంగా 4 సెట్ల నామినేషన్ దాఖలు చేయవచ్చు.

-నామినేష‌న్ల‌ను ఆర్ఓ కు గానీ, సంబంధిత ఏఆర్ఓకు మాత్ర‌మే స‌మ‌ర్పించాలి.

-అభ్య‌ర్ది త‌న నామినేష‌న్‌ను నేరుగా గానీ, త‌న ప్ర‌పోజ‌ర్ ద్వారా గానీ స‌మ‌ర్పించ‌వ‌చ్చు.

-అభ్య‌ర్ధి నామినేష‌న్‌తో పాటు త‌మ పేరిట కొత్త‌గా తెరిచిన బ్యాంకు ఖాతా వివ‌రాల‌ను స‌మ‌ర్పించాలి.

-2 కంటే ఎక్కువ నియోజకవర్గాల నుండి అభ్యర్థులు నామినేషన్లను ఫైల్ చేయడం కుదరదు.

-నామినేషన్ల దాఖలు సమయంలో 100 మీటర్ల పరిధిలో గరిష్టంగా 3 వాహనాలు అనుమతించబడతాయి.

-అభ్య‌ర్ధితో స‌హా ఐదుగురు వ్య‌క్తులు మాత్ర‌మే ఆర్ఓ ఆఫీస్‌లోకి ప్రవేశించవచ్చు.

-నామినేషన్ల స్వీకరణకు సంబంధించి ఒక హెల్ప్ డెస్క్ ఏర్పాటు చేశారు.

-అన్ని అసెంబ్లీ నియోజకవర్గాలలో హెల్ప్ డెస్క్ లు ఏర్పాటు చేశారు.

-సువిధ యాప్ ద్వారా నామినేష‌న్లను దాఖ‌లు చేసే అవ‌కాశం ఉన్న‌ప్ప‌టికీ, వాటి కాపీల‌ను కూడా భౌతికంగా ఆర్ఓకు అంద‌జేయాల్సి ఉంటుంది.

-ఫార‌మ్‌-26 ద్వారా అభ్యర్థి త‌న అఫ‌డ‌విట్‌ను స‌మ‌ర్పించాలి.

-ఫారమ్ 26 స్టాంప్ పేపర్ యొక్క విలువ రూ. 10 లేదా అంతకంటే ఎక్కువ ఉండాలి.

-భౌతిక స్టాంప్ పేపర్ అందుబాటులో లేకుంటే E స్టాంప్ పేపర్‌ కూడా ఉపయోగించవచ్చు.

-అభ్యర్థి నామినేషన్ వేసిన దగ్గర నుంచీ, ఖర్చు అతని ఖాతాలో లెక్కించడం జరుగుతుంది.

-పత్రికల్లో వచ్చే ప్రకటనలు, పెయిడ్ న్యూస్ వార్తలను సైతం అభ్యర్థి ఖాతాలో లెక్కిస్తారు.

ఎన్నికల ప్రక్రియ షెడ్యూలు మరియు ముఖ్య‌మైన తేదీలు:

 

-గెజిట్ నోటిఫికేషన్ జారీ చేసే తేదీ: 18 ఏప్రిల్ 2024 (గురువారం)

-గెజిట్ నోటిఫికేషన్ జారీ తేదీ నుంచి నామినేష‌న్ల స్వీక‌ర‌ణ ప్రారంభ‌మ‌వుతుంది.

-నామినేషన్లు వేయడానికి చివరి తేదీ : 25 ఏప్రిల్ 2024 (గురువారం)

-నామినేషన్ల పరిశీలన తేదీ: 26 ఏప్రిల్ 2024 (శుక్రవారం)

-అభ్యర్థుల ఉపసంహరణకు చివరి తేదీ: 29 ఏప్రిల్ 2024 (సోమవారం)

-పోల్ తేదీ: 13 మే 2024 (సోమవారం)

-కౌంటింగ్ తేదీ : 04 జూన్ 2024 (మంగళవారం)

-ఎన్నికలు ముగిసేలోపు తేదీ : 06 జూన్ 2024 (గురువారం)

WhatsApp channel

సంబంధిత కథనం