90 బంతుల్లోనే 190 బాదిన వైభవ్ సూర్యవంశీ.. వీడియో షేర్ చేసిన రాజస్థాన్ రాయల్స్ ఫ్రాంఛైజీ

పద్నాలుగేళ్ల క్రికెట్ సంచలనం వైభవ్ సూర్యవంశీ దూకుడు కొనసాగుతోంది. భారత అండర్-19 జట్టు ఇంగ్లాండ్ పర్యటనకు ముందు బెంగళూరులోని బీసీసీఐ సెంటర్ ఆఫ్ ఎక్సలెన్స్‌లో జరిగిన సన్నాహక మ్యాచ్‌లో ఈ పవర్‌ఫుల్ లెఫ్ట్ హ్యాండెడ్ ఓపెనింగ్ బ్యాటర్ మెరుపు బ్యాటింగ్‌తో అదరగొట్టాడు. దూకుడైన స్ట్రోక్ ప్లేకు పేరుగాంచిన ఈ యువ లెఫ్ట్ హ్యాండర్.. ప్రేక్షకులు, సెలెక్టర్లను ఆశ్చర్యపరిచేలా సిక్సర్ల వర్షం కురిపించాడు.

వైభవ్ ధమాకా

సూర్యవంశీ ఐపీఎల్ ఫ్రాంఛైజీ రాజస్థాన్ రాయల్స్.. అతని విధ్వంసక ఇన్నింగ్స్ వీడియోను పంచుకుంది. అతడు సిక్స్‌లు ఎంత సింపుల్ గా కొడతాడో ఈ వీడియో చూస్తే తెలుస్తుంది. ఈ క్లిప్ వెంటనే వైరల్ అయింది. సూర్యవంశీ 90 బంతుల్లో 190 పరుగులు చేశాడని పలు మీడియా రిపోర్టులు వెల్లడించాయి. సూర్యవంశీ వెలుగులోకి రావడానికి పెద్దగా టైమ్ పట్టలేదు.

కేవలం 14 సంవత్సరాల 23 రోజుల వయసులో అతను 2025 ఏప్రిల్‌లో రాజస్థాన్ రాయల్స్ తరఫున బరిలోకి దిగాడు. ఇలా ఇండియన్ ప్రీమియర్ లీగ్ (IPL)లో అరంగేట్రం చేసిన అతి పిన్న వయస్కుడైన ఆటగాడిగా నిలిచాడు. మొదటి బంతికే సిక్స్ కొట్టి మరింత సంచలనం సృష్టించాడు. ఆ తర్వాత కూడా సీజన్ మొత్తం అదే దూకుడు కొనసాగించాడు.

ఐపీఎల్లో వైభవ్ దూకుడు

ఈ సీజన్ ఐపీఎల్లో అతను గుజరాత్ టైటాన్స్‌పై 35 బంతుల్లో సెంచరీ సాధించి చరిత్ర సృష్టించాడు. ఐపీఎల్ చరిత్రలో ఈ ఘనత సాధించిన అతి పిన్న వయస్కుడైన ఆటగాడిగా నిలిచాడు. అతని ఇన్నింగ్స్‌లో 11 సిక్సర్లు, 7 ఫోర్లు ఉన్నాయి. ఈ ఇన్నింగ్స్ సూర్యవంశీని క్రికెట్ ప్రపంచంలో ఓ సంచలనంగా మార్చింది.

రాజస్థాన్ రాయల్స్‌తో తన అరంగేట్ర సీజన్‌ను అతడు అద్భుతంగా ముగించాడు. సూర్యవంశీ ఏడు మ్యాచ్‌లలో 206.55 అద్భుతమైన స్ట్రైక్ రేట్‌తో 252 పరుగులు సాధించాడు. ఇది సీజన్‌లో అత్యధికం. ఒత్తిడిలో కూడా ప్రశాంతంగా ఉంటూ ఎంతో పరిణతితో కూడిన ఇన్నింగ్స్ ఆడి టీమ్ విజయాల్లో కీలకపాత్ర పోషించాడు.