కోహ్లి, పడిక్కల్ మెరుపు హాఫ్ సెంచరీలు.. రాయల్స్‌పై ఆర్సీబీ భారీ స్కోరు.. చిన్నస్వామిలో బోణీ చేసేనా?

రాయల్ ఛాలెంజర్స్ బెంగళూరు బ్యాటర్లు సొంతగడ్డపై చెలరేగారు. చిన్నస్వామి స్టేడియంలో రాజస్థాన్ రాయల్స్ తో మ్యాచ్ లో కోహ్లి, పడిక్కల్ హాఫ్ సెంచరీలు చేయడంతోపాటు చివర్లో టిమ్ డేవిడ్, జితేశ్ శర్మ మెరుపులతో భారీ స్కోరు చేసింది. 20 ఓవర్లలో 5 వికెట్లకు 205 రన్స్ చేసింది. విరాట్ 70 పరుగులతో టాప్ స్కోరర్ గా నిలిచాడు. చివరి ఓవర్ ను జోఫ్రా ఆర్చర్ కట్టుదిట్టంగా వేయడంతో ఆర్సీబీ మరింత భారీ స్కోరు చేసే అవకాశాన్ని కోల్పోయింది.

కోహ్లి, పడిక్కల్ పార్ట్‌నర్‌షిప్

సొంతగడ్డపై ఈ సీజన్లో తొలి విజయం కోసం ఆరాటపడుతున్న రాయల్ ఛాలెంజర్స్ బెంగళూరు ఈ మ్యాచ్ లో టాస్ ఓడి బ్యాటింగ్ కు దిగింది. తొలి వికెట్ కు విరాట్ కోహ్లి, ఫిల్ సాల్ట్ 6.4 ఓవర్లలోనే 61 పరుగులు జోడించారు. 23 బంతుల్లో 26 రన్స్ చేసిన సాల్ట్ ఔటయ్యాడు. అయితే ఆ తర్వాత క్రీజులోకి వచ్చిన పడిక్కల్ తో కలిసి కోహ్లి జోరు కొనసాగించాడు. అతడు 32 బంతుల్లోనే హాఫ్ సెంచరీ పూర్తి చేసుకున్నాడు.

పడిక్కల్ తో కలిసి అతడు రెండో వికెట్ కు 95 రన్స్ జోడించాడు. ఈ క్రమంలో 42 బంతుల్లోనే 70 రన్స్ చేసి ఔటయ్యాడు. కోహ్లి ఇన్నింగ్స్ లో 8 ఫోర్లు, 2 సిక్స్ లు ఉన్నాయి. విరాట్ ఔటైన కాసేపటికే పడిక్కల్ 26 బంతుల్లోనే హాఫ్ సెంచరీ పూర్తి చేసుకున్నాడు. అయితే ఆ తర్వాత ఎక్కువ సేపు క్రీజులో నిలవలేదు. 27 బంతుల్లో 4 ఫోర్లు, 3 సిక్స్ లతో సరిగ్గా 50 పరుగులు చేసి ఔటయ్యాడు.

చివర్లో టిమ్ డేవిడ్ 15 బంతుల్లో 2 ఫోర్లు, ఒక సిక్స్ తో 23 రన్స్ చేయగా.. జితేశ్ శర్మ 10 బంతుల్లో 19 రన్స్ చేసి అజేయంగా నిలిచాడు. రాయల్స్ బౌలర్లలో సందీప్ శర్మ 4 ఓవర్లలో 45 పరుగులు ఇచ్చి 2 వికెట్లు తీసుకున్నాడు. ఇక హసరంగ 4 ఓవర్లలో 30 పరుగులు ఇచ్చి ఒక వికెట్ తీశాడు.