ఇంగ్లండ్‌లో సెంచరీ బాదిన కేఎల్ రాహుల్.. టీమిండియా ఓపెనర్ స్థానం ఇక కన్ఫమ్

ఇంగ్లండ్ లయన్స్‌తో జరిగిన రెండో అనధికారిక టెస్టులో అద్భుతమైన సెంచరీ సాధించిన కేఎల్ రాహుల్.. ఇంగ్లండ్‌కు తన రాకను ఘనంగా చాటాడు. మరోసారి తనను తాను నిరూపించుకోవాలని ఉవ్విళ్లూరుతున్న రాహుల్.. తొలి రోజు టీ బ్రేక్ తర్వాత ఇండియా-ఎ తరఫున 151 బంతుల్లో సెంచరీ చేసి, రాబోయే టెస్ట్ సిరీస్‌లో ఓపెనర్‌గా తన స్థానాన్ని పదిలం చేసుకున్నాడు. తొలి మ్యాచ్ తర్వాత ఇండియా-ఎ జట్టుతో చేరిన రాహుల్.. వెంటనే తన అద్భుతమైన బ్యాటింగ్‌తో ప్రభావం చూపాడు.

రాహుల్ ఇన్నింగ్స్ హైలైట్స్

భారత్ రెండు కీలక వికెట్లను (యశస్వి జైస్వాల్ 17, అభిమన్యు ఈశ్వరన్ 11) త్వరగా కోల్పోయిన సమయంలో రాహుల్ మరోసారి బ్యాట్‌తో పరిణతిని చూపాడు. తన ఐపీఎల్ సహచరుడు కరుణ్ నాయర్‌తో కలిసి ఇన్నింగ్స్‌ను నిలబెట్టాడు. వీరిద్దరూ మూడో వికెట్‌కు 86 పరుగుల భాగస్వామ్యం నెలకొల్పారు. తొలి అనధికారిక టెస్టులో అద్భుతమైన డబుల్ సెంచరీ చేసిన నాయర్.. 71 బంతుల్లో 40 పరుగులు చేసి ఔటయ్యాడు.

33 ఏళ్ల రాహుల్ ఒక ఎండ్‌లో నిలబడి.. 13 ఫోర్లు, ఒక సిక్సర్‌తో కూడిన అద్భుతమైన సెంచరీతో భారత్‌ను పటిష్టమైన స్థితిలో ఉంచాడు. యాభై పరుగులు చేసిన తర్వాత వేగం పెంచి, త్వరగానే సెంచరీ సాధించి తన సత్తా చాటాడు.

కెప్టెన్సీ, బ్యాటింగ్ ఆర్డర్‌పై ప్రభావం

ఓపెనర్‌గా రోహిత్ శర్మ స్థానంలోకి అడుగుపెట్టడం రాహుల్‌కు కఠినమైన పని. అయితే, బ్యాటింగ్ లైనప్‌లో స్థిరమైన స్థానం లభిస్తే రాహుల్ కాన్ఫిడెన్స్ పెరుగుతుంది. ఆస్ట్రేలియాతో భారత్ చివరి టెస్ట్ సిరీస్‌లో, రాహుల్ తొలి టెస్టులో ఓపెనర్‌గా ఆడాడు. మొదటి మూడు మ్యాచ్‌లకు ఆ స్థానంలోనే బ్యాటింగ్ చేశాడు. కానీ బాక్సింగ్ డే టెస్టులో మూడో స్థానంలో వచ్చాడు.

చివరి మ్యాచ్‌లో మళ్లీ ఓపెనింగ్ చేశాడు. గత రెండు సంవత్సరాలుగా రిషబ్ పంత్ లేకపోవడంతో 33 ఏళ్ల రాహుల్ మిడిల్-ఆర్డర్ పాత్రకు అలవాటు పడాల్సి వచ్చింది. ఇదిలా ఉండగా, శుక్రవారం (జూన్ 6) అతడు ఆడిన ఇన్నింగ్స్.. టెస్ట్ సిరీస్‌కు ముందు హెడ్ కోచ్ గౌతమ్ గంభీర్, కెప్టెన్ శుభ్‌మన్ గిల్‌లకు ఊరటనిస్తుంది.

క్రిస్ వోక్స్ వార్నింగ్

అంతకుముందు మ్యాచ్‌లో, గాయం నుండి తిరిగి వచ్చిన క్రిస్ వోక్స్ అద్భుతమైన స్పెల్‌తో ఆకట్టుకున్నాడు. లీడ్స్‌లో భారత్‌తో జరిగిన తొలి టెస్టులో ఉదయం సెషన్‌లో రెండు కీలక వికెట్లు పడగొట్టాడు.

ఇంగ్లండ్ పేస్ దాడికి నాయకత్వం వహించిన వోక్స్, యశస్వి జైస్వాల్‌ను పదునైన ఇన్‌సీమర్‌తో ఎల్బీడబ్ల్యూగా వెనక్కి పంపించాడు. తొలి బంతికే అభిమన్యు ఈశ్వరన్‌ను అవుట్ చేసే అవకాశం వచ్చినా, స్లిప్స్‌లో క్యాచ్ వదిలేయడంతో ఓపెనర్‌కు తాత్కాలిక ఊరట లభించింది. అయితే, వోక్స్ త్వరలోనే మరో అద్భుతమైన డెలివరీతో స్టంప్స్‌ను పడగొట్టాడు. రెండో సెషన్‌లో, అతడు నాయర్‌ను వికెట్ ముందు దొరకబుచ్చుకొని కీలక వికెట్‌ను సొంతం చేసుకున్నాడు.