పంజాబ్ తో మ్యాచ్.. సీఎస్కేకు చావోరేవో.. ఓడితే ప్లేఆఫ్స్ రేసు నుంచి ఔట్.. టాస్ గెలిచిన శ్రేయస్.. ఆ ప్లేయర్ కు ఇంజూరీ

ఐపీఎల్ లో అయిదు టైటిళ్లతో టాప్ టీమ్ గా నిలిచిన చెన్నై సూపర్ కింగ్స్ కు గడ్డు పరిస్థితి. ఐపీఎల్ 2025లో ప్లేఆఫ్స్ రేసులో నిలవాలంటే తప్పక గెలవాల్సిన మ్యాచ్ లో నేడు (ఏప్రిల్ 30) పంజాబ్ కింగ్స్ తో తలపడుతోంది. ఈ మ్యాచ్ లో టాస్ గెలిచిన పంజాబ్ బౌలింగ్ ఎంచుకుంది.

ఓడితే ఔట్

ఐపీఎల్ 2025లో సీఎస్కేకు డూ ఆర్ డై మ్యాచ్. బుధవారం హోం గ్రౌండ్ లో పంజాబ్ కింగ్స్ తో చెన్నై సూపర్ కింగ్స్ తలపడుతోంది. ఈ మ్యాచ్ లో ఓడితే ప్లేఆఫ్స్ రేసు నుంచి సీఎస్కే నిష్క్రమిస్తుంది. ఈ సీజన్ లో 9 మ్యాచ్ లాడిన ధోని టీమ్ రెండు మాత్రమే గెలిచింది. 7 మ్యాచ్ లు ఓడింది. పంజాబ్ తో మ్యాచ్ లోనే పరాజయం పాలైతే ప్లేఆఫ్స్ ఆశలు ఆవిరవుతాయి.

టీమ్ గా ఆడాల్సిందే

ఈ ఐపీఎల్ సీజన్ లో సీఎస్కే కంప్లీట్ టీమ్ గా ఫెయిల్ అవుతోంది. బ్యాటింగ్, బౌలింగ్ లో రాణించలేకపోతోంది. టీమ్ కెప్టెన్ గా ఎంఎస్ ధోని తిరిగొచ్చినా ఆ జట్టు రాత మారలేదు. ప్లేయర్స్ ను మార్చినా ఆ టీమ్ ఆటతీరులో ఎలాంటి బెటర్ మెంట్ లేదు. మరి హోం గ్రౌండ్ లో పంజాబ్ కింగ్స్ ను ఓడించి, ఆ టీమ్ ప్లేఆఫ్స్ రేసులో ఉంటుందా? లేదా ఓటమితో దెబ్బతింటుందా? చూడాలి.

ఆ మ్యాచ్ రద్దు

మరోవైపు పంజాబ్ కింగ్స్ కూడా మళ్లీ గెలుపు బాట పట్టాలని చూస్తోంది. 9 మ్యాచ్ ల్లో ఆ టీమ్ 5 గెలిచి, 3 ఓడింది. కేకేఆర్ తో గత మ్యాచ్ వర్షం కారణంగా రద్దయింది. దీంతో పంజాబ్ ఖాతాలో 11 పాయింట్లున్నాయి. సీఎస్కేపై గెలిస్తే ప్లేఆఫ్స్ టఫ్ ఫైట్ రేసులో పంజాబ్ అవకాశాలు మరింత మెరుగవుతాయి.

ఆ టీమ్ బ్యాటింగ్ లో యంగ్ ఓపెనర్లు ప్రభ్ సిమ్రన్ సింగ్, ప్రియాన్ష్ ఆర్య అదరగొడుతున్నారు. కెప్టెన్ శ్రేయస్ అయ్యర్ కూడా రాణిస్తున్నాడు. మరోవైపు బౌలింగ్ లో అర్ష్ దీప్, స్పిన్నర్ చాహల్ ఆ టీమ్ కు కీలకంగా మారారు. స్పిన్ కు అనుకూలించే చెపాక్ పిచ్ పై సీనియర్ స్పిన్నర్ చాహల్ కీ రోల్ ప్లే చేసే ఛాన్స్ ఉంది. మ్యాక్స్ వెల్ వేలి గాయంతో ఈ మ్యాచ్ కు దూరమయ్యాడు.