India vs Pakistan : భారత్​- పాక్​ టీ20 వరల్డ్​ కప్​ మ్యాచ్​కు ఉగ్ర ముప్పు.. భారీగా భద్రతా ఏర్పాట్లు!-india vs pakistan t20 world cup match gets terror threat high security deployed ,క్రికెట్ న్యూస్
తెలుగు న్యూస్  /  క్రికెట్  /  India Vs Pakistan : భారత్​- పాక్​ టీ20 వరల్డ్​ కప్​ మ్యాచ్​కు ఉగ్ర ముప్పు.. భారీగా భద్రతా ఏర్పాట్లు!

India vs Pakistan : భారత్​- పాక్​ టీ20 వరల్డ్​ కప్​ మ్యాచ్​కు ఉగ్ర ముప్పు.. భారీగా భద్రతా ఏర్పాట్లు!

Sharath Chitturi HT Telugu
May 30, 2024 07:40 AM IST

India vs Pakistan T20 world Cup : భారత్​ వర్సెస్​ పాకిస్థాన్​ మ్యాచ్​లో అలజడులు సృష్టించాలని ఐసిస్​- కే పిలుపునిచ్చింది. ఫలితంగా పోలీసులు భారీ భద్రతా ఏర్పాట్లు చేసే పనిలో ఉన్నారు.

ప్రాక్టీస్​ చేస్తున్న టీమిండియా ఆటగాళ్లు
ప్రాక్టీస్​ చేస్తున్న టీమిండియా ఆటగాళ్లు (PTI)

India vs Pakistan T20 world Cup match : ఇంకొన్ని రోజుల్లో టీ20 వరల్డ్​ కప్​ ప్రారంభంకానుంది. కానీ.. అందరి చూపు జూన్​ 9న జరిగే భారత్​ వర్సెస్​ పాకిస్థాన్​ మ్యాచ్​పైనే! అయితే.. న్యూయార్క్​ వేదికగా జరగనున్న ఈ మ్యాచ్​కు ఉగ్ర ముప్పు పొంచి ఉందని సమాచారం. మ్యాచ్​లో దాడులకు పాల్పడి అలజడులు సృష్టించాలని ఐసిస్​-కే బృందం.. ఉగ్రవాదులకు పిలుపునివ్వడం ఇందుకు కారణం. ఈ పరిణామాలపై వేగంగా స్పందించిన పోలీసులు.. నాసౌ క్రికెట్​ స్టేడియంలో భారీ భద్రతా ఏర్పాట్లను చేస్తున్నారు.

"భారత్​- పాక్​ మ్యాచ్​కి ఉగ్ర ముప్పు పొంచి ఉంది. అందుకే పటిష్ఠ భద్రతా ఏర్పాట్లు చేస్తున్నాము," అని నాసౌ కౌంటీ పోలీస్​ కమిషనర్​ పాట్రిక్​ రైడర్​ తెలిపారు.

India vs Pakistan t20 world cup : ఏప్రిల్​ తొలినాళ్ల నుంచి మ్యాచ్​కు ఉగ్ర ముప్పుపై వార్తలు వస్తున్నాయని అన్నారు రైడర్​. మ్యాచ్​ను చూసేందుకు భారీ సంఖ్యలో ప్రజలు తరలి వచ్చే అవకాశం ఉన్నందున భద్రతా ఏర్పాట్లో జాప్యం కలగకుండా చూసుకుంటున్నట్టు వివరించారు.

"ఏప్రిల్​ నుంచే టోర్నీకి ఉగ్ర ముప్పు వార్తలు వచ్చాయి. కానీ ఇప్పుడు.. ప్రత్యేకించి ఇండియా- పాక్​ టీ20 వరల్డ్​ కప్​ మ్యాచ్​నే టార్గెట్​ చేస్తున్నట్టు తేలింది," అని రైడర్​ అన్నారు. ఫలితంగా.. మ్యాచ్​ జరగుతున్న స్టేడియం చుట్టూ డ్రోన్స్​తో గస్తీ ఏర్పాట్లు చేశారు.

మరోవైపు.. మ్యాచ్​ నేపథ్యంలో పటిష్ఠ భద్రతా ఏర్పాట్లు చేయాలని పోలీసులకు ఆదేశాళిచ్చారు న్యూయార్క్​ గవర్నర్​ కాథీ హోల్చల్​.

India vs Pakistan t20 world cup 2024 : "ఇప్పటికైతే అంతా బాగానే ఉంది. పరిస్థితులను ఎప్పటికప్పుడు పర్యవేక్షిస్తున్నాము. ఫెడరల్​ ఏజెన్సీలతో మా బృందాలు కొన్ని నెలలుగా పనిచేస్తున్నాయి. న్యూయార్క్​ ప్రజలు, సందర్శకుల రక్షణ మాకు ముఖ్యం," అని కాథీ చెప్పుకొచ్చారు.

భారత్​- పాక్​ మ్యాచ్​ భద్రతా ఏర్పాట్లపై నాసౌ కౌంటీ హెడ్​ బ్రూస్​ బ్లాక్​మాన్​ స్పందించారు.

"ప్రతి విషయాన్ని మేము తీవ్రంగా పరిగణిస్తాము. దేనినీ తక్కువ చేసి చూడము. అన్నింటిని ట్రాక్​ చేస్తాము," అని బ్రూస్​ అన్నారు.

India vs Pakistan : ఇక మ్యాచ్​ నాటికి.. భద్రతా ఏర్పాట్లను మరింత పెంచే అవకాశం ఉంది. స్థానిక ఆసుపత్రులు అలర్ట్​గా ఉంటాయి. అదనపు పోలీసు బలగాలను మోహరిస్తారు.

డ్రోన్​ ద్వారా కూడా దాడులు చేసే అవకాశం ఉన్నందున.. మ్యాచ్​ జరుగుతున్న ప్రాంతంలో నో ఫ్లై జోన్​ని ప్రకటించారు అధికారులు.

కరుడుగట్టిన ఉగ్రవాద సంస్థ ఈ ఐసిస్​-కే! దక్షిణ- మధ్య ఆసియాపై దీని పెట్టు ఎక్కువగా ఉంటుంది. మాస్కోలో జరిగిన ఉగ్రదాడి ఈ ఉగ్రవాద సంస్థే చేసింది. అందుకే.. ఐసిస్​-కే ఉగ్రవాద ప్రకటనలను న్యూయార్క్​ పోలీసులు తీవ్రంగా పరిగణిస్తున్నారు.

టీ20 వరల్డ్ కప్ 2024

సంబంధిత కథనం