ముంబయి చేతిలో జీటీకి షాక్.. కన్నీళ్లలో ఆశిష్ నెహ్రా తనయుడు.. శుభ్‌మన్ సిస్టర్.. వీడియో వైరల్

ఐపీఎల్ 2025లో లీగ్ దశలో అదరగొట్టి.. ఎలిమినేటర్లు కంగుతిన్న గుజరాత్ టైటాన్స్ ఫ్యాన్స్ ను ఏడిపించింది. శుక్రవారం (మే 30) ఎలిమినేటర్ లో ముంబయి ఇండియన్స్ చేతిలో జీటీ ఓడిపోయింది. 20 పరుగుల తేడాతో పరాజయం పాలై ఈ సీజన్ నుంచి నిష్క్రమించింది. దీంతో ఫ్యాన్స్ తో పాటు ఆ టీమ్ ఆటగాళ్లు, సిబ్బంది కుటుంబ సభ్యులూ కన్నీళ్లు పెట్టుకున్నారు. ఇందులో ముఖ్యంగా హెడ్ కోచ్ ఆశిష్ నెహ్రా, కెప్టెన్ శుభ్‌మన్ గిల్ సిస్టర్ ఏడ్చిన వీడియోలు వైరల్ అయ్యాయి.

కన్నీళ్లు ఆపుకోలేక

ముంబయి ఇండియన్స్ 20 పరుగుల తేడాతో గుజరాత్ పై గెలిచింది. మ్యాచ్ ముగిసిన వెంటనే గుజరాత్ టైటాన్స్ హెడ్ కోచ్ ఆశిష్ నెహ్రా కుమారుడు స్టాండ్స్‌లో తీవ్రంగా ఏడుస్తున్నట్లు కనిపించాడు. అతణ్ని ఓదార్చడానికి స్టాండ్స్‌లో చాలా మంది ప్రయత్నించారు. కానీ అతను తన కన్నీళ్లను అదుపు చేయలేకపోయాడు.

శుభ్‌మన్ గిల్ సోదరి షాహ్నీల్ కూడా కన్నీళ్లతో కనిపించింది. స్టాండ్స్‌లో కూర్చున్న ఇతర సభ్యులు ఆమెను ఓదార్చాల్సి వచ్చింది.

టాప్ లో ఉండి కూడా

ఐపీఎల్ 2025 లీగ్ దశలో ఎక్కువ భాగం గుజరాత్ టైటాన్స్ టాప్‌లో ఉంది. కానీ లక్నో సూపర్ జెయింట్స్, చెన్నై సూపర్ కింగ్స్‌లతో జరిగిన తమ చివరి రెండు గ్రూప్ దశ మ్యాచ్‌లలో ఓటమి పాలైంది. ఫలితంగా మూడో స్థానానికి పడిపోయి ముంబయి ఇండియన్స్ తో ఎలిమినేటర్ ఆడాల్సి వచ్చింది. ఇక ఫైనల్లో ప్లేస్ కోసం పంజాబ్ కింగ్స్ తో ఆదివారం (జూన్ 1) క్వాలిఫయర్ 2లో ముంబయి ఇండియన్స్ తలపడనుంది.

రోహిత్, బెయిర్ స్టో అదుర్స్

ముంబయి ఇండియన్స్ కెప్టెన్ హార్దిక్ పాండ్యా ఎలిమినేటర్ మ్యాచ్‌లో టాస్ గెలిచి ముందుగా బ్యాటింగ్ చేయాలని నిర్ణయించుకున్నాడు. గుజరాత్ టైటాన్స్ కీలకమైన క్యాచ్‌లను డ్రాప్ చేయడం వల్ల తమకు తాము ఇబ్బందులు తెచ్చుకున్నారు. కొయెట్జీ, కుశాల్ మెండిస్ సులభమైన క్యాచ్‌లను డ్రాప్ చేయడంతో రోహిత్ శర్మకు రెండు అవకాశాలు లభించాయి.

ర్యాన్ రికిల్టన్ స్థానంలో ఆడిన జానీ బెయిర్‌స్టో, రోహిత్ శర్మతో 84 పరుగుల భాగస్వామ్యాన్ని ఏర్పాటు చేశాడు. బెయిర్‌స్టో చివరికి సాయి కిషోర్ బౌలింగ్‌లో 47 పరుగులకు ఔట్ అయ్యాడు.

రోహిత్ శర్మ తన అవకాశాలను సద్వినియోగం చేసుకుని 50 బంతుల్లో 9 ఫోర్లు మరియు 4 సిక్స్‌ల సహాయంతో 81 పరుగుల అద్భుతమైన ఇన్నింగ్స్ ఆడాడు. చివరికి ముంబయి ఇండియన్స్ 20 ఓవర్లలో 5 వికెట్ల నష్టానికి 228 పరుగులు చేసింది.

సాయి సుదర్శన్ పోరాటం

గుజరాత్ టైటాన్స్ ఛేజ్‌లో తొలి ఓవర్‌లోనే కెప్టెన్ శుభ్‌మన్ గిల్‌ను కోల్పోయింది. సాయి సుదర్శన్ (80), వాషింగ్టన్ సుందర్ (48) గుజరాత్‌ను ఛేజ్‌లో ఉంచడానికి తమ వంతు కృషి చేశారు. అయితే లాస్ట్ లో బుమ్రా, బౌల్ట్ ఆ టీమ్ ను దెబ్బకొట్టారు.