US Education Department : ఏకంగా అమెరికా విద్యాశాఖనే మూసేసిన ట్రంప్! ఎందుకు?
US Education Department news : అమెరికా విద్యాశాఖను మూసివేసే ప్రక్రియను ప్రారంభించే కార్యనిర్వాహక ఉత్తర్వుపై అమెరికా అధ్యక్షుడు డొనాల్డ్ ట్రంప్ తాజాగా సంతకం చేశారు. యూఎస్ ఎడ్యుకేషన్ డిపార్ట్మెంట్ని ఆయన ఎందుకు మూసేశారు? దీని ప్రభావం ఎలా ఉంటుంది? పూర్తి వివరాలు..
అమెరికా అధ్యక్షుడు డొనాల్డ్ ట్రంప్ మరో సంచలనం నిర్ణయం తీసుకున్నారు! ఈసారి.. ఏకంగా అమెరికన్ ఎడ్యుకేషన్ డిపార్ట్మెంట్ మొత్తాన్నే మూసేశారు. ఈ మేరకు విద్యాశాఖను ‘డిస్మాంటిల్’ చేసేందుకు గురువారం ఎగ్జిక్యూటివ్ ఆర్డర్లపై సంతకం చేశారు.
అమెరికా విద్యాశాఖ తొలగింపు అనేది ట్రంప్ ఎన్నికల వాగ్దానాల్లో ఒకటి. అంతేకాదు, యూఎస్ ఎడ్యుకేషన్ డిపార్ట్మెంట్ని రద్దు చేయాలని అమెరికాలోని కన్జర్వేటివ్లు ఎన్నో ఏళ్లుగా డిమాండ్ చేస్తున్నారు.
'45 ఏళ్ల చరిత్రాత్మక చర్యను ఈ రోజు తీసుకున్నాం. ఫెడరల్ డిపార్ట్మెంట్ ఆఫ్ ఎడ్యుకేషన్ని శాశ్వతంగా తొలగించే కార్యనిర్వాహక ఉత్తర్వుపై సంతకం చేశాను. అది కరెక్ట్ అని డెమొక్రాట్లకూ తెలుసు. అంతిమంగా అది వారి ముందుకు రావచ్చు కాబట్టి వారు దీనికి ఓటు వేస్తారని నేను ఆశిస్తున్నాను," అని ట్రంప్ అన్నారు.
యూఎస్ డిపార్ట్మెంట్ ఆఫ్ ఎడ్యుకేషన్ అంటే?
యూఎస్ డిపార్ట్మెంట్ ఆఫ్ ఎడ్యుకేషన్ అనేది 1979లో జిమ్మీ కార్టర్ సృష్టించిన క్యాబినెట్ స్థాయి విభాగం. ఇది జాతీయ విద్యా విధానాన్ని పర్యవేక్షిస్తుంది. దేశవ్యాప్తంగా పాఠశాలలకు సమాఖ్య సహాయ కార్యక్రమాలను నిర్వహిస్తుంది.
విద్య కోసం ఫెడరల్ ఆర్థిక సహాయాన్ని పంపిణీ చేయడం, యూఎస్ పాఠశాలల డేటాను సేకరించడం, ప్రధాన విద్యా సమస్యలను గుర్తించడం, వివక్షను నిషేధించే ఫెడరల్ విద్యా చట్టాలను అమలు చేయడం, కాంగ్రెషనల్ ఎడ్యుకేషన్ చట్టాన్ని అమలు చేయడం వంటివి అమెరికా విద్యాశాఖ ప్రధాన బాధ్యతల్లో ఉన్నాయి.
ఇది ఫెడరల్ స్టూడెంట్ ఎయిడ్ కార్యక్రమాలను నిర్వహిస్తుంది. 13 మిలియన్లకు పైగా విద్యార్థులకు బిలియన్ల గ్రాంట్లు, వర్క్-స్టడీ ఫండ్స్, రుణాలను అందించింది.
వెనుకబడిన విద్యార్థులకు ప్రత్యేక విద్య, స్టడీకి సంబంధించిన కార్యక్రమాలను అమెరికా విద్యాశాఖ పర్యవేక్షిస్తుంది.
ట్రంప్ చట్టబద్ధంగా ప్రభుత్వ సంస్థను తొలగించగలరా?
చట్టం ప్రకారం.. 1979లో సృష్టించిన విద్యాశాఖ - కాంగ్రెస్ ఆమోదం లేకుండా మూతపడలేదు. రిపబ్లికన్లకు దానిని అమలు చేయడానికి ప్రస్తుత కాంగ్రెస్లో బలం లేదు! అధ్యక్షుడి కార్యనిర్వాహక అధికారం మాత్రమే సరిపోదు.
ఈ విషయం వైట్ హౌస్కి కూడా తెలుసు. యూఎస్ ఎడ్యుకేషన్ డిపార్ట్మెంట్ని పూర్తిగా తొలగించడానికి కాంగ్రెస్లో తమకు అవసరమైన ఓట్లు లేవని పరిపాలన అధికారులు ధృవీకరించారు.
డిపార్ట్మెంట్ ఆఫ్ ఎడ్యుకేషన్ని ట్రంప్ ఎందుకు తొలగించారు?
విద్య పూర్తిగా ప్రభుత్వ, స్థానిక నియంత్రణలో ఉండాలని వాదిస్తూ విద్యాశాఖ అవసరాన్ని విమర్శకులు చాలాకాలంగా ప్రశ్నిస్తున్నారు. ఏదేమైనా, దాని మద్దతుదారులు విద్యా సమానత్వాన్ని రక్షించడంలో, బలహీన జనాభాకు సేవలందించే పాఠశాలలకు చాలా అవసరమైన సమాఖ్య మద్దతును అందించడంలో ఇది కీలక పాత్ర పోషిస్తుందని పేర్కొన్నారు.
వైట్ హౌస్.. యూఎస్ డిపార్ట్మెంట్ ఆఫ్ ఎడ్యుకేషన్ 1979 నుంచి 3 ట్రిలియన్ డాలర్ల కన్నా ఎక్కువ ఖర్చు చేసింది. అప్పటి నుంచి, ప్రతి విద్యార్థి ఖర్చు 245 శాతానికి పైగా పెరిగింది.
అయితే ఇంత ఖర్చు చేసినా పెద్దగా ప్రయోజనం లేదని తెలుస్తోంది. వైట్ హౌస్ డేటా ప్రకారం 13 ఏళ్ల పిల్లల గణితం, రీడింగ్ స్కోర్లు దశాబ్దాల్లో అత్యల్ప స్థాయిలో ఉన్నాయి. నాలుగో తరగతిలో పది మందిలో ఆరుగురు, ఎనిమిదో తరగతిలో మూడొంతుల మందికి గణితంలో ప్రావీణ్యం లేదు.
10 మంది నాలుగో తరగతి, ఎనిమిదో తరగతి విద్యార్థుల్లో ఏడుగురు చదవడంలో ప్రావీణ్యం సాధించకపోగా, నాలుగో తరగతి విద్యార్థుల్లో 40 శాతం మంది ప్రాథమిక పఠన స్థాయిలను కూడా చేరుకోలేకపోతున్నారు.
ఇన్ని ఘోర వైఫల్యాలు ఉన్నప్పటికీ చాలా తక్కువ కాలంలోనే విద్యాశాఖ బడ్జెట్ 600 శాతం పెరిగిందని ట్రంప్ అన్నారు.
విద్యాశాఖ ఎవరికీ విద్యాబుద్ధులు నేర్పనప్పటికీ, 80 మందికి పైగా సిబ్బందితో కూడిన ప్రజాసంబంధాల కార్యాలయాన్ని ఏడాదికి 10 మిలియన్ డాలర్లకు పైగా ఖర్చుతో మెయిన్టైన్ చేస్తోందని ఉత్తర్వుల్లో పేర్కొన్నారు.
సిబ్బందిని సగానికి తగ్గించి, ఆ శాఖను నిర్వీర్యం చేస్తున్నామని ట్రంప్ చెప్పారు. 'మా ప్రభుత్వం బలగాల తగ్గింపునకు శ్రీకారం చుట్టింది. బ్యూరోక్రాట్ల సంఖ్యను సగానికి తగ్గించాము," అని చెప్పారు.
విద్యార్థులపై ఎలాంటి ప్రభావం చూపుతుంది?
అమెరికా విద్యాశాఖను మూసివేయడం వల్ల అట్టడుగు విద్యార్థులు ఎక్కువగా ప్రమాదంలో పడతారని నిపుణులు తెలిపారు. ఫెడరల్ కార్యక్రమాలు ప్రత్యేక విద్య, ఆంగ్ల భాషా అభ్యాసకులు, వెనుకబడిన విద్యార్థులకు మద్దతు ఇస్తాయి కాబట్టి, వారు ప్రభావాన్ని ఎదుర్కొంటారు.
వికలాంగుల విద్యార్థులకు రక్షణ కల్పించే ఇండివిడ్యువల్స్ విత్ డిసెబిలిటీస్ ఎడ్యుకేషన్ యాక్ట్ (ఐడియా) ఈ విభాగం ద్వారా ఫెడరల్గా అమలవుతోంది.
వికలాంగ విద్యార్థులకు, స్కాలర్షిప్లకు వినియోగించే నిధులను భద్రపరుస్తామని, ఈ విధులను ఇతర సంస్థలకు అందిస్తామని అమెరికా అధ్యక్షుడు తెలిపారు.
“విద్యార్థులు, కుటుంబాలు, సమాజానికి ఏది మంచిదో అది చేసే విధంగా రాష్ట్రాలను బలోపేతం చేస్తాము,” అని లిండ మెక్మహన్ తెలిపారు.
Sharath Chitturi
సంబంధిత కథనం