ఐఐటీ క్రాక్ చేయలేకపోయినా 50 లక్షలపైనే జీతం తీసుకుంటున్నా.. టెక్కీ పోస్ట్ వైరల్

చాలా మంది ఐఐటీ, నిట్‌లాంటి ప్రతిష్టాత్మక సంస్థల్లో సీట్ రాకుంటే డిప్రెషన్‌కి గురవుతారు. తర్వాత జీవితాన్నే పాడు చేసుకుంటారు. కానీ ఓ వ్యక్తి అలాంటి సంస్థల్లో ప్రయత్నించి విఫలమయ్యాడు. కానీ మంచి జీతాన్ని తీసుకుంటున్నాడు. ఎక్కడో ఓ దగ్గర మీకోసం మంచి అవకాశం ఎదురుచూస్తూ ఉంటుందని చెబుతున్నాడు.

ప్రదీప్ కుమార్ సైనీ అనే వ్యక్తి తన స్పూర్తిదాయకమైన వృత్తిపరమైన ప్రయాణాన్ని సోషల్ మీడియాలో పంచుకున్నాడు. అతను ఐఐటీ, నిట్ వంటి ప్రతిష్టాత్మక సంస్థల్లో ప్రవేశం పొందడంలో విఫలమయ్యాడు. టైర్ -2 కళాశాల జాయిన్ అయి.. ఎలా తన కెరీర్‌ను తక్కువ జీతంతో ప్రారంభించాడో వివరించాడు. కరోనా సమయంలో మూడు నెలల నిరుద్యోగాన్ని ఎదుర్కొన్నాడు. ఇప్పుడు ఏడాదికి 50 లక్షల కంటే ఎక్కువ సంపాదించే స్థితికి చేరుకున్నాడు .

ప్రదీప్ కుమార్ సైనీ తన ప్రయాణాన్ని ఇన్‌స్టాగ్రామ్, లింక్డ్‌ఇన్‌లో పంచుకున్నాడు. 'ఇప్పటి వరకు నా ప్రయాణం' అని రాశాడు. మారుతున్న కాలం, సాంకేతికతలకు అనుగుణంగా తనను తాను ఎలా అభివృద్ధి చేసుకున్నాడో డాక్యుమెంట్ చేశాడు.

నెటిజన్లు ఈ సైనీ పోస్ట్‌పై వివిధ రకాలుగా స్పందిస్తున్నారు. 'అవసరమైనప్పుడు మీరు సంతోషంగా ఉన్నారా? ఈ రోజు మీ వయస్సు 40 ప్లస్ ఉంటాయి. అవసరమైనప్పుడు మీరు వాటిని సాధించలేదు. మీరు ఆలస్యం చేశారు. ఇది సంతోషం కాదు, రాజీ పడటం.' అని ఓ వ్యక్తి కామెంట్ చేశాడు.

దీనిపై ప్రదీప్ కుమార్ సైనీ స్పందించాడు. 'నాకు సమయానికి అన్ని విషయాలు వచ్చాయి. నా వయస్సు 39. వయస్సు కేవలం ఒక సంఖ్య. నేను 8 సంవత్సరాల తర్వాత బాగా సంపాదించడం ప్రారంభించాను. ఇంకా నాకు వయసు ఉంది. నేను సంతోషంగా, జీవితాన్ని ఆనందిస్తున్నాను.' అని బదులిచ్చాడు.

సైనీ లింక్డ్ ఇన్ ప్రొఫైల్ ప్రకారం ఉత్తరప్రదేశ్‌లోని డాక్టర్ ఏపీజే అబ్దుల్ కలాం టెక్నికల్ యూనివర్సిటీలో బీటెక్ పూర్తి చేశాడు. జీ ఎంటర్‌టైన్‌మెంట్ ఎంటర్‌ప్రైజెస్ లిమిటెడ్‌లో చేరడానికి ముందు షాప్‌క్లూస్, పేటీఎం, హెల్త్‌కార్ట్‌తో సహా వివిధ కంపెనీలకు పనిచేశాడు.

2024లో కంటెంట్ క్రియేటర్‌గా తన ప్రయాణాన్ని ప్రారంభించాడు. యూట్యూబ్ ఛానెల్‌ని నడుపుతున్నాడు. కోడింగ్, సిస్టమ్ డిజైన్, ఇంటర్వ్యూ చిట్కాలు, ఔత్సాహిక సాఫ్ట్‌వేర్ ఇంజనీర్‌ల కోసం కెరీర్ సలహాలపై ట్యుటోరియల్‌లను పోస్ట్ చేస్తాడు.