Education Loan : ఎడ్యుకేషన్ లోన్ తీసుకునే ముందు ఈ విషయాలు చూసుకోండి!

ఉన్నత చదువుల కోసం బ్యాంకులు, ఆర్థిక సంస్థలు విద్యా రుణాలను అందిస్తాయి. ఈ రుణాలు సాధారణంగా కోర్సు కాలంలో అయ్యే ట్యూషన్ ఫీజులు, వసతి ఖర్చులు, అధ్యయన సామగ్రి, ఇతర సంబంధిత ఖర్చులకు ఉపయోగపడతాయి. విద్యా రుణాలు వస్తే.. విద్యార్థుల భవిష్యత్తుకు ఎంతగానో ఉపయోగకరంగా ఉంటాయి. వివిధ ఆర్థిక నేపథ్యాల నుండి వచ్చిన విద్యార్థులు భారతదేశంలో లేదా విదేశాలలో తమ విద్యను అభ్యసించడానికి ఈ రుణాల కోసం దరఖాస్తు చేసుకోవచ్చు. కోర్సు ఫీజులు, సంస్థ ఖ్యాతి, దరఖాస్తుదారుడి ఆర్థిక పరిస్థితుల ఆధారంగా మంజూరు చేసే రుణ మెుత్తాన్ని నిర్ణయిస్తారు.

గ్రేస్ పీరియడ్

సాధారణంగా కోర్సు పూర్తయిన తర్వాత విద్యా రుణాల తిరిగి చెల్లింపు మెుదలవుతుంది. కొంతమంది రుణదాతలు గ్రేస్ పీరియడ్ అందిస్తారు. మీ చెల్లింపుల కోసం ఈ గ్రేస్ పీరియడ్ చూసుకోవాలి. రుణగ్రహీతలు తిరిగి చెల్లింపులు ప్రారంభించే ముందు ఉపాధిని పొందేందుకు అనుమతి ఉంటుంది. తిరిగి చెల్లించే వ్యవధి పొడిగించవచ్చు.

వడ్డీ రేటు

వడ్డీ రేటును చెక్ చేసుకోవాలి. విద్యా రుణాలపై వడ్డీ రేట్లు రుణ సంస్థ, రుణ మొత్తం, ప్రస్తుత మార్కెట్ పరిస్థితుల ఆధారంగా మారే అవకాశం ఉంటుంది. చాలా బ్యాంకులు పోటీపడి మరి వడ్డీ రేట్లను అందిస్తున్నాయి. కొన్ని ప్రణాళికలు విద్యార్థులకు సబ్సిడీ వడ్డీ రేట్లను కూడా ఇస్తాయి.

క్రెడిట్ ప్రభావితం కాకుండా

ఎడ్యుకేషన్ లోన్ పొందే ముందు కొన్ని ముఖ్యమైన అంశాలను చెక్ చేయాలి. నిబంధనలు, షరతులను పూర్తిగా అర్థం చేసుకోవాలి. మన క్రెడిట్ చరిత్రను ప్రభావితం చేయకుండా ఉండటానికి మనం సకాలంలో తిరిగి చెల్లించాలి. లేదంటే భవిష్యత్తులో మీకు సమస్యలు రావొచ్చు.

పన్ను మినహాయింపు

విద్యార్థుల చదువుకు అయ్యే ఖర్చు, ఆర్థిక అవసరాలను పూర్తిగా పరిగణనలోకి తీసుకున్న తర్వాత విద్యా రుణాలు ప్రయోజనకరంగా ఉంటాయి. మీ విద్యా రుణాన్ని తిరిగి చెల్లించడానికి ఆదాయపు పన్ను చట్టంలోని సెక్షన్ 80ఈ కింద మినహాయింపు పొందవచ్చు.

15 ఏళ్లు

మీ చదువు కోసం రూ. 1 కోటి వరకు కూడా రుణం పొందవచ్చు. సాధారణంగా పదిహేను సంవత్సరాలు గరిష్ట తిరిగి చెల్లించే కాలం ఉంటుంది. అయితే రిపేమెంట్ షెడ్యూల్ అనేది బ్యాంకులు, కోర్సు, మీరు చెల్లింపు చేసే సమయాన్ని బట్టి మారవచ్చు. భారతదేశం, విదేశాల్లో చదవాలనుకునే విద్యార్థులకు కూడా రుణాలు వస్తాయి. విదేశాలలో చదువుకోవడానికి వీసా జారీ చేసే ముందు, కొంతమంది రుణదాతలు కొంత మొత్తం లోన్ ఇస్తారు.

ఉద్యోగం పొందిన తర్వాత

విద్యార్థి రుణాలు ట్యూషన్ ఫీజులు, బోర్డింగ్ ఫీజులు, ప్రయాణం, వసతి ఖర్చులు, విద్యార్థి చదువు సమయంలో చేసే ఏవైనా ఇతర ఖర్చులను కవర్ చేస్తాయి. రుణ చెల్లింపు తాత్కాలికంగా ఉండవు కాబట్టి.. విద్యార్థులు తమ చదువులపై దృష్టి పెట్టవచ్చు. తమ కోర్సు పూర్తి చేసి ఉద్యోగం పొందిన తర్వాత తిరిగి చెల్లించడం మెుదలుపెట్టవచ్చు.