నీట్‌లో ర్యాంకు రాలేదా? విదేశాల్లోని ఈ కాలేజీల్లో చౌకగా ఎంబీబీఎస్ చదువు!

నీట్ యూజీ 2025 రిజల్ట్ వచ్చిన తర్వాత ఆశించిన ర్యాంకు రాలేదు కానీ డాక్టర్ కావాలనే తపన గుండెల్లో ఉందా? కంగారు పడకండి. చాలా దేశాలు చాలా తక్కువ ఖర్చుతో ఎంబీబీఎస్ విద్యను పూర్తి చేసేందుకు అవకాశం కల్పిస్తున్నాయి. చైనా, రష్యా, కిర్గిజిస్తాన్, కజకిస్తాన్, ఫిలిప్పీన్స్ వంటి దేశాల్లో వైద్య విద్య ఆర్థికంగానే కాకుండా ప్రపంచవ్యాప్తంగా గుర్తింపు పొందింది.

భారతదేశంలో ప్రభుత్వ వైద్య సీట్ల కొరత, ప్రైవేటు కాలేజీల ఫీజులు విపరీతంగా పెరగడంతో ఏటా లక్షలాది మంది విద్యార్థులు విదేశాలకు వెళ్తున్నారు. దీనికి ప్రధాన కారణం తక్కువ ఫీజులు, ప్రపంచ స్థాయి విద్య, ఎన్ఎంసీ (గతంలో ఎంసీఐ) గుర్తింపు పొందిన కళాశాలలు.

వార్షిక ఫీజులు!

రష్యా వంటి దేశంలో ఎంబీబీఎస్ వార్షిక ఫీజు కేవలం రూ.1.75 లక్షల నుంచి ప్రారంభమవుతుంది. అదే సమయంలో చైనాలోని హెబీ యునైటెడ్ యూనివర్సిటీ(హెచ్ఈయూటీ)లో ఐదేళ్ల ఎంబీబీఎస్ కోర్సు ఏడాదికి రూ.1.25 లక్షలకు లభిస్తుంది. రష్యాలోని ఒరెన్ బర్గ్ స్టేట్ మెడికల్ యూనివర్శిటీలో మొదటి సంవత్సరం ఫీజు రూ.3.40 లక్షలు. విదేశాల్లో తక్కువ ఖర్చుతో ఎంబీబీఎస్ చదవాలనుకుంటే కొన్ని ఎంపిక చేసిన దేశాలు ఇందుకు మంచి ఆప్షన్ గా నిలుస్తాయి. ఇతర ఖర్చులు కలుపుకొంటే మెుత్తం పెరుగుతాయని గుర్తుంచుకోవాలి.

మొత్తం ఖర్చు అంచనా!

రష్యాలో ఎంబీబీఎస్ కోర్సుకు మొత్తం ఖర్చు సుమారు 18 నుంచి 35 లక్షల రూపాయల వరకు ఉంటుంది. కిర్గిజిస్తాన్ కూడా మంచి ఎంపిక. ఇక్కడ చదవడానికి ఖర్చు సుమారు 15 నుండి 22 లక్షల రూపాయలు. అదేవిధంగా కజకిస్థాన్ లో ఎంబీబీఎస్ ఫీజు రూ.18 నుంచి రూ.25 లక్షల వరకు ఉంటుందని, ఇక్కడ కోర్సు సాధారణంగా 5 సంవత్సరాల్లో పూర్తవుతుంది.

చైనా కూడా భారతీయ విద్యార్థులలో ప్రాచుర్యం పొందింది. ఇక్కడ మొత్తం ఖర్చు రూ .15 నుండి 35 లక్షల మధ్య ఉంటుంది. అదే సమయంలో ఫిలిప్పీన్స్ లో ఎంబీబీఎస్ చదవడానికి అయ్యే ఖర్చు సుమారు 20 నుంచి 30 లక్షల రూపాయలు. నాణ్యమైన వైద్య విద్య, తక్కువ ఖర్చు కారణంగా ఈ దేశాలన్నీ భారతీయ విద్యార్థులలో బాగా ప్రాచుర్యం పొందుతున్నాయి.

వైద్య విశ్వవిద్యాలయాలు, వాటి వార్షిక ఫీజులు చూద్దాం..

HEUT చైనా - రూ.1,25,000

JUTCM చైనా - రూ.1,90,984

LNU ఫిలిప్పీన్స్ - రూ.2,50,000

LSMU ఉక్రెయిన్ - రూ.3,10,720

ఒరెన్ బర్గ్ స్టేట్ మెడికల్ యూనివర్శిటీ, రష్యా - రూ.3,40,938

విదేశాల్లో ఎందుకు ఎంచుకుంటున్నారు?

మన దగ్గర ప్రైవేటు కాలేజీల్లో ఎంబీబీఎస్ విద్య రూ.50 లక్షల నుంచి రూ.1.5 కోట్ల వరకు ఉంటే, విదేశాల్లో ఈ ఖర్చు సగానికి ఉంది. అంతేకాక ఈ దేశాల ప్రభుత్వాలు వైద్య అధ్యయనాలను ప్రోత్సహించడానికి ఫీజులను నియంత్రణలో ఉంచుతాయి. విదేశాల్లో మీకు తక్కువ ఖర్చుతో డాక్టర్ కావడానికి అవకాశం ఉంది.