H-1B visa FAQs : యూఎస్​ స్టూడెంట్​ వీసాని హెచ్​-1బీ వీసాగా మార్చుకోవచ్చా?

అమెరికాలో చదువుకోవాలని, అక్కడ ఉద్యోగం చేయాలని చాలా మంది భారతీయులు కలలు కంటూ ఉంటారు. అమెరికాలో వరల్డ్​ క్లాస్​ యూనివర్సిటీల్లో, మంచి ఎక్స్​పోజర్​ లభిస్తుండటం ఇందుకు కారణం. ఇందులో భాగంగానే ఏటా లక్షలాది మంది భారతీయులు స్టూడెంట్​ వీసా మీద అమెరికాకు వెళుతుంటారు. మరి మీరు కూడా అమెరికాలో చదువుకు ప్లాన్​ చేస్తున్నారా? ఎఫ్​-1 వీసా, హెచ్​-1బీ వీసా అంటే ఏంటో అర్థం కావడం లేదా? అయితే ఇది మీకోసమే. అమెరికాలో చదువు కోసం ఇచ్చే ఎఫ్​-1 వీసా అంటే ఏంటి? ఈ స్టూడెంట్​ వీసాని ఉద్యోగాల కోసం ఇచ్చే హెచ్​-1బీ వీసాగా మార్చుకోవచ్చా? వంటి వివరాలను ఇక్కడ తెలుసుకోండి..

ప్రశ్న:- ఎఫ్​-1 స్టూడెంట్​ వీసా అంటే ఏంటి?

సమాధానం- ఎఫ్​-1 వీసా అనేది నాన్​-ఇమ్మిగ్రెంట్​ వీసా. అమెరికా విశ్వవిద్యాలయాల్లో చదువుకునేందుకు అంతర్జాతీయ విద్యార్థులకు ఈ వీసాలు జారీ చేస్తారు. ఈ వీసా పొందాలంటే, విద్యార్థులు ముందు గుర్తింపు పొందిన విశ్వవిద్యలయ్యాల్లో ఫుల్​-టైమ్​ స్టూడెంట్​గా సీటు పొందాలి. అంతేకాదు అమెరికాలో చదువుకు సంబంధించి తగిన ఆర్థిక వనరులను కూడా చూపించాలి.

అంతేకాదు, చదువు ముగిసిన తర్వాత సొంత దేశాలకు తిరిగి వెళ్లిపోతామని అప్లికెంట్లు స్పష్టంగా చెప్పాలి. అకాడమిక్​ ప్రోగ్రామ్స్​ డ్యూరేషన్​ మొత్తాన్ని ఎఫ్​-1 వీసా కవర్​ చేస్తుంది. అయితే, ఈ ఎఫ్​-1 స్టూడెంట్​ వీసాతో పాటు సాధారణంగా తాత్కాలిక ఉద్యోగ అవకాశాల కోసం ఓపీటీ (ఆప్షనల్​ ప్రాక్టికల్​ ట్రైనింగ్​), సీపీటీ (కరిక్యులర్​ ప్రాక్టికల్​ ట్రైనింగ్​) వంటి ప్రోగ్రామ్స్​కి అర్హత పొందొచ్చు. ఫలితంగా చదువు పూర్తైన తర్వాత కొంతకాలం అక్కడ ఉద్యోగం చేసుకోవచ్చు.

ప్రశ్న:- హెచ్​-1బీ వీసా అంటే ఏంటి?

సమాధానం- నైపుణ్యం గల విదేశీ ఉద్యోగులు రిక్రూట్​మెంట్​ చేసేందుకు అమెరికా ప్రభుత్వం ఇచ్చే అవకాశం ఈ హెచ్​-1బీ వీసా. అమెరికాలో ఉద్యోగం, స్థిరపడాలన్న కోరికలు ఉన్న అంతర్జాతీయ విద్యార్థులకు ఈ హెచ్​-1బీ వీసా చాలా చాలా కీలకం.

సాధారణంగా ఈ హెచ్​-1బీ వీసాలో ఐటీ, ఫైనాన్స్​, ఇంజినీరింగ్​, హెల్త్​కేర్​, ఆర్కిటెక్చర్​ వంటి రంగాలను కవర్​ చేస్తారు.

హెచ్​-1బీ వీసా స్పాన్సర్​ చేయాలంటే కంపెనీలకు కూడా కొన్ని రూల్స్​ ఉంటాయి. డిపార్ట్​మెంట్​ ఆఫ్​ లేబర్​ వద్ద సదరు కంపెనీ యజమాని ఎల్​సీఏ (లేబర్​ కండీషన్​ అప్లికేషన్​) ఫైల్​ చేయాలి. యూఎస్​ సిటీజెన్​షిప్​ అండ్​ ఇమ్మిగ్రేషన్​ సర్వీసెస్​కి ఫామ్​ ఐ-129 సబ్మీట్​ చేయాలి.

ప్రశ్న:- ఎఫ్​-1 స్టూడెంట్​ వీసాని హెచ్​-1బీ వర్క్​ వీసాగా మార్చుకోవచ్చా?

సమాధానం- మార్చుకోవచ్చు. కానీ దీనికి కొన్ని కండీషన్స్​ ఉంటాయి.

ప్రశ్న:- ఎఫ్​-1వీసాని హెచ్​-1బీ వీసాగా ఎలా కన్వర్ట్​ చేసుకోవాలి?

సమాధానం- అమెరికాలోని సంస్థ ఉద్యోగాన్ని స్పాన్సర్​ చేసేందుకు సిద్ధంగా ఉంటే, అంతర్జాతీయ విద్యార్థులు ఎఫ్​-1 వీసాని హెచ్​-1బీ వీసాకు మార్చుకోవచ్చు. కానీ ప్రస్తుత పరిస్థితుల్లో ఇది చెప్పినంత సులభం కాదు.

హెచ్​-1బీ వీసా అభ్యర్థి తరఫున యజమాని ఐ-129 ఫామ్​ ఫైల్​ చేయాలి. అయితే, హెచ్​-1బీ వీసాల జారీకి అమెరికాలో కటాఫ్​ ఉంటుంది! అంటే.. ప్రతియేటా కేవలం 65వేల జనరల్​ స్లాట్స్​ ఉంటాయి. మరో 20వేల స్లాట్స్​ని రిజర్వ్​లో ఉంచుతారు. పైగా వీటిని లాటరీ విధానంలో పిక్​ చేస్తారు! అంటే, యజమాని అప్లై చేసిన వెంటనే హెచ్​-1బీ వీసా రాకపోవచ్చు.

ఒక్కోసారి ఎఫ్​-1 వీసా గడువు ముగిసి, హెచ్​-1బీ వీసా పరిమితి మొదలవ్వడం మధ్య గ్యాప్​ ఉంటుంది. దీనిని భర్తీ చేసేందుకు అభ్యర్థుల వీసాని అధికారులు పొడగించవచ్చు. ఫలితంగా హెచ్​-1బీ స్టేటస్​ అమల్లోకి వచ్చేంతవరకు అభ్యర్థులు లీగల్​గా అమెరికాలో కొనసాగవచ్చు. యూఎస్​సీఐఎస్​ అనుమతితో సదరు అభ్యర్థి లీగల్​గా అమెరికాలో పనిచేసుకోవచ్చు.

ఎఫ్​-1 స్టూడెంట్​ వీసా గడువు ముగిసి, హెచ్​-1బీ వీసా రాకపోతే కష్టాలు మొదలవుతాయి! ఇలాంటి వారిని అక్రమ వలసదారులుగా పరిగణిస్తారు. స్వదేశాలకు పంపించేస్తారు.