H1-B visa: హెచ్ 1బీ వీసా వ్యవస్థలో కీలక మార్పులు; ఇక ఆ రికార్డులు డిలీట్

H1-B visa: 2025, మార్చి 20, గురువారం నుంచి హెచ్-1బీ వీసా ప్రోగ్రామ్ లో గణనీయమైన మార్పులు చోటుచేసుకుంటున్నాయి. హెచ్1 బీ వీసా దరఖాస్తులను పరిశీలించి, వీసాలను జారీ చేసే ఫారిన్ లేబర్ యాక్సెస్ గేట్ వే (FLAG) లోని పాత దరఖాస్తులను తొలగించాలని ట్రంప్ ప్రభుత్వం నిర్ణయించింది. ఈ ప్రక్రియ కోసం యూఎస్ సిటిజన్ షిప్ అండ్ ఇమ్మిగ్రేషన్ సర్వీసెస్ (USCIS) కొత్త విధానాన్ని అమలు చేస్తోంది.

హెచ్1 బీ వీసా సిస్టమ్ లో..

అమెరికాలో ఉద్యోగం చేయాలనుకునే నైపుణ్యం కలిగిన విదేశీ కార్మికులకు హెచ్-1బీ వీసా విధానం ప్రధాన మార్గం. ఈ ప్రక్రియను మరింత పారదర్శకంగా, సమర్థవంతంగా నిర్వహించేందుకు డొనాల్డ్ ట్రంప్ ప్రభుత్వం ఈ కొత్త విధానాన్ని అమలు చేయనుంది.

ఐదేళ్ల కంటే పాత రికార్డులు

మార్చి 20వ తేదీ నుంచి ఫారిన్ లేబర్ యాక్సెస్ గేట్ వే (ఫ్లాగ్) లోని ఐదేళ్ల కంటే పాత రికార్డులు సిస్టమ్ నుంచి ఆటోమేటిక్ గా డిలీట్ చేయబడతాయి. ఉదాహరణకు, మీ వీసా దరఖాస్తు ఒకవేళ మార్చి 20 నాటికి ఐదేళ్ల క్రితం నాటిది, అంటే, మార్చి 20, 2020 కన్నా ముందు నాటిది అయితే, అది ఫ్లాగ్ రికార్డుల్లో అందుబాటులో ఉండదు. అలా ప్రతీ రోజు, అంతకుముందు 5 ఏళ్ల క్రితం వీసా రికార్డులు ఆటోమేటిక్ గా డిలీట్ అవుతుంటాయి.

ఉద్యోగులకు సూచనలు

అందువల్ల, తమ ఉద్యోగులకు సంబంధించిన ఐదేళ్ల క్రితం నాటి వీసా దరఖాస్తులను వెంటనే డౌన్ లోడ్ చేసుకోవాలని ప్రభుత్వం అమెరికా లోని కంపెనీలను కోరింది. మార్చి 20 నుండి ఐదేళ్లు దాటిని అన్ని హెచ్ -1 బీతో సహా అన్ని తాత్కాలిక లేబర్ కండిషన్ అప్లికేషన్లను తొలగించనున్నారు. బదులుగా, యుఎస్సీఐఎస్ కొత్త దరఖాస్తు ప్రక్రియను ప్రారంభిస్తుంది. ఇది దరఖాస్తుదారులందరికీ మరింత నిష్పాక్షికంగా మరియు సమానంగా ఉంటుంది.

కొత్త విధానంతో ప్రయోజనాలు..

మునుపటి విధానంలో, ఒకే వ్యక్తి కోసం వేర్వేరు కంపెనీలు వేర్వేరు దరఖాస్తులను సమర్పించవచ్చు. దాంతో, ఆ వ్యక్తికి సంబంధించి ఒకటికి మించిన దరఖాస్తులు హెచ్ 1 బీ లాటరీలో ఎంట్రీ అవుతాయి. అయితే హెచ్-1బీ వీసాల కోసం ప్రారంభించనున్న కొత్త విధానంలో ఎంత మంది యజమానులు దరఖాస్తు చేసినా, ఒక వ్యక్తికి సంబంధించి ఒకే దరఖాస్తు లాటరీ సిస్టమ్ లోకి ఎంట్రీ అవుతుంది. తద్వారా, దరఖాస్తుదారులందరికీ సమాన అవకాశం లభిస్తుంది.

డూప్లికేట్ ఎంట్రీల నిరోధం

కొత్త విధానంలో దరఖాస్తులకు బదులుగా లబ్ధిదారులను లాటరీకి పరిగణనలోకి తీసుకుంటారు. వ్యక్తులను ఎంపిక చేయడం వల్ల, ఒకే వ్యక్తికి మల్టిపుల్ డూప్లికేట్ ఎంట్రీలు రాకుండా నిరోధించడం సాధ్యమవుతుంది. ఇది మునుపటి వ్యవస్థలో పెద్ద సంస్థలకు ఉన్న ప్రయోజనాన్ని తొలగిస్తుంది. పాత వ్యవస్థలో ఒకే వ్యక్తి కోసం బహుళ దరఖాస్తులను సమర్పించేందుకు వీలు ఉండేది. కొత్త వ్యవస్థలో రిజిస్ట్రేషన్ ఫీజు కూడా గణనీయంగా పెరుగుతుంది. ఇది ప్రతి ఎంట్రీకి $ 10 నుండి $ 215 వరకు ఉంటుంది.

ఆన్ లైన్ నమోదు

కొత్త వీసా విధానంలో వస్తున్న మరో మార్పు ఏమిటంటే, అభ్యర్థులు యుఎస్సిఐఎస్ కు ఆన్ లైన్ లో నమోదు చేసుకోవాల్సి ఉంటుంది. పూర్తి హెచ్ -1బీ పిటిషన్ దాఖలు చేయడానికి ముందు యజమానులు నమోదు చేసుకోవాలి. ఇది యుఎస్ సిఐఎస్ ప్రక్రియను వేగవంతం చేయడానికి సహాయపడుతుంది. కొత్త విధానం ఉద్యోగులకు మెరుగైన ఎంపిక, మరింత సమర్థవంతమైన అప్లికేషన్ ప్రాసెసింగ్ కు హామీ ఇస్తుంది. ఇది యజమానులకు ఖర్చులను కూడా పెంచుతుంది. వారు ఇప్పుడు ఎవరిని స్పాన్సర్ చేస్తారో కొంచెం జాగ్రత్తగా ఎంచుకోవాల్సి ఉంటుంది.