సింగిల్​ ఛార్జ్​తో 835 కి.మీ రేంజ్​- షియోమీ కొత్త ఈవీకి క్రేజీ డిమాండ్​! గంటల్లో 2.4లక్షల బుకింగ్స్​..

షియోమీ తన ఎలక్ట్రిక్ వాహనాల పోర్ట్‌ఫోలియోను విస్తరిస్తూ, చైనాలో సరికొత్త ఎలక్ట్రిక్ ఎస్​యూవీని విడుదల చేసింది. దాని పేరు Xiaomi YU7. ప్రారంభ ఎక్స్​షోరూం ధర 253,000 యువాన్​లు (సుమారు రూ. 30.26 లక్షలు). తమ మొదటి ఈవీ, ఎస్​యూ7 సెడాన్ విజయవంతం అయిన తర్వాత, ఆటోమోటివ్ రంగంలో షియోమీ చేపట్టిన రెండో ప్రయత్నం ఈ వైయూ7. ఇది అత్యాధునిక సాంకేతికత, అద్భుతమైన పర్ఫార్మెన్స్​, కస్టమైజేషన్ ఆప్షన్స్​తో వస్తుంది. హైలైట్​ విషయం ఏంటంటే.. బుకింగ్స్​ ఓపెన చేసి వెంటనే ఈ ఎలక్ట్రిక్​ కారుకు విపరీతమైన డిమాండ్​ కనిపించింది.

షియోమీ వైయూ7 ఎలక్ట్రిక్​ ఎస్​యూవీ- బుకింగ్స్​ జోరు..

మార్కెట్ నుంచి బలమైన డిమాండ్‌ను చూపిస్తూ, లాంచ్ అయిన మొదటి 18 గంటల్లోనే వైయూ7కి 240,000కు పైగా ప్రీ-ఆర్డర్‌లు వచ్చాయని షియోమీ ధృవీకరించింది. ఇది చైనా ఈవీ విభాగంలో షియోమీ బ్రాండ్ పెరుగుతున్న ఉనికిని బలపరుస్తుంది. వైయూ7 ధర పరంగా కూడా ప్రయోజనంతో వస్తుంది. ఈ ప్రాంతంలో టెస్లా మోడల్ వై కంటే దాదాపు 4 శాతం తక్కువ ధరకు లభిస్తుంది!

షియోమీ వైయూ7: వేరియంట్లు- పర్ఫార్మెన్స్​..

షియోమీ వైయూ7 ని మూడు వేరియంట్లలో అందిస్తోంది: స్టాండర్డ్ (ఆర్​డబ్ల్యూడీ), ప్రో (ఏడబ్ల్యూడీ), మ్యాక్స్ (పర్ఫార్మెన్స్​ అప్‌గ్రేడ్‌లతో ఏడబ్ల్యూడీ). టాప్-స్పెక్ మ్యాక్స్ వేరియంట్‌కు షియోమీ హైపర్‌ఇంజిన్ V6s ప్లస్ శక్తిని అందిస్తుంది. ఇది సిలికాన్ కార్బైడ్ ఆధారిత పవర్‌ట్రెయిన్‌ను కలిగి ఉంది. 690 బీహెచ్‌పీ పవర్​ని, 253 కి.మీ/గం గరిష్ట వేగాన్ని అందిస్తుంది.

బేస్ స్టాండర్డ్ వెర్షన్ 315 బీహెచ్‌పి శక్తిని ఉత్పత్తి చేస్తుంది. 835 కి.మీ వరకు ఆకట్టుకునే రేంజ్‌ను అందిస్తుంది. ప్రో వేరియంట్ 489 బీహెచ్‌పీ పవర్​ని జనరేట్​ చేస్తుంది. 770 కి.మీ వరకు రేంజ్‌ను అందిస్తుంది. మ్యాక్స్ వేరియంట్‌లో కేవలం 2.98 సెకన్లలో 0 నుంచి 100 కి.మీ/గం వేగాన్ని చేరుకుంటుంది. అన్ని వేరియంట్లు అల్ట్రా-ఫాస్ట్ ఛార్జింగ్‌కు మద్దతు ఇస్తాయి. బ్యాటరీ కేవలం 12 నిమిషాల్లో 10 శాతం నుంచి 80 శాతానికి ఛార్జ్ అవుతుంది లేదా 15 నిమిషాల్లో 620 కి.మీ రేంజ్ పొందవచ్చు.

షియోమీ వైయూ7: డిజైన్- కలర్​ ఆప్షన్స్​..

తక్కువ ఎత్తులో ఉండే పెర్ఫార్మెన్స్ ఎలక్ట్రిక్​ ఎస్‌యూవీగా రూపొందించిన వైయూ7.. వైడ్‌బాడీ స్టాన్స్, మస్కులర్ రేర్​ బ్యాక్​ని కలిగి ఉంది. కొనుగోలుదారులు బసాల్ట్ గ్రే, ఎమరాల్డ్ గ్రీన్, డస్క్ పర్పుల్, డాన్ పింక్​ సహా తొమ్మిది రకాల ఎక్స్‌టీరియర్ కలర్స్​ నుంచి ఎంచుకోవచ్చు.

వీల్ ఆప్షన్లలో 19-ఇంచ్​ లాంగ్-రేంజ్ అల్లాయ్స్ నుంచి 21-ఇంచ్​ పర్ఫార్మెన్స్ వీల్స్ వరకు ఉన్నాయి. 21-ఇంచ్​ ఆప్షన్లలో 750 కి.మీ రేంజ్ కోసం మిచెలిన్ ప్రైమసీ 5 ఎనర్జీ టైర్లతో కూడిన ఫాంటమ్ వీల్స్, 670 కి.మీ రేంజ్ అందించే మిచెలిన్ పైలట్ స్పోర్ట్ టైర్లతో కూడిన రెండు స్పోర్టీ ఫోర్జ్డ్ డిజైన్‌లు (ఫ్లోరల్- పెటల్) ఉన్నాయి. ఫ్లోటింగ్ షియోమీ లోగో సెంటర్ క్యాప్స్, రంగుల ఫోర్-పిస్టన్ బ్రెంబో కాలిపర్‌లు (ఎరుపు లేదా పసుపు రంగులలో) ప్రీమియం, కస్టమ్ లుక్‌ను అందిస్తాయి.

షియోమీ వైయూ7: ఇంటీరియర్- ఫీచర్లు..

వైయూ7 ఎలక్ట్రిక్​ ఎస్​యూవీ క్యాబిన్ లోపల, పైన్ గ్రే, కోరల్ ఆరెంజ్, ఐరిస్ పర్పుల్ వంటి అనేక డ్యూయల్-టోన్ అప్‌హోలిస్టరీ ఎంపికలు ఉన్నాయి. ముందు సీట్లలో 10-పాయింట్ మసాజ్ ఫంక్షన్, జీరో-గ్రావిటీ రికైన్ ఉండగా, వెనుక సీట్లు 135 డిగ్రీల వరకు రికైన్ అవుతాయి.

ఈ ఎలక్ట్రిక్​ ఎస్‌యూవీలో అనేక హైటెక్ ఫీచర్లు ఉన్నాయి. వాటిలో 16.1-ఇంచ్​ సెంటర్ టచ్‌స్క్రీన్, స్మార్ట్-డిమ్మింగ్ పనోరమిక్ సన్‌రూఫ్, హైపర్‌విజన్ మినీ ఎల్‌ఈడీ పనోరమిక్ డిస్‌ప్లే, మైక్-రహిత కరవోకే సిస్టమ్ ఉన్నాయి. ఇది XiaoAI వాయిస్ అసిస్టెంట్‌కు కూడా మద్దతు ఇస్తుంది, ఎలక్ట్రానిక్ ఉపకరణాల కోసం ఇంటిగ్రేటెడ్ 27వాట్​ పవర్ అవుట్‌లెట్‌తో వస్తుంది.

షియోమీ వైయూ7కి ప్రత్యేకమైన ఫీచర్లు.. ఐఆర్​వీఎంలో ఇంటిగ్రేటెడ్ 4K జింబల్ కెమెరా, ఏఐ స్పేషియల్ సెన్సార్. వెనుక ప్రయాణికులు షియోమీ ప్యాడ్ 7S ప్రోను కూడా మౌంట్ చేయవచ్చు, అలాగే రూఫ్ రైల్స్ 100వాట్​ పవర్ అవుట్‌పుట్, డ్యూయల్ యూఎస్​బీ-సీ పోర్ట్‌లు, ప్రొజెక్టర్ కనెక్టివిటీని అందిస్తాయి. 25-స్పీకర్ సరౌండ్ సౌండ్ సిస్టమ్, 4.6-లీటర్ ఆన్‌బోర్డ్ ఫ్రిడ్జ్ విలాసవంతమైన ఫీచర్ల జాబితాను పూర్తి చేస్తాయి.

యాపిల్ వినియోగదారులు కూడా ప్రత్యేక కనెక్టెడ్ కార్ ఫీచర్ల నుంచి ప్రయోజనం పొందుతారు. ఐఫోన్ యాక్షన్ బటన్‌ను లాక్/అన్‌లాక్ ఫంక్షన్‌ల కోసం, కంట్రోల్ సెంటర్ ద్వారా షార్ట్‌కట్ ఇంటిగ్రేషన్ కోసం కాన్ఫిగర్ చేయవచ్చు. షియోమీ ఈవీ యాప్ "అలైవ్ స్టేటస్" ఇంటర్‌ఫేస్ ద్వారా రియల్​ టైమ్​ అప్‌డేట్‌లను అందిస్తుంది.