ఏసీతో స్టెబిలైజర్‌ను ఇన్‌స్టాల్ చేయడం అవసరమా? ఏం కాదులే అనుకుంటే నష్టమే

ఎండలు దంచికొడుతున్నాయి. చాలా మంది ఏసీ ఉపయోగిస్తున్నారు. త్వరలో మీరు కూడా ఇంటికి కొత్త ఏసీ కొనాలని ప్లాన్ చేస్తుంటే దానితో పాటు స్టెబిలైజర్‌ను తీసుకురావడం మర్చిపోవద్దు. చాలా సార్లు ఏసీతో స్టెబిలైజర్ వాడకాన్ని పట్టించుకోరు. ఈ చిన్న నిర్లక్ష్యం మీకు చాలా పెద్ద సమస్యను తీసుకొస్తుంది. స్టెబిలైజర్‌పై డబ్బు ఆదా చేయడం వల్ల మీరు తర్వాత ఎక్కువ డబ్బు ఖర్చు చేయాల్సి రావచ్చు.

ఎలక్ట్రానిక్ వస్తువులతో స్టెబిలైజర్ వాడాలని నిపుణులు సిఫార్సు చేస్తారు. ఉదాహరణకు విద్యుత్ సరఫరా నది అయితే.. స్టెబిలైజర్ అనేది నీటిని అంటే విద్యుత్తును అవసరానికి అనుగుణంగా పెంచడం లేదా తగ్గించడం చేసే ఆనకట్ట లాంటిది అనుకోవచ్చు. తద్వారా ఎంత పంపాలో అంత పంపిస్తుంది.

వోల్టేజ్ తక్కువ, ఎక్కువ

తెలుగు రాష్ట్రాల్లో స్టెబిలైజర్ల అవసరం గణనీయంగా ఉంటుంది. ఎందుకంటే విద్యుత్ సరఫరా ఎల్లప్పుడూ ఒకేలా ఉండదు. కొన్నిసార్లు వోల్టేజ్ చాలా తక్కువగా ఉంటుంది. కొన్నిసార్లు ఎక్కువగా ఉంటుంది. తక్కువ లేదా అధిక వోల్టేజ్ కారణంగా కంప్రెసర్, మోటార్, సర్క్యూట్ మొదలైన ఏసీ అంతర్గత భాగాలు దెబ్బతింటాయి. ఇది ఏసీ సామర్థ్యాన్ని కూడా ప్రభావితం చేస్తుంది. ఈ సమస్యను పరిష్కరించడానికి స్టెబిలైజర్ ఉపయోగించడం ముఖ్యం. స్టెబిలైజర్ 140V లేదా 260V వద్ద బయటి నుండి వచ్చే విద్యుత్తును 220-240V గా మార్చి ఏసీకి ఇస్తుంది. ఇది యంత్రంపై ఎటువంటి ఒత్తిడిని కలిగించదు.

కంప్రెసర్ దెబ్బతినకుండా

ఏసీలో అతి ముఖ్యమైన భాగం కంప్రెసర్. ఇది గాలిని చల్లబరచడానికి పనిచేసే భాగం. కంప్రెసర్ చాలా సున్నితమైన భాగం. వోల్టేజ్ చాలా తక్కువగా లేదా చాలా ఎక్కువగా ఉంటే అది కాలిపోవచ్చు. కంప్రెసర్ దెబ్బతిన్నట్లయితే దానిని మార్చడం చాలా ఖరీదైనది. స్టెబిలైజర్ ఈ సమస్య రాకుండా నిరోధిస్తుంది. ఇది ఎల్లప్పుడూ కంప్రెసర్‌కు స్థిరమైన వోల్టేజ్‌ను ఇస్తుంది. కొన్ని స్టెబిలైజర్లలో డిలే టైమర్ కూడా ఉంటుంది. ఇది పవర్ ఆన్ చేసిన తర్వాత కొద్దిసేపు వేచి ఉన్న తర్వాత ఏసీని ప్రారంభిస్తుంది.

సరైన వోల్జేజ్

స్టెబిలైజర్ ఉపయోగిస్తే ఏసీ ఎల్లప్పుడూ సరైన వోల్టేజ్‌ను పొందుతుంది. ఎటువంటి అంతరాయం లేకుండా పనిచేయగలదు. ఏసీపై లోడ్ లేనప్పుడు అది తక్కువ సమయంలో ఎక్కువ చల్లదనాన్ని ఇస్తుంది. తక్కువ విద్యుత్తును వినియోగిస్తుంది. ఇది మీ ఏసీ సరిగ్గా పనిచేయడమే కాకుండా మీ జేబు ఖర్చును కూడా తగ్గిస్తుంది.

ఎక్కువ రోజులు వాడొచ్చు

సరిగ్గా చెప్పాలంటే స్టెబిలైజర్ మీ ఏసీకి సరైన పవర్ డైట్ ఇస్తుందన్నమాట. ప్రతి యంత్రానికి కూడా జీవితకాలం ఉంటుంది, కానీ దానిని సరిగ్గా నిర్వహిస్తే జీవితకాలం పెంచవచ్చు. ఏసీ ఎక్కువ లేదా తక్కువ వోల్టేజ్ పొందినప్పుడు.. దాని అన్ని భాగాలు ప్రభావితమవుతాయి. క్రమంగా యంత్రం లోపల భాగాలు బలహీనపడటం ప్రారంభమవుతాయి. స్టెబిలైజర్ ఈ నష్టాన్ని నివారిస్తుంది.