When to buy own house : ఏ వయస్సులో సొంత ఇల్లు కొనాలి? 30ఏళ్లలోపే కొంటే వచ్చే సమస్యలేంటి?

సొంతిల్లు అనేది ప్రతి ఒక్కరి కల! ఎప్పటికైనా మనకంటూ ఒక ఇల్లు ఉండాలని అందరు భావిస్తూ ఉంటారు. అయితే ఇల్లు కట్టడం లేదా కొనడం అనేది చాలా పెద్ద విషయం. చాలా ఫ్యాక్టర్స్​ దీనిని ప్రభావితం చేస్తాయి. గతంలో 35-40ఏళ్లప్పుడు ప్రజలు సొంతిల్లు కొనుక్కునేవారు. కానీ ఇప్పుడు, చాలా మంది తమ పిల్లలకు ఉద్యోగం వచ్చినప్పుడే సొంత ఇల్లు కొనుక్కోవాలని ఒత్తిడి చేస్తున్నారు. చాలా మంది కొంటున్నారు కూడా! అసలు ఇల్లు కట్టాలంటే ఏ విషయాలను పరిగణలోకి తీసుకోవాలి? ఏ వయస్సులో ఇల్లు కొంటే మంచిది? 30ఏళ్లలోపే ఇల్లు కొంటే వచ్చే సమస్యలేంటి? ఇక్కడ తెలుసుకోండి..

సొంతిల్లు కొనే ముందు ఏ విషయాలను పరిగణించాలి?

సొంత ఇల్లు కట్టుకోవడం అనేది ఒక కల కాబట్టి.. చాలా మంది దానికి ఎమోషనల్​గా కనెక్ట్​ అవుతారు. ఎమోషనల్​గా నిర్ణయాలు తీసుకుంటారు. కానీ అది సరైనది కాదు. ఇందులో చాలా డబ్బు ఖర్చు ఉంటుంది కాబట్టి చాలా ఆలోచించి ఒక నిర్ణయం తీసుకోవాలి.

సొంత ఇంటి కోసం డౌన్​పేమెంట్​ కట్టాల్సి ఉంటుంది. మొత్తం ప్రాపర్టీ వాల్యూలో కనీసం 20శాతం డౌన్​పేమెంట్​ కడితే బెటర్​. ఇలా చేస్తే తీసుకునే లోన్​, వడ్డీ రేటు భారం తగ్గుతుంది.

అంత డౌన్​పేమెంట్​ కోసం డబ్బులు సేవ్​ చేసేందుకు టైమ్​ పట్టినప్పటికీ, మనకి మంచి బెనిఫిట్స్​ ఉంటాయి. మన మీద అధిక రుణభారం ఉండదు. త్వరగా దానిని క్లియర్​ కూడా చేసుకోవచ్చు. మన ఫైనాన్షియల్​ స్టెబిలిటీ కూడా మెరుగ్గా ఉంటుంది.

పైగా.. ఇప్పుడు ప్రపంచవ్యాప్తంగా వడ్డీ రేట్లు అధికంగా ఉన్నాయి. ఈ సమయంలో పెద్ద హోమ్​ లోన్​ తీసుకోవాలంటే ఒకటికి రెండుసార్లు ఆలోచించడం మంచిదని ఆర్థిక నిపుణులు చెబుతున్నారు. వడ్డీ రేటు ఎక్కువగా ఉంటే, మన జేబు నుంచి ఎక్కువ ఖర్చు చేయాల్సి ఉంటుంది. వడ్డీ రేట్లు తక్కువ ఉన్నప్పుడు కొంటే బెటర్​!

పైగా.. కెరీర్​ స్టెబిలిటీ కూడా చాలా ముఖ్యం. ఇల్లు కట్టడం అనేది దీర్ఘకాలిక పెట్టుబడి. ఇప్పుడున్న పరిస్థితుల్లో 30 నుంచి 35ఏళ్లు వచ్చేసరికి కెరీర్​లో స్టెబిలిటీ కనిపిస్తుంది. అందుకే చాలా మంది 35ఏళ్లు దాటిన తర్వాత ఇల్లు కట్టుకునేందుకు ప్లాన్​ చేస్తూ ఉంటారు.

ఇక్కడ క్రెడిట్​ స్కోర్​ కూడా చాలా ముఖ్యం. మీరు ఎంత మంచి క్రెడిట్​ స్కోర్​ని బిల్డ్​ చేసుకుంటే, మీ మీద ఆర్థిక భారం అంత తగ్గుతుంది. క్రెడిట్​ స్కోర్​ 750 కన్నా ఎక్కువ ఉంటే తక్కువ వడ్డీకి హోమ్​ లోన్​ పొందడానికి అవకాశం ఉంటుంది. క్రెడిట్​ స్కోర్​ తక్కువగా ఉంటే మాత్రం, అంత పెద్ద లోన్​ తీసుకోవాలంటే ఆలోచించాల్సి ఉంటుంది.

సొంతింటి కలపై రియల్​ ఎస్టేట్​ ప్రభావం కూడా ఉంటుంంది. పరిస్థితులు మనకి అనుకూలంగా ఉన్నప్పుడే నిర్ణయం తీసుకోవాలి. ప్రాపర్టీ ధరలు లొకేషన్​ బట్టి మారుతుంటాయి కాబట్టి, ముందు మీరు మీ బడ్జెట్​పై ఒక నిర్ణయం తీసుకోవాలి. దానికి తగ్గట్టుగానే అడుగులు వేయాలి.

ఏ వయస్సులో సొంతిల్లు ఎప్పుడు కొనాలి?

ఇండియాలో సాధారణంగా 22, 23ఏళ్లు వచ్చేసరికి ఉద్యోగం మొదలుపెడుతుంటారు. అప్పుడే, సొంతిల్లు వంటి పెద్ద విషయాల గురించి ఆలోచించకపోవడం ఉత్తమం! పైన చెప్పినట్టు.. డౌన్​పేమెంట్​, కెరీర్​ స్టెబిలిటీపై ఫోకస్​ చేసి డబ్బులను సేవ్​ లేదా ఇన్​వెస్ట్​ చేస్తూ ఉండాలి. క్రెడిట్​ స్కోర్​ని పెంచుకునే పని చేయాలి. ఇవన్నీ చేయాలంటే కచ్చితంగా టైమ్​ పడుతుంది.

30ఏళ్లలోపే ఇల్లు కొంటే మన మీద చాలా భారం పడుతుంది. చాలీచాలనీ జీతాలు వస్తుంటే, పరిస్థితి మరింత కష్టంగా మారుతుంది. చాలా మందికి.. చేస్తున్న ఉద్యోగం నచ్చదు. కానీ చేసిన అప్పులను తీర్చుకునేందుకు వేరే ఆప్షన్​ లేక ఉండిపోతారు. పైగా.. 30ఏళ్లలోపే పెళ్లి, కారు వంటి ఖర్చులు ఉంటాయి. అవేమీ చిన్న ఖర్చులు కావు! అందుకే.. 30ఏళ్లలోపు కెరీర్​ని సెట్​ చేసుకోవడంపై ఫోకస్​ చేయాలి. 'సొసైటీ ప్రెజర్'లో అస్సలు పడకండి. వాళ్లు కొన్నారు, వీళ్లు కొన్నారు అని మీ మీద మీరు ఒత్తిడి పెంచుకోకండి. అందరి ఆర్థిక పరిస్థితి ఒకే విధంగా ఉండదు. సరైన నిర్ణయాలు తీసుకుంటే, మీరు ఇల్లు కట్టుకోవచ్చు.

కెరీర్​, ట్రావెలింగ్​, ఎడ్జ్యుకేషన్​పై ఆలోచించేవారు.. 30ఏళ్లలోపు ఇల్లు తీసుకోవడం ఉత్తమం కాదు. 30ఏళ్లు దాటి తర్వాత.. సెటిల్​ అవ్వడానికి రెడీగా ఉన్నట్టు మీకు అనిపిస్తే, అప్పుడు ఇల్లు కొనడంపై ఆలోచనలు మొదలుపెట్టొచ్చు. ఆ సమయానికి మీ దగ్గర తగిన సేవింగ్స్​ కూడా ఉంటాయి. 35ఏళ్ల వయస్సులో ఇల్లు కట్టుకోవడం అనేది బ్యాలెన్స్​డ్​ అప్రోచ్​గా ఉంటుంది. మీ ఆర్థిక పరిస్థితి మెరుగుపడుతుంది. కెరీర్​, ఇన్​వెస్ట్​మెంట్స్​ అన్నీ ట్రాక్​లో పడతాయి.

చివరిగా.. 20ఏళ్లైనా, 30ఏళ్లైనా, 40ఏళ్లైనా.. మీరు ఫైనాన్షియల్​గా ఫిట్​గా ఉంటేనే హోం లోన్​ వంటి భారీ భారాన్ని మీ భుజాల మీద మోసేందుకు సిద్ధమవ్వండి.