6500ఎంఏహెచ్​ బ్యాటరీ, 200ఎంపీ కెమెరాతో వివో వీ60ఈ-​ వీ50ఈతో పోల్చితే బెటర్​ ఆప్షన్​ అవుతుందా?

వివో సంస్థ ఈ నెలలో భారత్‌లో కొత్త వీ సిరీస్ మోడల్‌ను విడుదల చేయడానికి సిద్ధమవుతోంది. ఆ మోడలే వివో వీ60ఈ 5జీ. అధికారిక విడుదల తేదీని కంపెనీ ఇంకా ప్రకటించనప్పటికీ, ఈ స్మార్ట్‌ఫోన్ డిజైన్, రంగులు, కెమెరా ఫీచర్లు, ఇతర అంశాలను టీజర్‌ల రూపంలో విడుదల చేస్తూ హైప్ క్రియేట్ చేస్తోంది. అధికారిక టీజర్లతో పాటు.. వివో వీ60ఈ 5Gకి సంబంధించిన అనేక లీక్‌లు కూడా ఇంటర్నెట్‌లో విస్తృతంగా వస్తున్నాయి. దీని వల్ల ఈ కొత్త ఫోన్ గురించి ముందే ఒక అంచనాకు వచ్చే అవకాశం దొరుకుతోంది.

ఈ నేపథ్యంలో.. ఈ కొత్త స్మార్ట్​ఫోన్ పాత మోడల్‌తో పోలిస్తే అప్‌గ్రేడ్ చేసుకోవడం ఎంతవరకు ప్రయోజనకరం అని తెలుసుకోవడానికి, వివో వీ60ఈ 5Gని దాని మునుపటి మోడల్ అయిన వివో వీ50ఈ 5జీతో పోల్చి, ఈ రెండు ఫోన్ల మధ్య ఉన్న తేడాలను ఇక్కడ తెలుసుకుందాము..

వివో వీ60ఈ 5జీ వర్సెస్​ వివో వీ50ఈ 5జీ: డిజైన్, డిస్‌ప్లే..

కొత్త వివో వీ60ఈ 5జీ డిజైన్ చూస్తే, ఇది గతంలో విడుదలైన వివో వీ60 మోడల్‌ను పోలి ఉంటుంది. దీని వెనుక భాగంలో పిల్-ఆకారంలో ఉన్న కెమెరా మాడ్యూల్, గ్లాసీ బ్యాక్ ప్యానెల్ కనిపిస్తాయి. అయితే, దీని నిర్మాణం మాత్రం ప్లాస్టిక్‌తో ఉంటుంది. మరోవైపు, వివో వీ50ఈ 5జీ కెమెరా మాడ్యూల్ డిజైన్ భిన్నంగా ఉంది, అది దాని కంటే ఖరీదైన వివో వీ50 మోడల్‌ను పోలి ఉంటుంది. డిజైన్ వేరుగా ఉన్నప్పటికీ, ఈ రెండు మోడళ్లు దుమ్ము, నీటి నుంచి రక్షణ కోసం ఐపీ68, ఐపీ69 రేటింగ్‌లను కలిగి ఉన్నాయి.

వివో వీ60ఈలో 6.77-ఇంచ్​ ఓఎల్​ఈడీ డిస్‌ప్లే ఉంటుందని అంచనా! ఇది 120హెచ్​జెడ్​ రిఫ్రెష్ రేట్, గరిష్టంగా 1800 నిట్స్​ పీక్ బ్రైట్‌నెస్ కలిగి ఉంటుంది. ఇక వివో వీ50ఈ విషయానికి వస్తే, ఇందులో 6.77-అంగుళాల అమోఎల్​ఈడీ డిస్‌ప్లే, 120హెచ్​జెడ్​ రిఫ్రెష్ రేట్, గరిష్టంగా 1300 నిట్స్​ పీక్ బ్రైట్‌నెస్ ఉన్నాయి.

వివో వీ60ఈ 5జీ వర్సెస్​ వివో వీ50ఈ 5జీ: ప్రాసెసర్, బ్యాటరీ..

వివో వీ60ఈలో కూడా దాని పాత మోడల్ వీ50ఈ 5Gలో ఉపయోగించిన మీడియాటెక్ డైమెన్సిటీ 7300 ప్రాసెసరే ఉండే అవకాశం ఉంది. అలాగే, 8జీబీ ర్యామ్​, 256జీబీ వరకు ఇంటర్నల్ స్టోరేజ్ కూడా ఒకే విధంగా ఉండవచ్చు.

అయితే, కొత్త తరంలో వివో బ్యాటరీ సామర్థ్యాన్ని భారీగా పెంచింది. వివో వీ50ఈలో ఉన్న 5600ఎంఏహెచ్​ బ్యాటరీ స్థానంలో, వివో వీ60ఈలో ఏకంగా 6500ఎంఏహెచ్​ బ్యాటరీని అందిస్తోంది. ఛార్జింగ్ విషయానికి వస్తే, ఈ రెండు మోడళ్లు 90డబ్ల్యూ వైర్డ్ ఫాస్ట్ ఛార్జింగ్‌కు మద్దతు ఇస్తాయి.

వివో వీ60ఈ 5జీ వర్సెస్​ వివో వీ50ఈ 5జీ: కెమెరా..

కెమెరా విభాగంలో వివో వీ60ఈ స్మార్ట్​ఫోన్​లో పెద్ద అప్‌గ్రేడ్ ఉంది. ఇందులో 200 ఎంపీ ప్రైమరీ సెన్సార్, 8 ఎంపీ అల్ట్రావైడ్ సెన్సార్ ఉంటాయని నిర్థారించారు. వివో వీ50ఈలో మాత్రం 50 ఎంపీ మెయిన్ కెమెరా, 8 ఎంపీ అల్ట్రావైడ్ కెమెరా ఉన్నాయి. సెల్ఫీ కెమెరా విషయానికి వస్తే, ఈ రెండు మోడళ్లు కూడా 50 ఎంపీ సెల్ఫీ షూటర్‌ను కలిగి ఉన్నాయి.

వివో వీ60ఈ వర్సెస్​ వివో వీ50ఈ: భారత్‌లో ధర..

వివో వీ60ఈ 5జీ 8జీబీ+128జీబీ వేరియంట్ ధర సుమారుగా రూ. 28,749 ఉండే అవకాశం ఉందని అంచనా. వివో వీ50ఈ 5జీ 8జీబీ+128జీబీ వేరియంట్ ప్రారంభ ధర రూ. 26,999గా ఉంది. ఈ లెక్కన, కొత్త మోడల్ ధర కొద్దిగా ఎక్కువగానే ఉండవచ్చని తెలుస్తోంది!