UPI outage: యూపీఐ సేవలకు అంతరాయం; నిలిచిన డిజిటల్ పేమెంట్స్; ఎన్పీసీఐ వివరణ

UPI outage: యూనిఫైడ్ పేమెంట్స్ ఇంటర్ఫేస్ (UPI) బుధవారం భారతదేశంలోని అనేక ప్లాట్ ఫామ్స్ లో డిజిటల్ లావాదేవీలలో అంతరాయాన్ని ఎదుర్కొంది. గూగుల్ పే, ఫోన్ పే, పేటీఎం వంటి ప్రముఖ యాప్ ల ద్వారా చెల్లింపులను ప్రాసెస్ చేయడంలో ఇబ్బందులు ఎదురవుతున్నాయని వినియోగదారులు నివేదించారు.

అంతరాయానికి కారణం

ఈ సమస్యను పరిష్కరించినట్లు నేషనల్ పేమెంట్స్ కార్పొరేషన్ ఆఫ్ ఇండియా (NPCI) ఎక్స్ లో వెల్లడించింది. ‘‘ఎన్పీసీఐ అడపాదడపా సాంకేతిక సమస్యలను ఎదుర్కొంటోంది. ఇది పాక్షిక యూపీఐ అంతరాయాలకు దారితీసింది. ఇప్పుడు సమస్య పరిష్కారమై వ్యవస్థ స్థిరపడింది. అసౌకర్యానికి చింతిస్తున్నాం’’ అని ఎన్పీసీఐ పేర్కొంది.

ప్రభావితమైన వినియోగదారుల సంఖ్య

డౌన్ డిటెక్టర్ ప్రకారం, రాత్రి 7:50 గంటల నాటికి యూపీఐ అంతరాయం గురించి మొత్తం 2,750 ఫిర్యాదులు నమోదయ్యాయి. వీటిలో 296 ఫిర్యాదులు గూగుల్ పే యూజర్ల నుంచి రాగా, 119 ఫిర్యాదులు పేటీఎం యాప్ కు సంబంధించినవి. అదనంగా, 376 మంది వినియోగదారులు స్టేట్ బ్యాంక్ ఆఫ్ ఇండియా ప్లాట్ఫామ్ తో సమస్యలను నివేదించారు. చాలా మంది ఎస్బీఐ కస్టమర్లు ఫండ్ ట్రాన్స్ఫర్, ఆన్లైన్ బ్యాంకింగ్ సేవలతో ఇబ్బందులు ఎదుర్కొన్నారు.

మధ్యాహ్నం నుంచే..

యూపీఐ లావాదేవీల వైఫల్యాలకు సంబంధించిన ఫిర్యాదులు మధ్యాహ్నం నుండి రావడం ప్రారంభమైంది. వినియోగదారులు లావాదేవీలను పూర్తి చేయడానికి ప్రయత్నిస్తున్నప్పుడు లావాదేవీలు ఆలస్యం కావడం కానీ, లేదా చెల్లింపు నిలిచిపోవడం కానీ జరుగుతోందని ఫిర్యాదులు వచ్చాయి. వినియోగదారులు తమ సంబంధిత సర్వీస్ ప్రొవైడర్ల నుండి అప్ డేట్స్ ను చెక్ చేయాలని, సేవలు పూర్తిగా పునరుద్ధరించబడే వరకు ప్రత్యామ్నాయ చెల్లింపు పద్ధతులను పరిగణించాలని ఎన్పీసీఐ సూచించింది.

సోషల్ మీడియాలో పోస్ట్ లు

ఇదిలావుండగా, అంతరాయం గురించి విసుగు చెందిన వినియోగదారులు సమాధానాలు కోరడంతో సోషల్ మీడియా ప్లాట్ఫామ్ లు ఫిర్యాదులతో నిండిపోయాయి. ఎక్స్ లో ఒక వినియోగదారుడు నగదు దగ్గర ఉంచుకోవడం ప్రాముఖ్యతను హాస్యాస్పదంగా నొక్కి చెప్పాడు, ‘‘యూపీఐ మొదటిసారి డౌన్ అయింది. దాని ప్రభావం ఇప్పటికే కనిపిస్తుంది. మనలో చాలా మంది నగదు తీసుకెళ్లడం మానేశారు. ఈ డౌన్ టైమ్ డూ-ఆర్-డై పరిస్థితిని 😂 సృష్టించింది. నగదును చేతిలో పెట్టుకోవడం గురించి పెద్దలు చెప్పింది కరెక్టే ✅’’ అని ఆ యూజర్ పోస్ట్ చేశారు.