UPI down : యూపీఐ సేవలకు మళ్లీ అంతరాయం- చేతుల్లో క్యాష్ లేకపోతే అంతే!
UPI down today : దేశవ్యాప్తంగా యూపీఐ సేవలు శనివారం నిలిచిపోయాయి. దేశవ్యాప్తంగా వేలాది మంది కస్టమర్లు వివిధ యాప్స్లో యూపీఐని వినియోగించుకోలేకపోయారు.
యూనిఫైడ్ పేమెంట్స్ ఇంటర్ఫేస్లో మళ్లీ అంతరాయం ఏర్పడింది. ఫలితంగా పేటీఎం, ఫోన్పే, గూగుల్ పే వంటి ప్రసిద్ధ యాప్స్పై ఈ ప్రభావితం భారీగా పడింది. దేశవ్యాప్తంగా వేలాది మంది యూపీఐ యాప్స్ ద్వారా లావాదేవీలు చేయలేకపోయారు. చెల్లింపుల కోసం యూపీఐని తరచుగా ఉపయోగించే వారికి తీవ్ర ఇబ్బందులు ఎదురయ్యాయి.
యూపీఐ సేవలకు అంతరాయం..
ఏప్రిల్ 12 శనివారం ఉదయం 11:30 గంటలకు ఫోన్పే, గూగుల్పే, పేటీఎం తదితర యాప్స్లో డిజిటల్ చెల్లింపులకు ఇబ్బందులు ఎదురవుతున్నాయని పలువురు వినియోగదారులు ఫిర్యాదు చేశారు. ఈ విషయాన్ని ట్రాకింగ్ ప్లాట్ఫామ్ డౌన్డిటెక్టర్ సైతం ధ్రువీకరించింది. 76 శాతం మంది వినియోగదారులు చెల్లింపులకు సంబంధించి సమస్యలను ఎదుర్కొన్నారని, 23 శాతం మంది నిధులను బదిలీ చేయలేకపోయారని డౌన్డిటెక్టర్ చూపించింది.
యూపీఐ సేవలకు తాజా అంతరాయానికి గల కారణాలు ఇంకా తెలియరాలేదు.
నేషనల్ పేమెంట్స్ కార్పొరేషన్ ఆఫ్ ఇండియా (ఎన్పీసీఐ) దీనిపై స్పందించలేదు.
మాటిమాటికి యూపీఐ అంతరాయం..
గత పది రోజుల్లో యూపీఐ వినియోగదారులు డిజిటల్ చెల్లింపులకు అంతరాయం ఏర్పడటం ఇది రెండోసారి. గూగుల్పే, పేటీఎం, ఫోన్పే వంటి డిజిటల్ ప్లాట్ఫామ్స్లో యూపీఐ చెల్లింపులు చేయలేకపోతున్నామని ఏప్రిల్ 2న పలువురు వినియోగదారులు ఫిర్యాదు చేశారు. కొన్ని బ్యాంకుల్లో సక్సెస్ రేట్లలో హెచ్చుతగ్గుల కారణంగా యూపీఐ తగ్గిందని, ఇది యూపీఐ నెట్వర్క్లో జాప్యాన్ని పెంచిందని ఎన్పీసీఐ తెలిపింది.
సోషల్ మీడియా యూజర్ల స్పందన..
యూపీఐ అంతరాయంపై పలువురు సోషల్ మీడియా యూజర్లు అసహనం వ్యక్తం చేస్తూ చేతిలో క్యాష్ క్యారీ చేయాలని సూచించారు.
"యూపీఐ డౌన్ అయింది, దయచేసి మీ వాలెట్లో డబ్బులు పెట్టుకోండి," అని ఒక యూజర్ చెప్పాడు.
“యూపీఐ ఈ రోజు మళ్లీ పనిచేయడం లేదు. చెల్లింపులన్నీ విఫలమవుతున్నాయి. ప్రణాళికాబద్ధమైన అంతరాయం ఏర్పడితే కనీసం ముందస్తు సమాచారం పంపాలి. అందుకనుగుణంగా ప్లాన్ చేసుకోవచ్చు,” అని మరొకరు వ్యాఖ్యానించారు.
"యూపీఐ సర్వర్ డౌన్ అయినందున గత 20+ నిమిషాలుగా ఈ ఇంధన స్టేషన్లో చిక్కుకుపోయాను. నేను నగదు / కార్డును తీసుకెళ్లలేదు. నేను ఇప్పటికే నా కారుకు ఇంధనం నింపాను," అని ఒక వినియోగదారుడు చెప్పారు.
"యూపీఐ డౌన్! యూపీఐ పని చేసిన వెంటనే డబ్బులు వేస్తానని ఆటో డ్రైవర్కి చెప్పాల్సి వచ్చింది. ఎప్పుడూ క్యాష్ తీసుకెళ్లాలి,' అని మరొకరు వ్యాఖ్యానించారు.
మధ్యాహ్న భోజనానికి ఏం ఆర్డర్ చేయాలో నిర్ణయించుకోవడానికి జొమాటోలో గంటసేపు స్క్రోల్ చేశానని, చివరకు ఆర్డర్ ఇవ్వబోతున్నప్పుడు యూపీఐ సర్వర్లు డౌన్ అయ్యాయని మరో యూజర్ కామెంట్ చేశాడు.
Sharath Chitturi
సంబంధిత కథనం