Maruti 7 Seater : మారుతి నుంచి కొత్త 7 సీటర్ ఎంట్రీ ఇవ్వనుంది.. ఆ కార్ల అమ్మకాలపై ప్రభావం పడే ఛాన్స్!

భారత ఆటోమెుబైల్ రంగంలో మారుతి సుజుకిది ప్రత్యేకమైన స్థానం. ఈ కంపెనీ కార్లకు ఎల్లప్పుడూ డిమాండ్ ఉంటుంది. కస్టమర్ల ఇష్టాలకు తగ్గట్టుగా కొత్త కార్లను మార్కెట్‌లోకి తీసుకువస్తుంది మారుతి. ఇప్పుడు ఈ కంపెనీ నుంచి మరో రెండు కార్లు రానున్నాయి. ఇ-విటారా, 7 సీట్ల మోడల్, దీనికి 'వై 17' అనే కోడ్ నేమ్ ఉంటుంది. మారుతి వై 17 ప్రీమియం ఎస్‌యూవీ. ఇది హ్యుందాయ్ అల్కాజార్, మహీంద్రా ఎక్స్‌యూవీ 700, టాటా సఫారీ వంటి మోడళ్లతో పోటీపడుతుంది. దీంతో ఈ కార్ల అమ్మకాలపై ప్రభావం పడే ఛాన్స్ ఉంది.

స్పై షాట్స్ చూస్తే.. మారుతి వై 17 పొడవైన బాడీని కలిగి ఉంటుందని తెలుస్తోంది. వెనుక ఓవర్ హాంగ్, పొడవైన వీల్ బేస్ ఉండనుంది. మారుతి సుజుకి 7-సీటర్‌ను ప్రత్యేక మోడల్‌గా మార్కెట్ చేస్తుంది కంపెనీ. దీనికి భిన్నమైన ఎక్స్టీరియర్‌ను ఇస్తుంది. ఇది మరింత స్టైలింగ్ గా కనిపిస్తుంది.

ఈ సెగ్మెంట్ లోని పోటీ మోడళ్లలో 18 అంగుళాలు, 19 అంగుళాల అల్లాయ్ వీల్స్ ఉన్నాయి. మెరుగైన రైడ్ క్వాలిటీ, ఇంధన సామర్థ్యం కోసం మారుతి సుజుకి వై 17ను 17-అంగుళాల అల్లాయ్ వీల్స్‌తో సిద్ధం చేసే అవకాశం ఉంది. సీటింగ్‌లో మూడో వరుసలోని ప్రయాణికులకు ప్రవేశం, బయటకు వెళ్లడం సులభతరం చేయడానికి వెడల్పాటి వెనక తలుపులు రావొచ్చని అంటున్నారు. వెనుక భాగంలో మారుతి సుజుకి స్లిమ్ టెయిల్ ల్యాంప్స్‌ను డిజైన్ చేసింది. ఇవి గ్రాండ్ విటారా మాదిరిగా ఎక్కువ వెడల్పును కవర్ చేస్తాయి.

మారుతి వై17 ఇంటీరియర్ చాలా అప్డేట్‌గా ఉంటుందని అంటున్నారు. ఫ్రీస్టాండింగ్ టచ్‌స్క్రీన్ ఇన్ఫోటైన్మెంట్ సిస్టమ్ గ్రాండ్ విటారా 9-అంగుళాల స్మార్ట్‌ప్లే ప్రో ప్లస్ హెచ్‌డీ యూనిట్‌ను పోలి ఉంటుంది. దీనిని 2025 ఏప్రిల్ నుండి జూన్ వరకు మార్కెట్లోకి తీసుకురావచ్చు.

మారుతి సుజుకి వై 17ను గ్రాండ్ విటారా మాదిరిగానే మైల్డ్-హైబ్రిడ్, ఫుల్-హైబ్రిడ్ పవర్ట్రెయిన్‌తో విడుదల చేస్తుందని భావిస్తున్నారు. మైల్డ్-హైబ్రిడ్ సిస్టమ్ 1.5-లీటర్ నాలుగు సిలిండర్ల పెట్రోల్ ఇంజిన్తో పనిచేస్తుంది. ఇది 75.8 కిలోవాట్ల (102 బీహెచ్పీ), 136.8 ఎన్ఎమ్ టార్క్ ఉత్పత్తి చేస్తుంది. ఇది ఇంటిగ్రేటెడ్ స్టార్టర్ జనరేటర్ కలిగి ఉండాలి. ఇది 5-స్పీడ్ మాన్యువల్ ట్రాన్స్మిషన్ లేదా 6-స్పీడ్ ఆటోమేటిక్ ట్రాన్స్మిషన్ కలిగి ఉండవచ్చు.

ఫుల్-హైబ్రిడ్ వ్యవస్థలో 68 కిలోవాట్ల (91 బీహెచ్పీ), 122 ఎన్ఎమ్ టార్క్‌ను అభివృద్ధి చేసే 1.5-లీటర్ మూడు సిలిండర్ల పెట్రోల్ ఇంజన్, 59 కిలోవాట్ (79 బీహెచ్పీ), 141 ఎన్ఎమ్ టార్క్ ఉత్పత్తి చేసే ఎసి సింక్రోనస్ మోటార్ ఉన్నాయి. ఇది మొత్తం 85 కిలోవాట్ల (114 హెచ్పీ) శక్తిని ఉత్పత్తి చేస్తుంది.